[1744] Sammattaniyato dhammo sammattaniyatassa dhammassa
atthipaccayena paccayo tisso pañhā.

[1745] Aniyato dhammo aniyatassa dhammassa atthipaccayena
paccayo sahajātaṁ purejātaṁ pacchājātaṁ āhāraṁ indriyaṁ. Sahajāto:
aniyato eko khandho tiṇṇannaṁ khandhānaṁ cittasamuṭṭhānānañca
rūpānaṁ atthipaccayena paccayo dve khandhā ... Paṭisandhikkhaṇe
khandhā vatthussa atthipaccayena paccayo vatthu khandhānaṁ atthipaccayena
paccayo ekaṁ mahābhūtaṁ ... Asaññasattānaṁ ekaṁ
mahābhūtaṁ .... Purejātaṁ: cakkhuṁ ... Vatthuṁ aniccato dukkhato anattato
vipassati assādeti abhinandati taṁ ārabbha rāgo uppajjati
domanassaṁ uppajjati dibbena cakkhunā rūpaṁ passati dibbāya
sotadhātuyā saddaṁ suṇāti rūpāyatanaṁ cakkhuviññāṇassa phoṭṭhabbāyatanaṁ
kāyaviññāṇassa cakkhāyatanaṁ cakkhuviññāṇassa kāyāyatanaṁ
kāyaviññāṇassa vatthu aniyatānaṁ khandhānaṁ atthipaccayena
paccayo. Pacchājātā: aniyatā khandhā purejātassa imassa
kāyassa atthipaccayena paccayo. Kabaḷiṁkāro āhāro imassa
kāyassa atthipaccayena paccayo. Rūpajīvitindriyaṁ kaṭattārūpānaṁ
atthipaccayena paccayo.

[1746] Aniyato dhammo micchattaniyatassa dhammassa atthipaccayena
paccayo. Purejātaṁ: rūpajīvitindriyaṁ mātughātakammassa .pe.
Ruhiruppādakammassa atthipaccayena paccayo vatthu micchattaniyatānaṁ
khandhānaṁ atthipaccayena paccayo.

[1747] Aniyato dhammo sammattaniyatassa dhammassa atthipaccayena
paccayo. Purejātaṁ: vatthu sammattaniyatānaṁ khandhānaṁ
atthipaccayena paccayo.

[1748] Micchattaniyato ca aniyato ca dhammā micchattaniyatassa
dhammassa ... Sahajātaṁ purejātaṁ. Sahajāto: micchattaniyato eko
khandho ca vatthu ca tiṇṇannaṁ khandhānaṁ dve khandhā ca ....

[1749] Micchattaniyato ca aniyato ca dhammā aniyatassa
dhammassa ... Sahajātaṁ pacchājātaṁ āhāraṁ indriyaṁ. Sahajātā:
micchattaniyatā khandhā ca mahābhūtā ca cittasamuṭṭhānānaṁ rūpānaṁ
atthipaccayena paccayo. Pacchājātā: micchattaniyatā khandhā ca
kabaḷiṁkāro āhāro ca imassa kāyassa atthipaccayena paccayo.
Pacchājātā: micchattaniyatā khandhā ca rūpajīvitindriyañca kaṭattārūpānaṁ
atthipaccayena paccayo.

[1750] Sammattaniyato ca aniyato ca dhammā sammattaniyatassa
dhammassa atthipaccayena paccayo dve pañhā micchattaniyatasadisā.

[1751] Hetuyā satta ārammaṇe pañca adhipatiyā aṭṭha
anantare pañca samanantare pañca sahajāte nava aññamaññe
tīṇi nissaye terasa upanissaye satta purejāte tīṇi pacchājāte
tīṇi āsevane tīṇi kamme satta vipāke ekaṁ
āhāre satta indriye satta jhāne satta magge satta
Sampayutte tīṇi vippayutte pañca atthiyā terasa natthiyā
pañca vigate pañca avigate terasa. Evaṁ gaṇetabbaṁ.
Anulomaṁ.

[1752] Micchattaniyato dhammo micchattaniyatassa dhammassa
sahajātapaccayena paccayo upanissayapaccayena paccayo.

[1753] Micchattaniyato dhammo aniyatassa dhammassa ārammaṇapaccayena
paccayo sahajātapaccayena paccayo upanissayapaccayena
paccayo pacchājātapaccayena paccayo kammapaccayena paccayo.