[1107] Yassa somanassindriyaṁ uppajjati tassa saddhindriyaṁ .pe.
Paññindriyaṁ manindriyaṁ uppajjissatīti: somanassasampayuttapacchimacittassa
uppādakkhaṇe tesaṁ somanassindriyaṁ uppajjati no ca
tesaṁ manindriyaṁ uppajjissati itaresaṁ somanassena upapajjantānaṁ
pavatte somanassasampayuttacittassa uppādakkhaṇe tesaṁ somanassindriyañca
uppajjati manindriyañca uppajjissati. Yassa vā pana
manindriyaṁ uppajjissati tassa somanassindriyaṁ uppajjatīti: sabbesaṁ
cittassa bhaṅgakkhaṇe somanassavippayuttacittassa uppādakkhaṇe
nirodhasamāpannānaṁ asaññasattānaṁ tesaṁ manindriyaṁ uppajjissati
no ca tesaṁ somanassindriyaṁ uppajjati somanassena upapajjantānaṁ
pavatte somanassasampayuttacittassa uppādakkhaṇe tesaṁ manindriyañca
uppajjissati somanassindriyañca uppajjati.

[1108] Yassa upekkhindriyaṁ uppajjati tassa saddhindriyaṁ
uppajjissatīti: upekkhāsampayuttapacchimacittassa uppādakkhaṇe
tesaṁ upekkhindriyaṁ uppajjati no ca tesaṁ saddhindriyaṁ
Uppajjissati itaresaṁ upekkhāya upapajjantānaṁ pavatte
upekkhāsampayuttacittassa uppādakkhaṇe tesaṁ upekkhindriyañca uppajjati
saddhindriyañca uppajjissati. Yassa vā pana saddhindriyaṁ uppajjissati
tassa upekkhindriyaṁ uppajjatīti: sabbesaṁ cittassa bhaṅgakkhaṇe
upekkhāvippayuttacittassa uppādakkhaṇe nirodhasamāpannānaṁ
asaññasattānaṁ tesaṁ saddhindriyaṁ uppajjissati no ca tesaṁ upekkhindriyaṁ
uppajjati upekkhāya upapajjantānaṁ pavatte upekkhāsampayuttacittassa
uppādakkhaṇe tesaṁ saddhindriyañca uppajjissati
upekkhindriyañca uppajjati.

[1109] Yassa upekkhindriyaṁ uppajjati tassa paññindriyaṁ
.pe. Manindriyaṁ uppajjissatīti: upekkhāsampayuttapacchimacittassa
uppādakkhaṇe tesaṁ upekkhindriyaṁ uppajjati no ca tesaṁ manindriyaṁ
uppajjissati itaresaṁ upekkhāya upapajjantānaṁ pavatte upekkhā-
sampayuttacittassa uppādakkhaṇe tesaṁ upekkhindriyañca uppajjati
manindriyañca uppajjissati. Yassa vā pana manindriyaṁ uppajjissati
tassa upekkhindriyaṁ uppajjatīti: sabbesaṁ cittassa bhaṅgakkhaṇe
upekkhāvippayuttacittassa uppādakkhaṇe nirodhasamāpannānaṁ asaññasattānaṁ
tesaṁ manindriyaṁ uppajjissati no ca tesaṁ upekkhindriyaṁ
uppajjati upekkhāya upapajjantānaṁ pavatte upekkhāsampayuttacittassa
uppādakkhaṇe tesaṁ manindriyañca uppajjissati
Upekkhindriyañca uppajjati.

[1110] Yassa saddhindriyaṁ uppajjati tassa paññindriyaṁ .pe.
Manindriyaṁ uppajjissatīti: pacchimacittassa uppādakkhaṇe tesaṁ
saddhindriyaṁ uppajjati no ca tesaṁ manindriyaṁ uppajjissati itaresaṁ
sahetukānaṁ upapajjantānaṁ pavatte saddhāsampayuttacittassa uppādakkhaṇe
tesaṁ saddhindriyañca uppajjati manindriyañca uppajjissati.
Yassa vā pana manindriyaṁ uppajjissati tassa saddhindriyaṁ uppajjatīti:
sabbesaṁ cittassa bhaṅgakkhaṇe saddhāvippayuttacittassa uppādakkhaṇe
nirodhasamāpannānaṁ asaññasattānaṁ tesaṁ manindriyaṁ uppajjissati
no ca tesaṁ saddhindriyaṁ uppajjati sahetukānaṁ upapajjantānaṁ
pavatte saddhāsampayuttacittassa uppādakkhaṇe tesaṁ manindriyañca
uppajjissati saddhindriyañca uppajjati.

[1111] Yassa paññindriyaṁ uppajjati tassa manindriyaṁ
uppajjissatīti: pacchimacittassa uppādakkhaṇe tesaṁ paññindriyaṁ
uppajjati no ca tesaṁ manindriyaṁ uppajjissati itaresaṁ ñāṇasampayuttānaṁ
upapajjantānaṁ pavatte ñāṇasampayuttacittassa uppādakkhaṇe
tesaṁ paññindriyañca uppajjati manindriyañca uppajjissati.
Yassa vā pana manindriyaṁ uppajjissati tassa paññindriyaṁ
uppajjatīti: sabbesaṁ cittassa bhaṅgakkhaṇe ñāṇavippayuttacittassa
uppādakkhaṇe nirodhasamāpannānaṁ asaññasattānaṁ tesaṁ manindriyaṁ
Uppajjissati no ca tesaṁ paññindriyaṁ uppajjati ñāṇasampayuttānaṁ
upapajjantānaṁ pavatte ñāṇasampayuttacittassa uppādakkhaṇe
tesaṁ manindriyañca uppajjissati paññindriyañca uppajjati.

