[989] Yassa yattha dukkhasaccaṁ nuppajjati .pe. Yassakampi yassayatthakampi
sadisaṁ. Yassayatthakepi nirodhasamāpannānanti na kātabbaṁ.
--------

[990] Yassa dukkhasaccaṁ nuppajjittha tassa samudayasaccaṁ nirujjhitthāti:
āmantā. Yassa vā pana samudayasaccaṁ .pe. Āmantā.
Atītā pucchā yathā uppādavāre vibhattā evaṁ uppādanirodhepi
anulomampi paccaniyampi vibhajitabbaṁ.
---------

[991] Yassa dukkhasaccaṁ uppajjissati tassa samudayasaccaṁ nirujjhissatīti:
aggamaggasamaṅgīnaṁ arahantānaṁ yassa cittassa anantarā
aggamaggaṁ paṭilabhissanti tesaṁ dukkhasaccaṁ uppajjissati no ca tesaṁ
samudayasaccaṁ nirujjhissati itaresaṁ tesaṁ dukkhasaccañca uppajjissati
samudayasaccañca nirujjhissati. Yassa vā pana samudayasaccaṁ
.pe. Āmantā.

[992] Yassa dukkhasaccaṁ uppajjissati tassa maggasaccaṁ
nirujjhissatīti: aggamaggassa bhaṅgakkhaṇe arahantānaṁ ye ca puthujjanā
maggaṁ na paṭilabhissanti tesaṁ dukkhasaccaṁ uppajjissati no ca tesaṁ
maggasaccaṁ nirujjhissati aggamaggassa uppādakkhaṇe yassa cittassa
anantarā aggamaggaṁ paṭilabhissanti ye caññe maggaṁ paṭilabhissanti
tesaṁ dukkhasaccañca uppajjissati maggasaccañca nirujjhissati. Yassa
vā pana maggasaccaṁ .pe. Āmantā.

[993] Yassa samudayasaccaṁ uppajjissati tassa maggasaccaṁ
nirujjhissatīti: ye puthujjanā maggaṁ na paṭilabhissanti tesaṁ samudayasaccaṁ
uppajjissati no ca tesaṁ maggasaccaṁ nirujjhissati ye maggaṁ paṭilabhissanti
tesaṁ samudayasaccañca uppajjissati maggasaccañca nirujjhissati.
Yassa vā pana maggasaccaṁ nirujjhissati tassa samudayasaccaṁ uppajjissatīti:
aggamaggassa uppādakkhaṇe yassa cittassa anantarā
aggamaggaṁ paṭilabhissanti tesaṁ maggasaccaṁ nirujjhissati no ca tesaṁ
samudayasaccaṁ uppajjissati ye maggaṁ paṭilabhissanti tesaṁ maggasaccañca
nirujjhissati samudayasaccañca uppajjissati.

[994] Yattha dukkhasaccaṁ uppajjissati .pe.

[995] Yassa yattha dukkhasaccaṁ uppajjissati tassa tattha
samudayasaccaṁ nirujjhissatīti: aggamaggasamaṅgīnaṁ arahantānaṁ yassa
cittassa anantarā aggamaggaṁ paṭilabhissanti asaññasattānaṁ tesaṁ
Tattha dukkhasaccaṁ uppajjissati no ca tesaṁ tattha samudayasaccaṁ
nirujjhissati itaresaṁ catuvokārānaṁ pañcavokārānaṁ tesaṁ tattha
dukkhasaccañca uppajjissati samudayasaccañca nirujjhissati. Yassakampi
yassayatthakampi sadisaṁ.

[996] Yassa dukkhasaccaṁ nuppajjissati tassa samudayasaccaṁ na
nirujjhissatīti: āmantā. Yassa vā pana samudayasaccaṁ na nirujjhissati
tassa dukkhasaccaṁ nuppajjissatīti: aggamaggasamaṅgīnaṁ arahantānaṁ yassa
cittassa anantarā aggamaggaṁ paṭilabhissanti tesaṁ samudayasaccaṁ na
nirujjhissati no ca tesaṁ dukkhasaccaṁ nuppajjissati pacchimacittasamaṅgīnaṁ
tesaṁ samudayasaccañca na nirujjhissati dukkhasaccañca nuppajjissati.

[997] Yassa dukkhasaccaṁ nuppajjissati tassa maggasaccaṁ na
nirujjhissatīti: āmantā. Yassa vā pana maggasaccaṁ na nirujjhissati
tassa dukkhasaccaṁ nuppajjissatīti: aggamaggassa bhaṅgakkhaṇe arahantānaṁ
ye ca puthujjanā maggaṁ na paṭilabhissanti tesaṁ maggasaccaṁ na nirujjhissati
no ca tesaṁ dukkhasaccaṁ nuppajjissati pacchimacittasamaṅgīnaṁ tesaṁ
maggasaccañca na nirujjhissati dukkhasaccañca nuppajjissati.

[998] Yassa samudayasaccaṁ nuppajjissati tassa maggasaccaṁ na
nirujjhissatīti: aggamaggassa uppādakkhaṇe yassa cittassa anantarā
aggamaggaṁ paṭilabhissanti tesaṁ samudayasaccaṁ nuppajjissati no ca tesaṁ
maggasaccaṁ na nirujjhissati aggamaggassa bhaṅgakkhaṇe arahantānaṁ tesaṁ
Samudayasaccañca nuppajjissati maggasaccañca na nirujjhissati. Yassa
vā pana maggasaccaṁ na nirujjhissati tassa samudayasaccaṁ nuppajjissatīti:
ye puthujjanā maggaṁ na paṭilabhissanti tesaṁ maggasaccaṁ na nirujjhissati no ca
tesaṁ samudayasaccaṁ nuppajjissati aggamaggassa bhaṅgakkhaṇe arahantānaṁ
tesaṁ maggasaccañca na nirujjhissati samudayasaccañca nuppajjissati.