[849] Yassa dukkhasaccaṁ uppajjittha tassa samudayasaccaṁ uppajjitthāti:
āmantā. Yassa vā pana samudayasaccaṁ uppajjittha tassa
dukkhasaccaṁ uppajjitthāti: āmantā.

[850] Yassa dukkhasaccaṁ uppajjittha tassa maggasaccaṁ uppajjitthāti:
anabhisametāvīnaṁ tesaṁ dukkhasaccaṁ uppajjittha no ca tesaṁ maggasaccaṁ
Uppajjittha abhisametāvīnaṁ tesaṁ dukkhasaccañca uppajjittha maggasaccañca
uppajjittha. Yassa vā pana maggasaccaṁ .pe. Āmantā.

[851] Yassa samudayasaccaṁ uppajjittha tassa maggasaccaṁ uppajjitthāti:
anabhisametāvīnaṁ tesaṁ samudayasaccaṁ uppajjittha no ca tesaṁ
maggasaccaṁ uppajjittha abhisametāvīnaṁ tesaṁ samudayasaccañca uppajjittha
maggasaccañca uppajjittha. Yassa vā pana maggasaccaṁ .pe. Āmantā.

[852] Yattha dukkhasaccaṁ uppajjittha .pe. Yatthakampi sabbattha
sadisaṁ tantinānākaraṇaṁ heṭṭhāyatthakasadisaṁ.

[853] Yassa yattha dukkhasaccaṁ uppajjittha tassa tattha samudayasaccaṁ
uppajjitthāti: suddhāvāsānaṁ dutiye citte vattamāne asaññasattānaṁ
tesaṁ tattha dukkhasaccaṁ uppajjittha no ca tesaṁ tattha samudayasaccaṁ
uppajjittha itaresaṁ catuvokārānaṁ pañcavokārānaṁ tesaṁ tattha
dukkhasaccañca uppajjittha samudayasaccañca uppajjittha. Yassa vā pana
yattha samudayasaccaṁ .pe. Āmantā.

[854] Yassa yattha dukkhasaccaṁ uppajjittha tassa tattha maggasaccaṁ
uppajjitthāti: suddhāvāsānaṁ dutiye citte vattamāne anabhisametāvīnaṁ
asaññasattānaṁ tesaṁ tattha dukkhasaccaṁ uppajjittha no ca tesaṁ tattha
maggasaccaṁ uppajjittha abhisametāvīnaṁ tesaṁ tattha dukkhasaccañca uppajjittha
maggasaccañca uppajjittha. Yassa vā pana yattha maggasaccaṁ
.pe. Āmantā.

[855] Yassa yattha samudayasaccaṁ uppajjittha tassa tattha maggasaccaṁ
uppajjitthāti: suddhāvāsānaṁ dutiye akusale citte vattamāne
anabhisametāvīnaṁ tesaṁ tattha samudayasaccaṁ uppajjittha no ca tesaṁ tattha
maggasaccaṁ uppajjittha abhisametāvīnaṁ tesaṁ tattha samudayasaccañca
uppajjittha maggasaccañca uppajjittha. Yassa vā pana yattha maggasaccaṁ
.pe. Āmantā.

[856] Yassa dukkhasaccaṁ nuppajjittha tassa samudayasaccaṁ nuppajjitthāti:
natthi. Yassa vā pana samudayasaccaṁ .pe. Natthi.

[857] Yassa dukkhasaccaṁ nuppajjittha tassa maggasaccaṁ nuppajjitthāti:
natthi. Yassa vā pana maggasaccaṁ nuppajjittha tassa dukkhasaccaṁ nuppajjitthāti:
uppajjittha.

[858] Yassa samudayasaccaṁ nuppajjittha tassa maggasaccaṁ
nuppajjitthāti: natthi. Yassa vā pana maggasaccaṁ nuppajjittha tassa
samudayasaccaṁ nuppajjitthāti: uppajjittha.