[1119] Yattha kāyasaṅkhāro nirujjhati tattha vacīsaṅkhāro
nirujjhatīti: dutiyajjhāne tatiyajjhāne tattha kāyasaṅkhāro nirujjhati
no ca tattha vacīsaṅkhāro nirujjhati .pe.

[1120] Yassa yattha kāyasaṅkhāro nirujjhati tassa tattha vacīsaṅkhāro
nirujjhatīti: .pe. Yassakampi yassayatthakampi sadisaṁ.

[1121] Yassa kāyasaṅkhāro na nirujjhati tassa vacīsaṅkhāro na
nirujjhatīti: vinā assāsapassāsehi vitakkavicārānaṁ bhaṅgakkhaṇe
tesaṁ kāyasaṅkhāro na nirujjhati no ca tesaṁ vacīsaṅkhāro na nirujjhati
sabbesaṁ cittassa uppādakkhaṇe vinā assāsapassāsehi
avitakkāvicāracittassa bhaṅgakkhaṇe nirodhasamāpannānaṁ asaññasattānaṁ tesaṁ
kāyasaṅkhāro ca na nirujjhati vacīsaṅkhāro ca na nirujjhati. Yassa
vā pana vacīsaṅkhāro na nirujjhati tassa kāyasaṅkhāro na nirujjhatīti:
vinā vitakkavicārehi assāsapassāsānaṁ bhaṅgakkhaṇe tesaṁ vacīsaṅkhāro
na nirujjhati no ca tesaṁ kāyasaṅkhāro na nirujjhati sabbesaṁ cittassa
uppādakkhaṇe vinā assāsapassāsehi avitakkāvicāracittassa
bhaṅgakkhaṇe nirodhasamāpannānaṁ asaññasattānaṁ tesaṁ vacīsaṅkhāro ca
na nirujjhati kāyasaṅkhāro ca na nirujjhati.

[1122] Yassa kāyasaṅkhāro na nirujjhati tassa cittasaṅkhāro
na nirujjhatīti: vinā assāsapassāsehi cittassa bhaṅgakkhaṇe tesaṁ
kāyasaṅkhāro na nirujjhati no ca tesaṁ cittasaṅkhāro na nirujjhati
sabbesaṁ cittassa uppādakkhaṇe nirodhasamāpannānaṁ asaññasattānaṁ
tesaṁ kāyasaṅkhāro ca na nirujjhati cittasaṅkhāro ca na nirujjhati.
Yassa vā pana cittasaṅkhāro na nirujjhati tassa kāyasaṅkhāro na nirujjhatīti:
āmantā.

[1123] Yassa vacīsaṅkhāro na nirujjhati tassa cittasaṅkhāro na nirujjhatīti:
Vinā vitakkavicārehi cittassa bhaṅgakkhaṇe tesaṁ vacīsaṅkhāro
na nirujjhati no ca tesaṁ cittasaṅkhāro na nirujjhati sabbesaṁ cittassa
uppādakkhaṇe nirodhasamāpannānaṁ asaññasattānaṁ tesaṁ vacīsaṅkhāro ca
na nirujjhati cittasaṅkhāro ca na nirujjhati. Yassa vā pana cittasaṅkhāro
na nirujjhati tassa vacīsaṅkhāro na nirujjhatīti: āmantā.

[1124] Yattha kāyasaṅkhāro na nirujjhati .pe.

[1125] Yassa yattha kāyasaṅkhāro na nirujjhati tassa tattha
vacīsaṅkhāro na nirujjhatīti: vinā assāsapassāsehi vitakkavicārānaṁ
bhaṅgakkhaṇe tesaṁ tattha kāyasaṅkhāro na nirujjhati no ca tesaṁ tattha
vacīsaṅkhāro na nirujjhati sabbesaṁ cittassa uppādakkhaṇe vinā
assāsapassāsehi avitakkāvicāracittassa bhaṅgakkhaṇe asaññasattānaṁ
tesaṁ tattha kāyasaṅkhāro ca na nirujjhati vacīsaṅkhāro ca na nirujjhati.
Yassa vā pana yattha vacīsaṅkhāro .pe. Yassakampi yassayatthakampi
sadisaṁ vitthāretabbaṁ. Yassayatthake nirodhasamāpannānanti na kātabbaṁ.
--------

[1126] Yassa kāyasaṅkhāro nirujjhittha tassa vacīsaṅkhāro
nirujjhitthāti: āmantā. Yassa vā pana vacīsaṅkhāro .pe. Yathā
uppādavāre atītā pucchā yassakampi yassayatthakampi anulomampi
paccaniyampi vibhattaṁ evaṁ nirodhavārepi vibhajitabbaṁ. Natthi nānākaraṇaṁ.
--------

[1127] Yassa kāyasaṅkhāro nirujjhissati tassa vacīsaṅkhāro
nirujjhissatīti: āmantā. Yassa vā pana vacīsaṅkhāro nirujjhissati
tassa kāyasaṅkhāro nirujjhissatīti: kāmāvacarānaṁ pacchimacittassa
uppādakkhaṇe yassa cittassa anantarā kāmāvacarānaṁ
pacchimacittaṁ uppajjissati rūpāvacare arūpāvacare pacchimabhavikānaṁ ye ca
rūpāvacaraṁ arūpāvacaraṁ upapajjitvā parinibbāyissanti tesaṁ cavantānaṁ
tesaṁ vacīsaṅkhāro nirujjhissati no ca tesaṁ kāyasaṅkhāro nirujjhissati
itaresaṁ tesaṁ vacīsaṅkhāro ca nirujjhissati kāyasaṅkhāro ca
nirujjhissati.

[1128] Yassa kāyasaṅkhāro nirujjhissati tassa cittasaṅkhāro
nirujjhissatīti: āmantā. Yassa vā pana cittasaṅkhāro nirujjhissati
tassa kāyasaṅkhāro nirujjhissatīti: kāmāvacarānaṁ pacchimacittassa
uppādakkhaṇe yassa cittassa anantarā kāmāvacarānaṁ
pacchimacittaṁ uppajjissati rūpāvacare arūpāvacare pacchimabhavikānaṁ
ye ca rūpāvacaraṁ arūpāvacaraṁ upapajjitvā parinibbāyissanti tesaṁ
cavantānaṁ tesaṁ cittasaṅkhāro nirujjhissati no ca tesaṁ kāyasaṅkhāro
nirujjhissati itaresaṁ cittasaṅkhāro ca nirujjhissati kāyasaṅkhāro ca
nirujjhissati.