[370] Abbhānārahena bhikkhave bhikkhunā sammā vattitabbaṁ.
Tatrāyaṁ sammāvattanā na upasampādetabbaṁ na nissayo
dātabbo na sāmaṇero upaṭṭhāpetabbo .pe. Yathā mūlāya
paṭikassanārahassa vattaṁ tathā mānattārahassa ca mānattacārikassa
ca abbhānārahassa ca tiṇṇaṁ ekasadisaṁ vitthāretabbaṁ .pe. Na
bhikkhū bhikkhūhi sampayojetabbaṁ.

[371] Na bhikkhave abbhānārahena bhikkhunā pakatattassa bhikkhuno
purato gantabbaṁ na purato nisīditabbaṁ yo hoti saṅghassa
āsanapariyanto seyyāpariyanto vihārapariyanto so tassa padātabbo
tena ca so sāditabbo. Na bhikkhave abbhānārahena
Bhikkhunā pakatattena bhikkhunā puresamaṇena vā pacchāsamaṇena vā
kulāni upasaṅkamitabbāni na āraññikaṅgaṁ samāditabbaṁ na
piṇḍapātikaṅgaṁ samāditabbaṁ na ca tappaccayā piṇḍapāto
nīharāpetabbo mā maṁ jāniṁsūti.

[372] Na bhikkhave abbhānārahena bhikkhunā sabhikkhukā āvāsā
abhikkhuko āvāso gantabbo aññatra pakatattena aññatra
antarāyā na bhikkhave abbhānārahena bhikkhunā sabhikkhukā āvāsā
abhikkhuko anāvāso gantabbo aññatra pakatattena aññatra
antarāyā yathā heṭṭhā tathā vitthāretabbaṁ. .pe. Gantabbo
bhikkhave abbhānārahena bhikkhunā sabhikkhukā āvāsā .pe. Anāvāsā .pe.
Āvāsā vā anāvāsā vā sabhikkhuko āvāso .pe. Sabhikkhuko
anāvāso .pe. Sabhikkhuko āvāso vā anāvāso vā yatthassu
bhikkhū samānasaṁvāsakā yaṁ jaññā sakkomi ajjeva gantunti.

[373] Na bhikkhave abbhānārahena bhikkhunā pakatattena bhikkhunā
saddhiṁ ekacchanne āvāse vatthabbaṁ na ekacchanne anāvāse
vatthabbaṁ na ekacchanne āvāse vā anāvāse vā vatthabbaṁ
pakatattaṁ bhikkhuṁ disvā āsanā vuṭṭhātabbaṁ pakatatto bhikkhu āsanena
nimantetabbo na pakatattena bhikkhunā saddhiṁ ekāsane nisīditabbaṁ
na nīce āsane nisinne ucce āsane nisīditabbaṁ na chamāyaṁ
nisinne āsane nisīditabbaṁ na ekacaṅkame caṅkamitabbaṁ na nīce
Caṅkame caṅkamante ucce caṅkame caṅkamitabbaṁ na chamāyaṁ caṅkamante
caṅkame caṅkamitabbaṁ.

[374] Na bhikkhave abbhānārahena bhikkhunā pārivāsikena bhikkhunā
saddhiṁ .pe. Mūlāya paṭikassanārahena bhikkhunā saddhiṁ .pe.
Mānattārahena bhikkhunā saddhiṁ .pe. Mānattacārikena bhikkhunā
saddhiṁ .pe. Abbhānārahena vuḍḍhatarena bhikkhunā saddhiṁ ekacchanne
āvāse vatthabbaṁ na ekacchanne anāvāse vatthabbaṁ na
ekacchanne āvāse vā anāvāse vā vatthabbaṁ na ekāsane
nisīditabbaṁ na nīce āsane nisinne ucce āsane nisīditabbaṁ
na chamāyaṁ nisinne āsane nisīditabbaṁ na ekacaṅkame caṅkamitabbaṁ
na nīce caṅkame caṅkamante ucce caṅkame caṅkamitabbaṁ na chamāyaṁ
caṅkamante caṅkame caṅkamitabbaṁ.

