[527] Natthi arahato satthari kaṅkhā dhamme kaṅkhā saṅghe
kaṅkhā .pe. Idappaccayatāpaṭiccasamuppannesu dhammesu kaṅkhāti.
Āmantā. Hañci natthi arahato satthari kaṅkhā dhamme kaṅkhā
.pe. Idappaccayatāpaṭiccasamuppannesu dhammesu kaṅkhā no vata
re vattabbe atthi arahato kaṅkhāti.

[528] Atthi puthujjanassa kaṅkhā atthi tassa satthari kaṅkhā
dhamme kaṅkhā .pe. Idappaccayatāpaṭiccasamuppannesu dhammesu
kaṅkhāti. Āmantā. Atthi arahato kaṅkhā atthi tassa satthari
kaṅkhā dhamme kaṅkhā .pe. Idappaccayatāpaṭiccasamuppannesu
dhammesu kaṅkhāti. Na hevaṁ vattabbe .pe.

[529] Atthi arahato kaṅkhā natthi tassa satthari kaṅkhā
dhamme kaṅkhā .pe. Idappaccayatāpaṭiccasamuppannesu dhammesu
kaṅkhāti. Āmantā. Atthi puthujjanassa kaṅkhā natthi tassa
satthari kaṅkhā dhamme kaṅkhā .pe. Idappaccayatāpaṭiccasamuppannesu
dhammesu kaṅkhāti. Na hevaṁ vattabbe .pe.

[530] Atthi arahato kaṅkhāti. Āmantā. Nanu arahato
rāgo pahīno ucchinnamūlo tālāvatthukato anabhāvaṁ kato āyatiṁ-
anuppādadhammoti. Āmantā. Hañci arahato rāgo pahīno ucchinnamūlo
tālāvatthukato anabhāvaṁ kato āyatiṁanuppādadhammo. No vata re
vattabbe atthi arahato kaṅkhāti.

[531] Atthi arahato kaṅkhāti. Āmantā. Nanu arahato
doso pahīno .pe. Moho pahīno .pe. Anottappaṁ pahīnaṁ
.pe. Rāgappahānāya maggo bhāvito .pe. Bojjhaṅgā bhāvitā
.pe. Dosappahānāya .pe. Anottappappahānāya maggo bhāvito
.pe. Bojjhaṅgā bhāvitā .pe. Nanu arahā vītarāgo vītadoso
.pe. Sacchikātabbaṁ sacchikatanti. Āmantā. Hañci arahā
vītarāgo vītadoso .pe. Sacchikātabbaṁ sacchikataṁ no vata re
vattabbe atthi arahato kaṅkhāti.

[532] Atthi arahato kaṅkhāti. Sadhammakusalassa arahato atthi
kaṅkhā paradhammakusalassa arahato natthi kaṅkhāti. Sadhammakusalassa
arahato atthi kaṅkhāti. Āmantā. Paradhammakusalassa arahato atthi
kaṅkhāti. Na hevaṁ vattabbe .pe.

[533] Paradhammakusalassa arahato natthi kaṅkhāti. Āmantā.
Sadhammakusalassa arahato natthi kaṅkhāti. Na hevaṁ vattabbe .pe.

[534] Sadhammakusalassa arahato rāgo pahīno atthi tassa
kaṅkhāti. Āmantā. Paradhammakusalassa arahato rāgo pahīno
atthi tassa kaṅkhāti. Na hevaṁ vattabbe .pe.

[535] Sadhammakusalassa arahato doso pahīno .pe. Moho
pahīno .pe. Anottappaṁ pahīnaṁ .pe. Rāgappahānāya maggo
bhāvito .pe. Bojjhaṅgā bhāvitā .pe. Dosappahānāya .pe.
Anottappappahānāya maggo bhāvito .pe. Bojjhaṅgā bhāvitā .pe.

[536] Sadhammakusalo arahā vītarāgo vītadoso .pe. Sacchikātabbaṁ
sacchikataṁ atthi tassa kaṅkhāti. Āmantā. Paradhammakusalo arahā
vītarāgo vītadoso .pe. Sacchikātabbaṁ sacchikataṁ atthi tassa
kaṅkhāti. Na hevaṁ vattabbe .pe.