[880] Āpattādhikaraṇapaccayā kati āpattiyo āpajjati.
Āpattādhikaraṇapaccayā catasso āpattiyo āpajjati bhikkhunī
jānaṁ pārājikaṁ dhammaṁ paṭicchādeti āpatti pārājikassa. Vematikā
paṭicchādeti āpatti thullaccayassa. Bhikkhu saṅghādisesaṁ paṭicchādeti
āpatti pācittiyassa. Ācāravipattiṁ paṭicchādeti
āpatti dukkaṭassa. Āpattādhikaraṇapaccayā imā catasso
āpattiyo āpajjati. Tā āpattiyo catunnaṁ vipattīnaṁ kati
vipattiyo bhajanti .pe. Sattannaṁ samathānaṁ katīhi samathehi sammanti.
Tā āpattiyo catunnaṁ vipattīnaṁ dve vipattiyo bhajanti siyā
sīlavipattiṁ siyā ācāravipattiṁ. Sattannaṁ āpattikkhandhānaṁ
catūhi āpattikkhandhehi saṅgahitā siyā pārājikāpattikkhandhena
siyā thullaccayāpattikkhandhena siyā pācittiyāpattikkhandhena siyā
dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena
Samuṭṭhahanti kāyato ca vācato ca cittato ca samuṭṭhahanti.
Catunnaṁ adhikaraṇānaṁ āpattādhikaraṇaṁ. Sattannaṁ samathānaṁ tīhi
samathehi sammanti siyā sammukhāvinayena ca paṭiññātakaraṇena ca
siyā sammukhāvinayena ca tiṇavatthārakena ca.

[881] Kiccādhikaraṇapaccayā kati āpattiyo āpajjati.
Kiccādhikaraṇapaccayā pañca āpattiyo āpajjati ukkhittānuvattikā
bhikkhunī yāvatatiyaṁ samanubhāsanāya nappaṭinissajjati ñattiyā dukkaṭaṁ
dvīhi kammavācāhi thullaccayā kammavācāpariyosāne āpatti
pārājikassa. Bhedakānuvattakā bhikkhū yāvatatiyaṁ samanubhāsanāya
nappaṭinissajjanti āpatti saṅghādisesassa. Pāpikāya diṭṭhiyā
yāvatatiyaṁ samanubhāsanāya nappaṭinissajjati āpatti pācittiyassa.
Kiccādhikaraṇapaccayā imā pañca āpattiyo āpajjati. Tā
āpattiyo catunnaṁ vipattīnaṁ kati vipattiyo bhajanti .pe. Sattannaṁ
samathānaṁ katīhi samathehi sammanti. Tā āpattiyo catunnaṁ
vipattīnaṁ dve vipattiyo bhajanti siyā sīlavipattiṁ siyā ācāravipattiṁ.
Sattannaṁ āpattikkhandhānaṁ pañcahi āpattikkhandhehi
saṅgahitā siyā pārājikāpattikkhandhena siyā saṅghādisesāpattikkhandhena
siyā thullaccayāpattikkhandhena siyā pācittiyāpattikkhandhena
siyā dukkaṭāpattikkhandhena. Channaṁ āpattisamuṭṭhānānaṁ ekena
samuṭṭhānena samuṭṭhahanti kāyato ca vācato ca cittato ca
Samuṭṭhahanti. Catunnaṁ adhikaraṇānaṁ āpattādhikaraṇaṁ. Sattannaṁ
samathānaṁ tīhi samathehi sammanti siyā sammukhāvinayena ca paṭiññātakaraṇena
ca siyā sammukhāvinayena ca tiṇavatthārakena ca.

