[1227] Atthi tattha cakkhāyatanaṁ atthi rūpāyatanaṁ tena
cakkhunā taṁ rūpaṁ passatīti. Āmantā. Atthi tattha ghānāyatanaṁ
atthi gandhāyatanaṁ tena ghānena taṁ gandhaṁ ghāyatīti. Na hevaṁ
vattabbe .pe. Atthi tattha cakkhāyatanaṁ atthi rūpāyatanaṁ tena
cakkhunā taṁ rūpaṁ passatīti. Āmantā. Atthi tattha jivhāyatanaṁ
atthi rasāyatanaṁ tāya jivhāya taṁ rasaṁ sāyati .pe. Atthi tattha
kāyāyatanaṁ atthi phoṭṭhabbāyatanaṁ tena kāyena taṁ phoṭṭhabbaṁ
phusatīti na hevaṁ vattabbe .pe.

[1228] Atthi tattha sotāyatanaṁ atthi saddāyatanaṁ .pe.
Atthi tattha manāyatanaṁ atthi dhammāyatanaṁ tena manena taṁ dhammaṁ
vijānātīti. Āmantā. Atthi tattha ghānāyatanaṁ atthi gandhāyatanaṁ
tena ghānena taṁ gandhaṁ ghāyatīti. Na hevaṁ vattabbe .pe. Atthi tattha
manāyatanaṁ atthi dhammāyatanaṁ tena manena taṁ dhammaṁ vijānātīti.
Āmantā. Atthi tattha jivhāyatanaṁ atthi rasāyatanaṁ .pe.
Atthi tattha kāyāyatanaṁ atthi phoṭṭhabbāyatanaṁ tena kāyena taṁ
phoṭṭhabbaṁ phusatīti. Na hevaṁ vattabbe .pe.

[1229] Atthi tattha ghānāyatanaṁ atthi gandhāyatanaṁ na ca
tena ghānena taṁ gandhaṁ ghāyatīti. Āmantā. Atthi tattha cakkhāyatanaṁ
atthi rūpāyatanaṁ na ca tena cakkhunā taṁ rūpaṁ passatīti. Na hevaṁ
vattabbe .pe. Atthi tattha ghānāyatanaṁ atthi gandhāyatanaṁ na
ca tena ghānena taṁ gandhaṁ ghāyatīti. Āmantā. Atthi tattha
sotāyatanaṁ atthi saddāyatanaṁ .pe. Atthi tattha manāyatanaṁ atthi
dhammāyatanaṁ na ca tena manena taṁ dhammaṁ vijānātīti. Na hevaṁ
vattabbe .pe.

[1230] Atthi tattha jivhāyatanaṁ atthi rasāyatanaṁ .pe. Atthi
tattha kāyāyatanaṁ atthi phoṭṭhabbāyatanaṁ na ca tena kāyena taṁ
phoṭṭhabbaṁ phusatīti. Āmantā. Atthi tattha cakkhāyatanaṁ atthi
rūpāyatanaṁ na ca tena cakkhunā taṁ rūpaṁ passatīti. Na hevaṁ
vattabbe .pe. Atthi tattha kāyāyatanaṁ atthi phoṭṭhabbāyatanaṁ
Na ca tena kāyena taṁ phoṭṭhabbaṁ phusatīti. Āmantā. Atthi
tattha sotāyatanaṁ atthi saddāyatanaṁ .pe. Atthi tattha manāyatanaṁ
atthi dhammāyatanaṁ na ca tena manena taṁ dhammaṁ vijānātīti. Na
hevaṁ vattabbe .pe.

[1231] Atthi tattha ghānāyatanaṁ atthi gandhāyatanaṁ tena
ghānena taṁ gandhaṁ ghāyatīti. Āmantā. Atthi tattha mūlagandho
sāragandho tacagandho pattagandho pupphagandho phalagandho āmagandho
visagandho 1 sugandho duggandhoti. Na hevaṁ vattabbe .pe.

[1232] Atthi tattha jivhāyatanaṁ atthi rasāyatanaṁ tāya
jivhāya taṁ rasaṁ sāyatīti. Āmantā. Atthi tattha mūlaraso
khandharaso tacaraso pattaraso puppharaso phalaraso ambilaṁ madhuraṁ tittikaṁ
kaṭukaṁ loṇiyaṁ khāriyaṁ lambilaṁ kasāvo sādu asādūti. Na hevaṁ
vattabbe .pe.

[1233] Atthi tattha kāyāyatanaṁ atthi phoṭṭhabbāyatanaṁ tena
kāyena taṁ phoṭṭhabbaṁ phusatīti. Āmantā. Atthi tattha kakkhaḷaṁ
mudukaṁ saṇhaṁ pharusaṁ sukhasamphassaṁ dukkhasamphassaṁ garukaṁ lahukanti. Na
hevaṁ vattabbe .pe.

[1234] Na vattabbaṁ saḷāyataniko attabhāvo rūpadhātuyāti.
Āmantā. Nanu atthi tattha ghānanimittaṁ jivhānimittaṁ kāyanimittanti.
Āmantā. Hañci atthi tattha ghānanimittaṁ jivhānimittaṁ kāyanimittaṁ
1. Ma. vissagandho.
Tena vata re vattabbe saḷāyataniko attabhāvo rūpadhātuyāti.
Rūpadhātuyā āyatanakathā.
--------
Arūpe rūpakathā

[1235] Atthi rūpaṁ arūpesūti. Āmantā. Rūpabhavo rūpagati
rūpasattāvāso rūpasaṁsāro rūpayoni rūpattabhāvapaṭilābhoti. Na hevaṁ
vattabbe .pe. Nanu arūpabhāvo arūpagati arūpasattāvāso arūpasaṁsāro
arūpayoni arūpattabhāvapaṭilābhoti. Āmantā. Hañci arūpabhāvo .pe.
Arūpattabhāvapaṭilābho no vata re vattabbe atthi rūpaṁ arūpesūti.

[1236] Atthi rūpaṁ arūpesūti. Āmantā. Pañcavokārabhavo gati
sattāvāso saṁsāro yoni viññāṇaṭṭhiti attabhāvapaṭilābhoti. Na
hevaṁ vattabbe .pe. Nanu catuvokārabhavo .pe. Attabhāvapaṭilābhoti.
Āmantā. Hañci catuvokārabhavo gati .pe. Attabhāvapaṭilābho no
vata re vattabbe atthi rūpaṁ arūpesūti.