[750] Alantāva te ayye vuṭṭhāpitenāti vuccamānā sādhūti
paṭissuṇitvā pacchā khīyanadhammaṁ āpajjantī dve āpattiyo
āpajjati khīyati payoge dukkaṭaṁ khīyite āpatti pācittiyassa.

[751] Sikkhamānaṁ sace me tvaṁ ayye cīvaraṁ dassasi
evāhantaṁ vuṭṭhāpessāmīti vatvā neva vuṭṭhāpentī na vuṭṭhāpanāya
ussukkaṁ karontī ekaṁ āpattiṁ āpajjati pācittiyaṁ.

[752] Sikkhamānaṁ sace maṁ tvaṁ ayye dve vassāni
anubandhissasi evāhantaṁ vuṭṭhāpessāmīti vatvā neva vuṭṭhāpentī
na vuṭṭhāpanāya ussukkaṁ karontī ekaṁ āpattiṁ āpajjati pācittiyaṁ.

[753] Purisasaṁsaṭṭhaṁ kumārakasaṁsaṭṭhaṁ caṇḍiṁ sokāvassaṁ sikkhamānaṁ
vuṭṭhāpentī dve āpattiyo āpajjati vuṭṭhāpeti payoge
dukkaṭaṁ vuṭṭhāpite āpatti pācittiyassa.

[754] Mātāpitūhi vā sāmikena vā ananuññātaṁ sikkhamānaṁ
Vuṭṭhāpentī dve āpattiyo āpajjati vuṭṭhāpeti payoge
dukkaṭaṁ vuṭṭhāpite āpatti pācittiyassa.

[755] Pārivāsikacchandadānena sikkhamānaṁ vuṭṭhāpentī dve
āpattiyo āpajjati vuṭṭhāpeti payoge dukkaṭaṁ vuṭṭhāpite
āpatti pācittiyassa.

[756] Anuvassaṁ vuṭṭhāpentī dve āpattiyo āpajjati
vuṭṭhāpeti payoge dukkaṭaṁ vuṭṭhāpite āpatti pācittiyassa.

[757] Ekaṁ vassaṁ dve vuṭṭhāpentī dve āpattiyo
āpajjati vuṭṭhāpeti payoge dukkaṭaṁ vuṭṭhāpite āpatti
pācittiyassa.
Kumārībhūtavaggo aṭṭhamo.

[758] Chattupāhanaṁ dhārentī dve āpattiyo āpajjati
dhāreti payoge dukkaṭaṁ dhārite āpatti pācittiyassa.

[759] Yānena yāyantī dve āpattiyo āpajjati yāyati
payoge dukkaṭaṁ yāyite āpatti pācittiyassa.