[375] Abbhānārahacatuttho ce bhikkhave parivāsaṁ dadeyya
mūlāya paṭikasseyya mānattaṁ dadeyya tabbīso abbheyya akammaṁ
taṁ na ca karaṇīyanti.
Abbhānārahavattaṁ niṭṭhitaṁ 1 .
Pārivāsikakkhandhakaṁ niṭṭhitaṁ dutiyaṁ 2 .
Imasmiṁ khandhake vatthū 3 pañca.
----------------------
1 Yu. abbhānārahavattaṁ niṭṭhitanti natthi. 2 Ma. pārivāsikakkhandhako dutiyo.
3 Yu. vatthu.
Tassuddānaṁ

[376] Pārivāsikā sādiyanti pakatattānaṁ bhikkhūnaṁ 1
abhivādanaṁ paccuṭṭhānaṁ añjaliñceva sāmiciṁ
āsanaṁ 2 seyyābhihāraṁ pādodakaṁ pādapīṭhaṁ
pādakathalikaṁ pattacīvarapaṭiggāhaṇaṁ
nahāne piṭṭhiparikammaṁ ujjhāyanteva pesalā 3 .
Dukkaṭaṁ sādiyantassa mithu pañca yathāvuḍḍhaṁ 4
uposathaṁ pavāraṇaṁ vassikañcāvaṇojanaṁ
bhattaṁ 5 sammā pavattanā pakatattena gacchare 6
yo ca hoti pariyanto na pure pacchā samaṇena 7
araññaṁ piṇḍanīhāro 8 āgantuke uposathe 9
pavāraṇā ca dūtena gantabbo ca sabhikkhuko 10
1 Ma. pārivāsikā sādenti pakatattāna bhikkhunaṁ. Yu. pārivāsikā sādenti pakatattena
bhikkhunā. 2 Ma. abhivādanaṁ paccuṭṭhānaṁ añjaliṁ ca sāmiciyaṁ āsanaṁ. Yu. abhivādanaṁ
paccuṭṭhānaṁ añjalisāmiyaṁ āsanaṁ. 3 ma seyyābhihāraṁ pādo pīṭhaṁ kathalikaṁ ....
Yu. seyyābhihāraṁ pādodakaṁ pādapīṭhaṁ pādakathalikaṁ pattaṁ nahāne parikammaṁ ujjhāyanti
ca pesalā. 4 Yu. pañca punāpare. 5 Ma. Yu. vassikoṇojabhojanaṁ. 6 Ma. Yu.
sammā ca vattanā tattha pakatattassa gacchanaṁ. 7 Ma. Yu. yo ca hoti pariyanto
pure pacchā tatheva ca. 8 Ma. āraññapiṇḍanīhāro. Yu. araññapiṇḍanihāro.
9 Yu. uposathaṁ. 10 Yu. pavāraṇā ca dūto ca gantabbañca sabhikjuke.
Ekacchanne na vatthabbaṁ na chamāyaṁ nisajjite 1
āsane nīce caṅkame 2 chamāyaṁ caṅkame na ca
vuḍḍhatarena akammaṁ ratticchedā 3 ca sodhanā
nikkhipanaṁ samādānaṁ ñātabbaṁ pārivāsikā 4
mūlāya mānattārahā tathā mānattacārikā
abbhānārahakā cāpi sambhedanayato puna 5 .
Pārivāsikānaṁ 6 tayo catumānattacārike
na samenti ratticchedā 7 mānattesu ca divāsikaṁ 8 .
Dve kammā sadisā sesā tayo kammā samānatāti 9 .
1 Ma. Yu. ekacchanne ca vuṭṭhānaṁ tatheva ca nimantaye. 2 Yu. nīcacaṅkame.
3 Ma. Yu. ratticchedo. 4 Ma. vattaṁ va parivāsike. Yu. ratti vā pārivāsike.
5 Ma. abbhānārahena yo cāpi sambhedaṁ nayato puna. Yu. abbhānāraho yo cāpi
sambhedaṁ nayato puna. 6 Ma. Yu. pārivāsikesu. 7 Ma. Yu. samanti racticchedesu.
8 Ma. Yu. devasi. 9 Ma. Yu. samāsamāti.
Samuccayakkhandhakaṁ

[377] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
udāyi 1 ekaṁ āpattiṁ āpanno hoti sañcetanikaṁ sukkavisaṭṭhiṁ
appaṭicchannaṁ. So bhikkhūnaṁ ārocesi ahaṁ āvuso ekaṁ
āpattiṁ āpajjiṁ sañcetanikaṁ sukkavisaṭṭhiṁ appaṭicchannaṁ kathaṁ nu kho
mayā paṭipajjitabbanti. Te bhikkhū bhagavato etamatthaṁ ārocesuṁ.
Tenahi bhikkhave saṅgho udāyissa bhikkhuno ekissā āpattiyā
sañcetanikāya sukkavisaṭṭhiyā appaṭicchannāya chārattaṁ mānattaṁ detu.

