[500] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati parimāṇāyo paṭicchannāyo.
So bhikkhu mūlāya paṭikassitabbo yathāpaṭicchannānañcassa āpattīnaṁ
purimāya āpattiyā samodhānaparivāso dātabbo.

[501] Idha pana bhikkhave bhikkhu abbhānāraho antarā sambahulā
Saṅghādisesā āpattiyo āpajjati parimāṇāyo paṭicchannāyopi
appaṭicchannāyopi. So bhikkhu mūlāya paṭikassitabbo
yathāpaṭicchannānañcassa āpattīnaṁ purimāya āpattiyā samodhānaparivāso
dātabbo.

[502] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati aparimāṇāyo appaṭicchannāyo.
So bhikkhu mūlāya paṭikassitabbo.

[503] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati aparimāṇāyo paṭicchannāyo.
So bhikkhu mūlāya paṭikassitabbo yathāpaṭicchannānañcassa āpattīnaṁ
purimāya āpattiyā samodhānaparivāso dātabbo.

[504] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati aparimāṇāyo paṭicchannāyopi
appaṭicchannāyopi. So bhikkhu mūlāya paṭikassitabbo yathāpaṭicchannānañcassa
āpattīnaṁ purimāya āpattiyā samodhānaparivāso
dātabbo.

[505] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati parimāṇāyopi aparimāṇāyopi
appaṭicchannāyo. So bhikkhu mūlāya paṭikassitabbo.

[506] Idha pana bhikkhave bhikkhu abbhānāraho antarā sambahulā
Saṅghādisesā āpattiyo āpajjati parimāṇāyopi aparimāṇāyopi
paṭicchannāyo. So bhikkhu mūlāya paṭikassitabbo yathāpaṭicchannānañcassa
āpattīnaṁ purimāya āpattiyā samodhānaparivāso dātabbo.

[507] Idha pana bhikkhave bhikkhu abbhānāraho antarā sambahulā
saṅghādisesā āpattiyo āpajjati parimāṇāyopi aparimāṇāyopi
paṭicchannāyopi appaṭicchannāyopi. So bhikkhu mūlāya paṭikassitabbo
yathāpaṭicchannānañcassa āpattīnaṁ purimāya āpattiyā
samodhānaparivāso dātabbo.
Chattiṁsakaṁ samattaṁ.

[508] Idha pana bhikkhave bhikkhu sambahulā saṅghādisesā āpattiyo
āpajjitvā appaṭicchādetvā vibbhamati. So puna 1 upasampanno
tā āpattiyo na chādeti. Tassa bhikkhave bhikkhuno mānattaṁ
dātabbaṁ.

[509] Idha pana bhikkhave bhikkhu sambahulā saṅghādisesā āpattiyo
āpajjitvā appaṭicchādetvā vibbhamati. So puna upasampanno
tā āpattiyo chādeti. Tassa bhikkhave bhikkhuno pacchimasmiṁ
āpattikkhandhe yathāpaṭicchanne parivāsaṁ datvā mānattaṁ dātabbaṁ.