[747] Savedanaṁ sadosaṁ .pe. Sasaññaṁ sadosaṁ .pe. Sacetanaṁ
sadosaṁ .pe. Sapaññaṁ sadosaṁ cittaṁ vimuccati paññā ca cittañca
ubho vimuccantīti. Āmantā. Doso ca cittañca ubho vimuccantīti.
Na hevaṁ vattabbe .pe.

[748] Samohaṁ cittaṁ vimuccatīti. Āmantā. Mohasahagataṁ
mohasahajātaṁ mohasaṁsaṭṭhaṁ mohasampayuttaṁ mohasahabhu mohānuparivatti
Akusalaṁ lokiyaṁ sāsavaṁ .pe. Saṅkilesikaṁ cittaṁ vimuccatīti. Na
hevaṁ vattabbe .pe.

[749] Saphassaṁ cittaṁ vimuccati phasso ca cittañca ubho
vimuccantīti. Āmantā. Samohaṁ cittaṁ vimuccati moho ca
cittañca ubho vimuccantīti. Na hevaṁ vattabbe .pe.

[750] Savedanaṁ .pe. Sasaññaṁ .pe. Sacetanaṁ .pe. Sapaññaṁ
cittaṁ vimuccati paññā ca cittañca ubho vimuccantīti. Āmantā.
Samohaṁ cittaṁ vimuccati moho ca cittañca ubho vimuccantīti.
Na hevaṁ vattabbe .pe.

[751] Saphassaṁ samohaṁ cittaṁ vimuccati phasso ca cittañca ubho
vimuccantīti. Āmantā. Moho ca cittañca ubho vimuccantīti.
Na hevaṁ vattabbe .pe.

[752] Savedanaṁ samohaṁ .pe. Sasaññaṁ samohaṁ .pe. Sacetanaṁ
samohaṁ .pe. Sapaññaṁ samohaṁ cittaṁ vimuccati paññā ca cittañca
ubho vimuccantīti. Āmantā. Moho ca cittañca ubho vimuccantīti.
Na hevaṁ vattabbe .pe.

[753] Na vattabbaṁ sarāgaṁ sadosaṁ samohaṁ cittaṁ vimuccatīti.
Āmantā. Vītarāgaṁ vītadosaṁ vītamohaṁ nikkilesaṁ cittaṁ vimuccatīti. Na
hevaṁ vattabbe .pe. Tena hi sarāgaṁ sadosaṁ samohaṁ cittaṁ vimuccatīti.
Vimuccatikathā.
----------
Vimuccamānakathā

[754] Vimuttaṁ vimuccamānanti. Āmantā. Ekadesaṁ vimuttaṁ
ekadesaṁ avimuttanti. Na hevaṁ vattabbe .pe.

[755] Ekadesaṁ vimuttaṁ ekadesaṁ avimuttanti. Āmantā.
Ekadesaṁ sotāpanno ekadesaṁ na sotāpanno ekadesaṁ sotāpattiphalappatto
paṭiladdho adhigato sacchikato upasampajja viharati
kāyena phusitvā viharati ekadesaṁ na kāyena phusitvā viharati
ekadesaṁ sattakkhattuṁparamo kolaṁkolo ekavījī buddhe aveccappasādena
samannāgato dhamme .pe. Saṅghe .pe. Ariyakantehi sīlehi samannāgato
ekadesaṁ ariyakantehi sīlehi na samannāgatoti. Na hevaṁ vattabbe .pe.

[756] Ekadesaṁ vimuttaṁ ekadesaṁ avimuttanti. Āmantā.
Ekadesaṁ sakadāgāmī ekadesaṁ na sakadāgāmī ekadesaṁ sakadāgāmiphalappatto
paṭiladdho adhigato sacchikato upasampajja viharati kāyena
phusitvā viharati ekadesaṁ na kāyena phusitvā viharatīti. Na hevaṁ
vattabbe .pe.