[340] Uyyodhikaṁ gacchanto dve āpattiyo āpajjati gacchati
āpatti dukkaṭassa yattha ṭhito passati āpatti pācittiyassa.
Acelakavaggo pañcamo.

[341] Majjaṁ pivanto dve āpattiyo āpajjati pivissāmīti
paṭiggaṇhāti āpatti dukkaṭassa ajjhohāre ajjhohāre
āpatti pācittiyassa.

[342] Bhikkhuṁ aṅgulipatodakena hāsento dve āpattiyo
āpajjati hāseti payoge dukkaṭaṁ hāsite āpatti pācittiyassa.

[343] Udake kīḷanto dve āpattiyo āpajjati heṭṭhāgopphake
udake kīḷati āpatti dukkaṭassa uparigopphake udake
kīḷati āpatti pācittiyassa.

[344] Anādariyaṁ karonto dve āpattiyo āpajjati karoti
payoge dukkaṭaṁ kate āpatti pācittiyassa.

[345] Bhikkhuṁ bhiṁsāpento dve āpattiyo āpajjati bhiṁsāpeti
payoge dukkaṭaṁ bhiṁsāpite āpatti pācittiyassa.

[346] Jotiṁ samādahitvā visibbento dve āpattiyo āpajjati
Samādahati payoge dukkaṭaṁ samādahite āpatti pācittiyassa.

[347] Orenaḍḍhamāsaṁ nhāyanto dve āpattiyo āpajjati
nhāyati payoge dukkaṭaṁ nhānapariyosāne āpatti pācittiyassa.

[348] Anādayitvā tiṇṇaṁ dubbaṇṇakaraṇānaṁ aññataraṁ
dubbaṇṇakaraṇaṁ navaṁ cīvaraṁ paribhuñjanto dve āpattiyo āpajjati
paribhuñjati payoge dukkaṭaṁ paribhutte āpatti pācittiyassa.

[349] Bhikkhussa vā bhikkhuniyā vā sikkhamānāya vā sāmaṇerassa vā
sāmaṇeriyā vā sāmaṁ cīvaraṁ vikappetvā apaccuddhārakaṁ paribhuñjanto
dve āpattiyo āpajjati paribhuñjati payoge dukkaṭaṁ paribhutte
āpatti pācittiyassa.