[552] Akusalo dhammo abyākatassa dhammassa upanissayapaccayena
paccayo anantarūpanissayo pakatūpanissayo. Anantarūpanissayo:
akusalaṁ vuṭṭhānassa upanissayapaccayena paccayo. Pakatūpanissayo:
rāgaṁ upanissāya attānaṁ ātāpeti paritāpeti pariyiṭṭhimūlakaṁ
dukkhaṁ paccanubhoti dosaṁ ... Mohaṁ mānaṁ diṭṭhiṁ ... Patthanaṁ upanissāya
Attānaṁ ātāpeti paritāpeti pariyiṭṭhimūlakaṁ dukkhaṁ paccanubhoti.
Rāgo ... Doso moho māno diṭṭhi ... Patthanā kāyikassa sukhassa
kāyikassa dukkhassa phalasamāpattiyā upanissayapaccayena paccayo.
Akusalaṁ kammaṁ vipākassa upanissayapaccayena paccayo.

[553] Abyākato dhammo abyākatassa dhammassa
upanissayapaccayena paccayo ārammaṇūpanissayo anantarūpanissayo
pakatūpanissayo. Ārammaṇūpanissayo: arahā phalaṁ garuṁ katvā
paccavekkhati nibbānaṁ garuṁ katvā paccavekkhati nibbānaṁ phalassa
upanissayapaccayena paccayo. Anantarūpanissayo: purimā purimā
vipākābyākatā kiriyābyākatā khandhā pacchimānaṁ pacchimānaṁ
vipākābyākatānaṁ kiriyābyākatānaṁ khandhānaṁ upanissayapaccayena paccayo
bhavaṅgaṁ āvajjanāya kiriyaṁ vuṭṭhānassa arahato anulomaṁ phalasamāpattiyā
nirodhā vuṭṭhahantassa nevasaññānāsaññāyatanakiriyaṁ phalasamāpattiyā
upanissayapaccayena paccayo. Pakatūpanissayo: kāyikaṁ
sukhaṁ kāyikassa sukhassa kāyikassa dukkhassa phalasamāpattiyā
upanissayapaccayena paccayo kāyikaṁ dukkhaṁ kāyikassa sukhassa kāyikassa
dukkhassa phalasamāpattiyā upanissayapaccayena paccayo utu kāyikassa
sukhassa kāyikassa dukkhassa phalasamāpattiyā upanissayapaccayena
paccayo bhojanaṁ kāyikassa sukhassa kāyikassa dukkhassa phalasamāpattiyā
upanissayapaccayena paccayo senāsanaṁ kāyikassa sukhassa
Kāyikassa dukkhassa phalasamāpattiyā upanissayapaccayena paccayo
kāyikaṁ sukhaṁ ... Kāyikaṁ dukkhaṁ utu bhojanaṁ ... Senāsanaṁ kāyikassa
sukhassa kāyikassa dukkhassa phalasamāpattiyā upanissayapaccayena
paccayo phalasamāpattiyā kāyikassa sukhassa upanissayapaccayena paccayo
arahā kāyikaṁ sukhaṁ upanissāya anuppannaṁ kiriyasamāpattiṁ uppādeti
uppannaṁ samāpajjati saṅkhāre aniccato dukkhato anattato
vipassati kāyikaṁ dukkhaṁ ... Utuṁ bhojanaṁ ... Senāsanaṁ upanissāya
anuppannaṁ kiriyasamāpattiṁ uppādeti uppannaṁ samāpajjati saṅkhāre
aniccato dukkhato anattato vipassati.

[554] Abyākato dhammo kusalassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Ārammaṇūpanissayo: sekhā phalaṁ garuṁ katvā paccavekkhanti nibbānaṁ
garuṁ katvā paccavekkhanti nibbānaṁ gotrabhussa vodānassa maggassa
upanissayapaccayena paccayo. Anantarūpanissayo: āvajjanā
kusalānaṁ khandhānaṁ upanissayapaccayena paccayo. Pakatūpanissayo:
kāyikaṁ sukhaṁ upanissāya dānaṁ deti sīlaṁ samādiyati uposathakammaṁ
karoti jhānaṁ uppādeti vipassanaṁ uppādeti maggaṁ uppādeti
abhiññaṁ uppādeti samāpattiṁ uppādeti kāyikaṁ dukkhaṁ ... Utuṁ ...
Bhojanaṁ ... Senāsanaṁ upanissāya dānaṁ deti sīlaṁ samādiyati uposathakammaṁ
karoti jhānaṁ uppādeti vipassanaṁ uppādeti maggaṁ uppādeti
Abhiññaṁ uppādeti samāpattiṁ uppādeti kāyikaṁ sukhaṁ ... Kāyikaṁ
dukkhaṁ utu bhojanaṁ ... Senāsanaṁ saddhāya sīlassa sutassa cāgassa
paññāya upanissayapaccayena paccayo.