[882] Ṭhapetvā satta āpattiyo satta āpattikkhandhe avasesā
āpattiyo catunnaṁ vipattīnaṁ kati vipattiyo bhajanti. Sattannaṁ
āpattikkhandhānaṁ katīhi āpattikkhandhehi saṅgahitā. Channaṁ
āpattisamuṭṭhānānaṁ katīhi samuṭṭhānehi samuṭṭhahanti. Catunnaṁ
adhikaraṇānaṁ katamaṁ adhikaraṇaṁ. Sattannaṁ samathānaṁ katīhi samathehi
sammanti. Ṭhapetvā satta āpattiyo satta āpattikkhandhe
avasesā āpattiyo catunnaṁ vipattīnaṁ na katamaṁ vipattiṁ bhajanti.
Sattannaṁ āpattikkhandhānaṁ na 1 katamena āpattikkhandhena saṅgahitā.
Channaṁ āpattisamuṭṭhānānaṁ na 1 katamena samuṭṭhānena samuṭṭhahanti.
Catunnaṁ adhikaraṇānaṁ na 1 katamaṁ adhikaraṇaṁ. Sattannaṁ samathānaṁ na
katamena samathena sammanti. Taṁ kissa hetu. Ṭhapetvā satta
āpattiyo satta āpattikkhandhe natthaññā āpattiyoti.
Adhikaraṇapaccayavāraṁ niṭṭhitaṁ pañcamaṁ.
Anantarapeyyālaṁ 2 niṭṭhitaṁ.
Tassuddānaṁ

[883] Katipucchā samuṭṭhānā katāpatti tatheva ca
samuṭṭhānā vipatti ca tathādhikaraṇena cāti.
1 Yu. tayo nasaddā natthi. 2 Yu. antarapeyyālaṁ.

[884] Vivādādhikaraṇassa kiṁ pubbaṅgamaṁ kati ṭhānāni kati vatthūni
kati bhūmiyo kati hetū kati mūlāni katīhākārehi vivadati
vivādādhikaraṇaṁ katīhi samathehi sammati. Anuvādādhikaraṇassa kiṁ
pubbaṅgamaṁ kati ṭhānāni kati vatthūni kati bhūmiyo kati
hetū kati mūlāni katīhākārehi anuvadati anuvādādhikaraṇaṁ
katīhi samathehi sammati. Āpattādhikaraṇassa kiṁ pubbaṅgamaṁ kati
ṭhānāni kati vatthūni kati bhūmiyo kati hetū kati mūlāni
katīhākārehi āpattiṁ āpajjati āpattādhikaraṇaṁ katīhi samathehi
sammati. Kiccādhikaraṇassa kiṁ pubbaṅgamaṁ kati ṭhānāni kati
vatthūni kati bhūmiyo kati hetū kati mūlāni katīhākārehi
kiccaṁ jāyati kiccādhikaraṇaṁ katīhi samathehi sammati.

[885] Vivādādhikaraṇassa kiṁ pubbaṅgamanti. Lobho pubbaṅgamo
doso pubbaṅgamo moho pubbaṅgamo alobho pubbaṅgamo
adoso pubbaṅgamo amoho pubbaṅgamo. Kati ṭhānānīti.
Aṭṭhārasa bhedakaravatthūni ṭhānāni. Kati vatthūnīti. Aṭṭhārasa
bhedakaravatthūni. Kati bhūmiyoti. Aṭṭhārasa bhedakaravatthūni bhūmiyo.
Kati hetūti. Nava hetū tayo kusalahetū tayo akusalahetū
tayo abyākatahetū. Kati mūlānīti. Dvādasa mūlāni.
Katīhākārehi vivadatīti. Dvīhākārehi vivadati dhammadiṭṭhi vā
adhammadiṭṭhi vā. Vivādādhikaraṇaṁ katīhi samathehi sammatīti.
Vivādādhikaraṇaṁ dvīhi samathehi sammati sammukhāvinayena ca
yebhuyyasikāya ca.