[378] Evañca pana bhikkhave dātabbaṁ. Tena bhikkhave udāyinā
bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā vuḍḍhānaṁ
bhikkhūnaṁ pāde vanditvā ukkuṭikaṁ nisīditvā añjaliṁ paggahetvā
evamassa vacanīyo ahaṁ bhante ekaṁ āpattiṁ āpajjiṁ sañcetanikaṁ
sukkavisaṭṭhiṁ appaṭicchannaṁ sohaṁ bhante saṅghaṁ ekissā āpattiyā
sañcetanikāya sukkavisaṭṭhiyā appaṭicchannāya chārattaṁ mānattaṁ
yācāmi. Ahaṁ bhante ekaṁ āpattiṁ āpajjiṁ sañcetanikaṁ
sukkavisaṭṭhiṁ appaṭicchannaṁ dutiyampi sohaṁ bhante 2 saṅghaṁ ekissā
1 Ma. sabbavāre udāyī. 2 Ma. Yu. dutiyampi bhante.
Āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ yācāmi. Ahaṁ bhante ekaṁ āpattiṁ āpajjiṁ sañcetanikaṁ
sukkavisaṭṭhiṁ appaṭicchannaṁ tatiyampi sohaṁ bhante 1 saṅghaṁ ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ yācāmīti.

[379] Byattena bhikkhunā paṭibalena saṅgho ñāpetabbo
suṇātu me bhante saṅgho ayaṁ udāyi bhikkhu ekaṁ āpattiṁ
āpajji sañcetanikaṁ sukkavisaṭṭhiṁ appaṭicchannaṁ so saṅghaṁ ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ yācati. Yadi saṅghassa pattakallaṁ saṅgho udāyissa
bhikkhuno ekissā āpattiyā sañcetanikāya sukkavisaṭṭhiyā appaṭicchannāya
chārattaṁ mānattaṁ dadeyya. Esā ñatti. Suṇātu me
bhante saṅgho ayaṁ udāyi bhikkhu ekaṁ āpattiṁ āpajji sañcetanikaṁ
sukkavisaṭṭhiṁ appaṭicchannaṁ so saṅghaṁ ekissā āpattiyā
sañcetanikāya sukkavisaṭṭhiyā appaṭicchannāya chārattaṁ mānattaṁ yācati.
Saṅgho udāyissa bhikkhuno ekissā āpattiyā sañcetanikāya
sukkavisaṭṭhiyā appaṭicchannāya chārattaṁ mānattaṁ deti. Yassāyasmato
khamati udāyissa bhikkhuno ekissā āpattiyā sañcetanikāya
sukkavisaṭṭhiyā appaṭicchannāya chārattaṁ mānattassa dānaṁ so
1 Ma. Yu. tatiyampi bhante.
Tuṇhassa yassa nakkhamati so bhāseyya. Dutiyampi etamatthaṁ
vadāmi. Suṇātu me bhante saṅgho ayaṁ udāyi bhikkhu ekaṁ
āpattiṁ āpajji sañcetanikaṁ sukkavisaṭṭhiṁ appaṭicchannaṁ so saṅghaṁ
ekissā āpattiyā sañcetanikāya sukkavisaṭṭhiyā appaṭicchannāya
chārattaṁ mānattaṁ yācati. Saṅgho udāyissa bhikkhuno ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattaṁ deti. Yassāyasmato khamati udāyissa bhikkhuno ekissā
āpattiyā sañcetanikāya sukkavisaṭṭhiyā appaṭicchannāya chārattaṁ
mānattassa dānaṁ so tuṇhassa yassa nakkhamati so bhāseyya.
Tatiyampi etamatthaṁ vadāmi. Suṇātu me bhante saṅgho ayaṁ
udāyi bhikkhu ekaṁ āpattiṁ āpajji sañcetanikaṁ sukkavisaṭṭhiṁ
appaṭicchannaṁ so saṅghaṁ ekissā āpattiyā sañcetanikāya
sukkavisaṭṭhiyā appaṭicchannāya chārattaṁ mānattaṁ yācati. Saṅgho
udāyissa bhikkhuno ekissā āpattiyā sañcetanikāya sukkavisaṭṭhiyā
appaṭicchannāya chārattaṁ mānattaṁ deti. Yassāyasmato khamati
udāyissa bhikkhuno ekissā āpattiyā sañcetanikāya sukkavisaṭṭhiyā
appaṭicchannāya chārattaṁ mānattassa dānaṁ so tuṇhassa yassa
nakkhamati so bhāseyya. Dinnaṁ saṅghena udāyissa bhikkhuno
ekissā āpattiyā sañcetanikāya sukkavisaṭṭhiyā appaṭicchannāya
chārattaṁ mānattaṁ khamati saṅghassa tasmā tuṇhī. Evametaṁ
Dhārayāmīti.