[555] Abyākato dhammo akusalassa dhammassa upanissayapaccayena
paccayo ārammaṇūpanissayo anantarūpanissayo pakatūpanissayo.
Ārammaṇūpanissayo: cakkhuṁ garuṁ katvā assādeti abhinandati taṁ
garuṁ katvā rāgo uppajjati diṭṭhi uppajjati sotaṁ ... Ghānaṁ
jivhaṁ kāyaṁ rūpe sadde gandhe rase phoṭṭhabbe ... Vatthuṁ vipākābyākate
kiriyābyākate khandhe garuṁ katvā assādeti abhinandati taṁ
garuṁ katvā rāgo uppajjati diṭṭhi uppajjati. Anantarūpanissayo:
āvajjanā akusalānaṁ khandhānaṁ upanissayapaccayena paccayo.
Pakatūpanissayo: kāyikaṁ sukhaṁ upanissāya pāṇaṁ hanati adinnaṁ
ādiyati musā bhaṇati pisuṇaṁ bhaṇati pharusaṁ bhaṇati samphaṁ palapati sandhiṁ
chindati nillopaṁ harati ekāgārikaṁ karoti paripanthe tiṭṭhati paradāraṁ
gacchati gāmaghātaṁ karoti nigamaghātaṁ karoti mātaraṁ jīvitā voropeti
pitaraṁ jīvitā voropeti arahantaṁ jīvitā voropeti duṭṭhena cittena
tathāgatassa lohitaṁ uppādeti saṅghaṁ bhindati kāyikaṁ dukkhaṁ ... Utuṁ ...
Bhojanaṁ ... Senāsanaṁ upanissāya pāṇaṁ hanati. Saṅkhittaṁ. Saṅghaṁ bhindati.
Kāyikaṁ sukhaṁ ... Kāyikaṁ dukkhaṁ utu bhojanaṁ ... Senāsanaṁ rāgassa dosassa
mohassa mānassa diṭṭhiyā patthanāya upanissayapaccayena paccayo.

[556] Abyākato dhammo abyākatassa dhammassa purejātapaccayena
paccayo ārammaṇapurejātaṁ vatthupurejātaṁ. Ārammaṇapurejātaṁ:
arahā cakkhuṁ aniccato dukkhato anattato vipassati sotaṁ ...
Ghānaṁ jivhaṁ kāyaṁ rūpe sadde gandhe rase phoṭṭhabbe ... Vatthuṁ
aniccato dukkhato anattato vipassati dibbena cakkhunā rūpaṁ passati
dibbāya sotadhātuyā saddaṁ suṇāti. Rūpāyatanaṁ cakkhuviññāṇassa
purejātapaccayena paccayo saddāyatanaṁ sotaviññāṇassa gandhāyatanaṁ
ghānaviññāṇassa rasāyatanaṁ jivhāviññāṇassa phoṭṭhabbāyatanaṁ
kāyaviññāṇassa purejātapaccayena paccayo. Vatthupurejātaṁ:
cakkhāyatanaṁ cakkhuviññāṇassa purejātapaccayena paccayo sotāyatanaṁ
sotaviññāṇassa ghānāyatanaṁ ghānaviññāṇassa jivhāyatanaṁ
jivhāviññāṇassa kāyāyatanaṁ kāyaviññāṇassa purejātapaccayena
paccayo vatthu vipākābyākatānaṁ kiriyābyākatānaṁ khandhānaṁ
purejātapaccayena paccayo.

[557] Abyākato dhammo kusalassa dhammassa purejātapaccayena
paccayo ārammaṇapurejātaṁ vatthupurejātaṁ. Ārammaṇapurejātaṁ:
sekkhā vā puthujjanā vā cakkhuṁ aniccato dukkhato anattato
vipassanti sotaṁ ... Ghānaṁ jivhaṁ kāyaṁ rūpe sadde gandhe rase
phoṭṭhabbe ... Vatthuṁ aniccato dukkhato anattato vipassanti
dibbena cakkhunā rūpaṁ passanti dibbāya sotadhātuyā saddaṁ suṇanti.
Vatthupurejātaṁ: vatthu kusalānaṁ khandhānaṁ purejātapaccayena paccayo.

[558] Abyākato dhammo akusalassa dhammassa purejātapaccayena
paccayo ārammaṇapurejātaṁ vatthupurejātaṁ. Ārammaṇapurejātaṁ:
cakkhuṁ assādeti abhinandati taṁ ārabbha rāgo uppajjati diṭṭhi
uppajjati vicikicchā uppajjati uddhaccaṁ uppajjati domanassaṁ
uppajjati sotaṁ ... Ghānaṁ jivhaṁ kāyaṁ rūpe sadde gandhe rase
phoṭṭhabbe ... Vatthuṁ assādeti abhinandati taṁ ārabbha rāgo
uppajjati diṭṭhi uppajjati vicikicchā uppajjati uddhaccaṁ uppajjati
domanassaṁ uppajjati. Vatthupurejātaṁ: vatthu akusalānaṁ khandhānaṁ
purejātapaccayena paccayo.

[559] Kusalo dhammo abyākatassa dhammassa pacchājātapaccayena
paccayo pacchājātā: kusalā khandhā purejātassa imassa kāyassa
pacchājātapaccayena paccayo.

[560] Akusalo dhammo abyākatassa dhammassa pacchājātapaccayena
paccayo pacchājātā: akusalā khandhā purejātassa
imassa kāyassa pacchājātapaccayena paccayo.

[561] Abyākato dhammo abyākatassa dhammassa pacchājātapaccayena
paccayo pacchājātā: vipākābyākatā kiriyābyākatā
khandhā purejātassa imassa kāyassa pacchājātapaccayena paccayo.