[1112] Yattha cakkhundriyaṁ uppajjati .pe.

[1113] Yassa yattha cakkhundriyaṁ uppajjati tassa tattha
sotindriyaṁ uppajjissatīti: pacchimabhavikānaṁ pañcavokāraṁ
upapajjantānaṁ tesaṁ tattha cakkhundriyaṁ uppajjati no ca tesaṁ tattha
sotindriyaṁ uppajjissati itaresaṁ sacakkhukānaṁ upapajjantānaṁ tesaṁ
tattha cakkhundriyañca uppajjati sotindriyañca uppajjissati.
Yassa vā pana yattha sotindriyaṁ uppajjissati tassa tattha cakkhundriyaṁ
uppajjatīti: pañcavokārā cavantānaṁ acakkhukānaṁ kāmāvacaraṁ
upapajjantānaṁ tesaṁ tattha sotindriyaṁ uppajjissati no ca tesaṁ
tattha cakkhundriyaṁ uppajjati sacakkhukānaṁ upapajjantānaṁ tesaṁ
tattha sotindriyañca uppajjissati cakkhundriyañca uppajjati.

[1114] Yassa yattha cakkhundriyaṁ uppajjati tassa tattha
ghānindriyaṁ uppajjissatīti: pacchimabhavikānaṁ kāmāvacaraṁ upapajjantānaṁ
rūpāvacaraṁ upapajjantānaṁ tesaṁ tattha cakkhundriyaṁ uppajjati no ca
tesaṁ tattha ghānindriyaṁ uppajjissati itaresaṁ sacakkhukānaṁ kāmāvacaraṁ
upapajjantānaṁ tesaṁ tattha cakkhundriyañca uppajjati ghānindriyañca
uppajjissati. Yassa vā pana yattha ghānindriyaṁ uppajjissati
Tassa tattha cakkhundriyaṁ uppajjatīti: kāmāvacarā cavantānaṁ
acakkhukānaṁ kāmāvacaraṁ upapajjantānaṁ tesaṁ tattha ghānindriyaṁ
uppajjissati no ca tesaṁ tattha cakkhundriyaṁ uppajjati sacakkhukānaṁ
kāmāvacaraṁ upapajjantānaṁ tesaṁ tattha ghānindriyañca uppajjissati
cakkhundriyañca uppajjati.

[1115] Yassa yattha cakkhundriyaṁ uppajjati tassa tattha itthindriyaṁ
uppajjissatīti: pacchimabhavikānaṁ kāmāvacaraṁ upapajjantānaṁ
rūpāvacaraṁ upapajjantānaṁ ye ca purisā eteneva bhāvena katici
bhave dassetvā parinibbāyissanti tesaṁ upapajjantānaṁ tesaṁ tattha
cakkhundriyaṁ uppajjati no ca tesaṁ tattha itthindriyaṁ uppajjissati
itaresaṁ sacakkhukānaṁ kāmāvacaraṁ upapajjantānaṁ tesaṁ tattha cakkhundriyañca
uppajjati itthindriyañca uppajjissati. Yassa vā pana
yattha itthindriyaṁ uppajjissati tassa tattha cakkhundriyaṁ uppajjatīti:
kāmāvacarā cavantānaṁ acakkhukānaṁ kāmāvacaraṁ upapajjantānaṁ tesaṁ
tattha itthindriyaṁ uppajjissati no ca tesaṁ tattha cakkhundriyaṁ
uppajjati sacakkhukānaṁ kāmāvacaraṁ upapajjantānaṁ tesaṁ tattha
itthindriyañca uppajjissati cakkhundriyañca uppajjati.

[1116] Yassa yattha cakkhundriyaṁ uppajjati tassa tattha purisindriyaṁ
uppajjissatīti: pacchimabhavikānaṁ kāmāvacaraṁ upapajjantānaṁ
rūpāvacaraṁ upapajjantānaṁ yā ca itthiyo eteneva bhāvena katici
Bhave dassetvā parinibbāyissanti tāsaṁ upapajjantīnaṁ tesaṁ tattha
cakkhundriyaṁ uppajjati no ca tesaṁ tattha purisindriyaṁ uppajjissati
itaresaṁ sacakkhukānaṁ kāmāvacaraṁ upapajjantānaṁ tesaṁ tattha cakkhundriyañca
uppajjati purisindriyañca uppajjissati. Yassa vā pana
yattha purisindriyaṁ uppajjissati tassa tattha cakkhundriyaṁ
uppajjatīti: kāmāvacarā cavantānaṁ acakkhukānaṁ kāmāvacaraṁ
upapajjantānaṁ tesaṁ tattha purisindriyaṁ uppajjissati no ca tesaṁ tattha
cakkhundriyaṁ uppajjati sacakkhukānaṁ kāmāvacaraṁ upapajjantānaṁ tesaṁ
tattha purisindriyañca uppajjissati cakkhundriyañca uppajjati.