[12] Pacchājātapaccayoti pacchājātā cittacetasikā dhammā
purejātassa imassa kāyassa pacchājātapaccayena paccayoti.

[13] Āsevanapaccayoti purimā purimā kusalā dhammā pacchimānaṁ
pacchimānaṁ kusalānaṁ dhammānaṁ āsevanapaccayena paccayo purimā
purimā akusalā dhammā pacchimānaṁ pacchimānaṁ akusalānaṁ dhammānaṁ
āsevanapaccayena paccayo purimā purimā kiriyābyākatā dhammā
pacchimānaṁ pacchimānaṁ kiriyābyākatānaṁ dhammānaṁ āsevanapaccayena
paccayoti.

[14] Kammapaccayoti kusalākusalaṁ kammaṁ vipākānaṁ khandhānaṁ
kaṭattā ca rūpānaṁ kammapaccayena paccayo cetanāsampayuttakānaṁ
dhammānaṁ taṁsamuṭṭhānānañca rūpānaṁ kammapaccayena paccayoti.

[15] Vipākapaccayoti vipākā cattāro khandhā arūpino
aññamaññaṁ vipākapaccayena paccayoti.

[16] Āhārapaccayoti kabaḷiṅkāro āhāro imassa kāyassa
āhārapaccayena paccayo arūpino āhārā sampayuttakānaṁ dhammānaṁ
taṁsamuṭṭhānānañca rūpānaṁ āhārapaccayena paccayoti.

[17] Indriyapaccayoti cakkhundriyaṁ cakkhuviññāṇadhātuyā
taṁsampayuttakānañca dhammānaṁ indriyapaccayena paccayo sotindriyaṁ
sotaviññāṇadhātuyā taṁsampayuttakānañca dhammānaṁ indriyapaccayena
paccayo ghānindriyaṁ ghānaviññāṇadhātuyā taṁsampayuttakānañca
dhammānaṁ indriyapaccayena paccayo jivhindriyaṁ jivhāviññāṇadhātuyā
taṁsampayuttakānañca dhammānaṁ indriyapaccayena paccayo kāyindriyaṁ
kāyaviññāṇadhātuyā taṁsampayuttakānañca dhammānaṁ indriyapaccayena
paccayo rūpajīvitindriyaṁ kaṭattārūpānaṁ indriyapaccayena paccayo
arūpino indriyā sampayuttakānaṁ dhammānaṁ taṁsamuṭṭhānānañca rūpānaṁ
indriyapaccayena paccayoti.

[18] Jhānapaccayoti jhānaṅgāni jhānasampayuttakānaṁ dhammānaṁ
taṁsamuṭṭhānānañca rūpānaṁ jhānapaccayena paccayoti.

[19] Maggapaccayoti maggaṅgāni maggasampayuttakānaṁ dhammānaṁ
taṁsamuṭṭhānānañca rūpānaṁ maggapaccayena paccayoti.

[20] Sampayuttapaccayoti cattāro khandhā arūpino
aññamaññaṁ sampayuttapaccayena paccayoti.

[21] Vippayuttapaccayoti rūpino dhammā arūpīnaṁ dhammānaṁ
vippayuttapaccayena paccayo arūpino dhammā rūpīnaṁ dhammānaṁ
vippayuttapaccayena paccayoti.