[886] Anuvādādhikaraṇassa kiṁ pubbaṅgamanti. Lobho pubbaṅgamo
doso pubbaṅgamo moho pubbaṅgamo alobho pubbaṅgamo
adoso pubbaṅgamo amoho pubbaṅgamo. Kati ṭhānānīti.
Catasso vipattiyo ṭhānāni. Kati vatthūnīti. Catasso vipattiyo
vatthūni. Kati bhūmiyoti. Catasso vipattiyo bhūmiyo. Kati
hetūti. Nava hetū tayo kusalahetū tayo akusalahetū tayo
abyākatahetū. Kati mūlānīti. Cuddasa mūlāni. Katīhākārehi
anuvadatīti. Dvīhākārehi anuvadati vatthuto vā āpattito vā.
Anuvādādhikaraṇaṁ katīhi samathehi sammatīti. Anuvādādhikaraṇaṁ catūhi
samathehi sammati sammukhāvinayena ca sativinayena ca amūḷhavinayena
ca tassapāpiyasikāya ca.

[887] Āpattādhikaraṇassa kiṁ pubbaṅgamanti. Lobho pubbaṅgamo
doso pubbaṅgamo moho pubbaṅgamo alobho pubbaṅgamo
adoso pubbaṅgamo amoho pubbaṅgamo. Kati ṭhānānīti.
Satta āpattikkhandhā ṭhānāni. Kati vatthūnīti. Satta āpattikkhandhā
vatthūni. Kati bhūmiyoti. Satta āpattikkhandhā bhūmiyo.
Kati hetūti. Nava hetū tayo kusalahetū tayo akusalahetū
tayo abyākatahetū 1 . Kati mūlānīti. Cha āpattisamuṭṭhānāni
1 Ma. cha hetū tayo akusalahetū tayo abyākatahetū.
Mūlāni. Katīhākārehi āpattiṁ āpajjatīti. Chahākārehi āpattiṁ
āpajjati alajjitā aññāṇatā kukkuccapakatatā 1 akappiye
kappiyasaññitā kappiye akapiyasaññitā satisammosā.
Āpattādhikaraṇaṁ katīhi samathehi sammatīti. Āpattādhikaraṇaṁ tīhi samathehi
sammati sammukhāvinayena ca paṭiññātakaraṇena ca [2]- tiṇavatthārakena ca.

[888] Kiccādhikaraṇassa kiṁ pubbaṅgamanti. Lobho pubbaṅgamo
doso pubbaṅgamo moho pubbaṅgamo alobho pubbaṅgamo
adoso pubbaṅgamo amoho pubbaṅgamo. Kati ṭhānānīti.
Cattāri kammāni ṭhānāni. Kati vatthūnīti. Cattāri kammāni
vatthūni. Kati bhūmiyoti. Cattāri kammāni bhūmiyo. Kati hetūti.
Nava hetū tayo kusalahetū tayo akusalahetū tayo abyākatahetū.
Kati mūlānīti. Ekaṁ mūlaṁ saṅgho. Katīhākārehi kiccaṁ jāyatīti.
Dvīhākārehi kiccaṁ jāyati ñattito vā apalokanato vā.
Kiccādhikaraṇaṁ katīhi samathehi sammatīti. Kiccādhikaraṇaṁ ekena
samathena sammati sammukhāvinayena.

[889] Kati samathāti 3 . Satta samathā sammukhāvinayo sativinayo
amūḷhavinayo paṭiññātakaraṇaṁ yebhuyyasikā tassapāpiyasikā
tiṇavatthārako ime satta samathā. Siyā ime satta samathā
dasa samathā honti dasa samathā satta samathā honti vatthuvasena
pariyāyena. Siyāti. Kathañca siyā. Vivādādhikaraṇassa dve
1 Yu. kukkuccapakatattā. 2 Ma. sammukhāvinayena ca. 3 Ma. Yu. itisaddo
natthi.
Samathā anuvādādhikaraṇassa cattāro samathā āpattādhikaraṇassa
tayo samathā kiccādhikaraṇassa eko samatho. Evaṁ ime satta
samathā dasa samathā honti dasa samathā satta samathā honti
vatthuvasena pariyāyena.
Pariyāyavāraṁ niṭṭhitaṁ chaṭṭhaṁ.