[967] Yathā bodhisatto mahāsupinaṁ passi 1 evameva cakkavattisatto
mahāsupinaṁ passatīti. Na hevaṁ vattabbe .pe.

[968] Na vattabbaṁ lakkhaṇasamannāgato bodhisattoti. Āmantā.
Nanu vuttaṁ bhagavatā dvattiṁsimāni bhikkhave mahāpurisassa mahāpurisalakkhaṇāni
yehi samannāgatassa mahāpurisassa dveva gatiyo bhavanti
anaññā sace agāraṁ ajjhāvasati rājā hoti cakkavatti dhammiko
1. Ma. passati.
Dhammarājā cāturanto vijitāvī janapadatthāvariyappatto sattaratanasamannāgato
tassimāni satta ratanāni bhavanti seyyathīdaṁ cakkaratanaṁ
hatthiratanaṁ assaratanaṁ maṇiratanaṁ itthīratanaṁ gahapatiratanaṁ pariṇāyakaratanameva
sattamaṁ parosahassaṁ kho panassa puttā bhavanti sūrā viraṅgarūpā
parasenappamaddanā so imaṁ paṭhaviṁ sāgarapariyantaṁ adaṇḍena asatthena
dhammena abhivijiya ajjhāvasati sace pana kho agārasmā anagāriyaṁ
pabbajjati arahaṁ hoti sammāsambuddho loke vivaṭacchadoti 1
attheva suttantoti. Āmantā. Tena hi lakkhaṇasamannāgato
bodhisattoti.
Lakkhaṇakathā.
---------
Niyāmokkantikathā

[969] Bodhisatto kassapassa bhagavato pāvacane okkantaniyāmo 2
caritabrahmacariyoti. Āmantā. Bodhisatto kassapassa bhagavato
sāvakoti. Na hevaṁ vattabbe .pe.

[970] Bodhisatto kassapassa bhagavato sāvakoti. Āmantā.
Sāvako hutvā buddho hotīti. Na hevaṁ vattabbe .pe.

[971] Sāvako hutvā buddho hotīti. Āmantā. Anussaviyoti.
1 dī. pā. 158. 2. Ma. okkanti. sabbattha. sadisameva.
Na hevaṁ vattabbe .pe.

[972] Anussaviyoti. Āmantā. Nanu bhagavā sayambhūti.
Āmantā. Hañci bhagavā sayambhū no vata re vattabbe anussaviyoti.

[973] Bodhisatto kassapassa bhagavato pāvacane okkantaniyāmo
caritabrahmacariyoti. Āmantā. Bhagavatā bodhiyā mūle tīṇeva
sāmaññaphalāni abhisambuddhānīti. Na hevaṁ vattabbe .pe.

[974] Nanu bhagavatā bodhiyā mūle cattāri sāmaññaphalāni
abhisambuddhānīti. Āmantā. Hañci bhagavatā bodhiyā mūle cattāri
sāmaññaphalāni abhisambuddhāni no vata re vattabbe bodhisatto
kassapassa bhagavato pāvacane okkantaniyāmo caritabrahmacariyoti.

[975] Bodhisatto kassapassa bhagavato pāvacane okkantaniyāmo
caritabrahmacariyoti. Āmantā. Bodhisatto dukkarakārikaṁ akāsīti.
Āmantā. Dassanasampanno puggalo dukkaraṁ kāriyaṁ kareyyāti.
Na hevaṁ vattabbe .pe.

[976] Bodhisatto aparantapaṁ akāsi aññaṁ satthāraṁ uddisīti.
Āmantā. Dassanasampanno puggalo aññaṁ satthāraṁ uddiseyyāti.
Na hevaṁ vattabbe .pe.