[1417] Hetuyā pañca ārammaṇe dve avigate pañca.
Lokiyalokuttaradukatikasadisaṁ.
Sahajātavāropi pañhāvāropi vitthāretabbā.
Parāmāsavippayuttaparāmaṭṭhadukakusalattikaṁ niṭṭhitaṁ.
Parāmāsagocchakadukakusalattikaṁ niṭṭhitaṁ.
--------
Sārammaṇadukakusalattikaṁ
paṭiccavāro

[1418] Sārammaṇaṁ kusalaṁ dhammaṁ paṭicca sārammaṇo kusalo
dhammo uppajjati hetupaccayā:.
Yathā sappaccayaṁ kusalaṁ dhammaṁ paṭicca evaṁ vitthāretabbaṁ.
--------
Paṭiccavāro

[1419] Sārammaṇaṁ akusalaṁ dhammaṁ paṭicca sārammaṇo akusalo
dhammo uppajjati hetupaccayā:.
Yathā sappaccayaṁ akusalaṁ evaṁ kātabbaṁ.
-----------
Paṭiccavāro

[1420] Sārammaṇaṁ abyākataṁ dhammaṁ paṭicca sārammaṇo
abyākato dhammo uppajjati hetupaccayā: tīṇi. Anārammaṇaṁ
abyākataṁ dhammaṁ paṭicca anārammaṇo abyākato dhammo uppajjati
hetupaccayā: tīṇi. Sārammaṇaṁ abyākatañca anārammaṇaṁ
abyākatañca dhammaṁ paṭicca sārammaṇo abyākato dhammo uppajjati
hetupaccayā: tīṇi.

[1421] Hetuyā nava ārammaṇe tīṇi adhipatiyā pañca
.pe. Aññamaññe cha purejāte ekaṁ āsevane ekaṁ .pe.

[1422] Nahetuyā nava nāarammaṇe tīṇi nādhipatiyā
nava .pe. Nakamme dve navipāke pañca nāahāre ekaṁ
naindriye ekaṁ najhāne dve namagge nava nasampayutte tīṇi
navippayutte dve nonatthiyā dve novigate dve.
--------
Pañhāvāro

[1423] Sārammaṇo abyākato dhammo sārammaṇassa
abyākatassa dhammassa hetupaccayena paccayo: tīṇi.

[1424] Sārammaṇo abyākato dhammo sārammaṇassa
abyākatassa dhammassa ārammaṇapaccayena paccayo:. Anārammaṇo
abyākato dhammo sārammaṇassa abyākatassa dhammassa ārammaṇapaccayena
Paccayo: dve.

[1425] Sārammaṇo abyākato dhammo sārammaṇassa
abyākatassa dhammassa adhipatipaccayena paccayo: ārammaṇādhipati sahajātādhipati
tīṇi. Anārammaṇo abyākato dhammo sārammaṇassa
abyākatassa dhammassa adhipatipaccayena paccayo: ārammaṇādhipati.

[1426] Hetuyā tīṇi ārammaṇe dve adhipatiyā cattāri
anantare ekaṁ .pe. Sahajāte satta aññamaññe cha nissaye
satta upanissaye dve purejāte ekaṁ pacchājāte ekaṁ
āsevane ekaṁ kamme tīṇi vipāke tīṇi .pe. Sampayutte
ekaṁ vippayutte dve .pe.
Sārammaṇadukakusalattikaṁ niṭṭhitaṁ.
---------
Cittadukakusalattikaṁ
paṭiccavāro