[907] Anāgāmī sotāpattiphalena samannāgatoti. Āmantā.
Anāgāmī sotāpanno sattakkhattuṁparamo kolaṁkolo ekavījīti.
Na hevaṁ vattabbe .pe. Anāgāmī sakadāgāmiphalena samannāgatoti.
Āmantā. Anāgāmī sakadāgāmīti. Na hevaṁ vattabbe .pe.

[908] Sakadāgāmī sotāpattiphalena samannāgatoti. Āmantā.
Sakadāgāmī sotāpanno sattakkhattuṁparamo kolaṁkolo ekavījīti.
Na hevaṁ vattabbe .pe.

[909] Sotāpattiphalena samannāgato sotāpannoti vattabboti.
Āmantā. Arahā sotāpattiphalena samannāgatoti. Āmantā.
Sveva arahā so sotāpannoti. Na hevaṁ vattabbe .pe.

[910] Sakadāgāmiphalena samannāgato sakadāgāmīti vattabboti.
Āmantā. Arahā sakadāgāmiphalena samannāgatoti.
Āmantā. Sveva arahā so sakadāgāmīti. Na hevaṁ vattabbe .pe.

[911] Anāgāmiphalena samannāgato anāgāmīti vattabboti.
Āmantā. Arahā anāgāmiphalena samannāgatoti. Āmantā.
Sveva arahā so anāgāmīti. Na hevaṁ vattabbe .pe.

[912] Sotāpattiphalena samannāgato sotāpannoti vattabboti.
Āmantā. Anāgāmī sotāpattiphalena samannāgatoti. Āmantā.
Sveva anāgāmī so sotāpannoti. Na hevaṁ vattabbe .pe.

[913] Sakadāgāmiphalena samannāgato sakadāgāmīti vattabboti.
Āmantā. Anāgāmī sakadāgāmiphalena samannāgatoti. Āmantā.
Sveva anāgāmī so sakadāgāmīti. Na hevaṁ vattabbe .pe.

[914] Sotāpattiphalena samannāgato sotāpannoti vattabboti.
Āmantā. Sakadāgāmī sotāpattiphalena samannāgatoti. Āmantā.
Sveva sakadāgāmī so sotāpannoti. Na hevaṁ vattabbe .pe.

[915] Arahā sotāpattiphalena samannāgatoti. Āmantā.
Nanu arahā sotāpattiphalaṁ vītivattoti. Āmantā. Hañci arahā
sotāpattiphalaṁ vītivatto no vata re vattabbe arahā sotāpattiphalena
samannāgatoti.

[916] Arahā sotāpattiphalaṁ vītivatto tena samannāgatoti.
Āmantā. Arahā sotāpattimaggaṁ vītivatto sakkāyadiṭṭhiṁ vicikicchaṁ
sīlabbataparāmāsaṁ apāyagamaniyaṁ rāgaṁ apāyagamaniyaṁ dosaṁ apāyagamaniyaṁ
mohaṁ vītivatto tena samannāgatoti. Na hevaṁ vattabbe .pe.