[1330] Mātaraṁ cīvaraṁ yāce no ca saṅghassa 1 pariṇataṁ
kenassa hoti āpatti anāpatti ca ñātake
pañhā mesā kusalehi cintitā.

[1331] Kuddho ārādhako hoti kuddho hoti garahiyo
atha ko nāma so dhammo yena kuddho pasaṁsiyo
pañhā mesā kusalehi cintitā.

[1332] Tuṭṭho ārādhako hoti tuṭṭho hoti garahiyo
atha ko nāma so dhammo yena tuṭṭho garahiyo
pañhā mesā kusalehi cintitā.

[1333] Saṅghādisesaṁ thullaccayaṁ
pācittiyaṁ pāṭidesanīyaṁ
dukkaṭaṁ āpajjeyya ekato
pañhā mesā kusalehi cintitā.

[1334] Ubho paripuṇṇavīsativassā ubhinnaṁ
ekupajjhāyo ekācariyo ekā kammavācā
eko upasampanno eko anupasampanno
pañhā mesā kusalehi cintitā.

[1335] Akappakataṁ napi rajanāya rattaṁ
1 Ma. saṅghe.
Tena nivattho yena kāmaṁ vajeyya
na cassa hoti āpatti
so ca dhammo sugatena desito
pañhā mesā kusalehi cintitā.

[1336] Na deti nappaṭiggaṇhāti
paṭiggaho tena na vijjati
āpajjati garukaṁ na lahukaṁ
tañca paribhogapaccayā
pañhā mesā kusalehi cintitā.

[1337] Na deti nappaṭiggaṇhāti
paṭiggaho tena na vijjati
āpajjati lahukaṁ na garukaṁ
tañca paribhogapaccayā
pañhā mesā kusalehi cintitā.

[1338] Āpajjati garukaṁ sāvasesaṁ
chādeti anādariyaṁ paṭicca
na bhikkhunī no ca phuseyya vajjaṁ
pañhā mesā kusalehi cintitā.
Sedamocanagāthā 1 niṭṭhitā.
1 Yu. sedamocakagāthā.
Tassuddānaṁ

[1339] Asaṁvāso avissajji dasa ca anukkhittako
upeti dhammaṁ ubbhakkhaṁ 1 tato saññācikā ca dve
na kāyikañca garukaṁ na kāyikaṁ sunāsitaṁ 2
anālapanto sikkhā ca ubho ca caturo janā
itthī telañca nissaggi bhikkhū ca padavītiyo
nivattho ca na ca ñatti na mātaraṁ pitaraṁ hane
acodayitvā codayitvā chindantaṁ saccameva ca
adhiṭṭhitañcatthaṅgate na rattaṁ na cāraññakaṁ
kāyikā vācasikā ca 3 tissitthī cāpi mātaraṁ
kuddho ārādhako tuṭṭho saṅghādisesakā 4 ubho
akappakataṁ na deti na detāpajjate 5 garuṁ
sedamocanikā gāthā pañhā viññūvibhāvitāti.
--------------
1 Ma. Yu. ubbhakkhakaṁ. 2 Yu. na vācasikaṁ. 3 Yu. kāyikavācasikā.
4 Ma. Yu. saṅghādisesā ca. 5 Yu. na detāpajjati.
Pañca vaggā