[497] Atthi arahato aññāṇanti. Āmantā. Atthi
arahato satthari aññāṇaṁ dhamme aññāṇaṁ saṅghe aññāṇaṁ
sikkhāya aññāṇaṁ pubbante aññāṇaṁ aparante aññāṇaṁ
pubbantāparante aññāṇaṁ idappaccayatāpaṭiccasamuppannesu dhammesu
aññāṇanti. Na hevaṁ vattabbe .pe.

[498] Natthi arahato satthari aññāṇaṁ dhamme aññāṇaṁ
saṅghe aññāṇaṁ sikkhāya aññāṇaṁ pubbante aññāṇaṁ
aparante aññāṇaṁ pubbantāparante aññāṇaṁ idappaccayatāpaṭiccasamuppannesu
dhammesu aññāṇanti. Āmantā. Hañci
natthi arahato satthari aññāṇaṁ dhamme aññāṇaṁ saṅghe aññāṇaṁ
.pe. Idappaccayatāpaṭiccasamuppannesu dhammesu aññāṇaṁ no
vata re vattabbe atthi arahato aññāṇanti.

[499] Atthi puthujjanassa aññāṇaṁ atthi tassa satthari
aññāṇaṁ dhamme aññāṇaṁ saṅghe aññāṇaṁ .pe. Idappaccayatāpaṭiccasamuppannesu
dhammesu aññāṇanti. Āmantā. Atthi
arahato aññāṇaṁ atthi tassa satthari aññāṇaṁ dhamme
aññāṇaṁ saṅghe aññāṇaṁ .pe. Idappaccayatāpaṭiccasamuppannesu
dhammesu aññāṇanti. Na hevaṁ vattabbe .pe.

[500] Atthi arahato aññāṇaṁ natthi tassa satthari aññāṇaṁ
dhamme aññāṇaṁ saṅghe aññāṇaṁ .pe. Idappaccayatāpaṭiccasamuppannesu
Dhammesu aññāṇanti. Āmantā. Atthi puthujjanassa
aññāṇaṁ natthi tassa satthari aññāṇaṁ dhamme aññāṇaṁ
saṅghe aññāṇaṁ .pe. Idappaccayatāpaṭiccasamuppannesu dhammesu
aññāṇanti. Na hevaṁ vattabbe .pe.

[501] Atthi arahato aññāṇanti. Āmantā. Nanu arahato
rāgo pahīno ucchinnamūlo tālāvatthukato anabhāvaṁ kato āyatiṁanuppāda-
dhammoti. Āmantā. Hañci arahato rāgo pahīno ucchinnamūlo
tālāvatthukato anabhāvaṁ kato āyatiṁanuppādadhammo no vata re
vattabbe atthi arahato aññāṇanti .pe. Nanu arahato doso
pahīno .pe. Moho pahīno .pe. Anottappaṁ pahīnaṁ ucchinnamūlaṁ
tālāvatthukataṁ anabhāvaṁ kataṁ āyatiṁanuppādadhammanti. Āmantā.
Hañci arahato anottappaṁ pahīnaṁ ucchinnamūlaṁ tālāvatthukataṁ anabhāvaṁ kataṁ
āyatiṁanuppādadhammaṁ no vata re vattabbe atthi arahato
aññāṇanti.

[502] Atthi arahato aññāṇanti. Āmantā. Nanu arahato
rāgappahānāya maggo bhāvito .pe. Bojjhaṅgā bhāvitāti.
Āmantā. Hañci arahato rāgappahānāya bojjhaṅgā bhāvitā
no vata re vattabbe atthi arahato aññāṇanti.

[503] Atthi arahato aññāṇanti. Āmantā. Nanu arahato
dosappahānāya .pe. Anottappappahānāya maggo bhāvito .pe.
Bojjhaṅgā bhāvitāti. Āmantā. Hañci arahato anottappappahānāya
bojjhaṅgā bhāvitā no vata re vattabbe atthi
arahato aññāṇanti.

[504] Atthi arahato aññāṇanti. Āmantā. Nanu arahā
vītarāgo vītadoso vītamoho .pe. Sacchikātabbaṁ sacchikatanti.
Āmantā. Hañci arahā vītarāgo .pe. Sacchikātabbaṁ sacchikataṁ
no vata re vattabbe atthi arahato aññāṇanti.

[505] Atthi arahato aññāṇanti. Sadhammakusalassa arahato
atthi aññāṇaṁ paradhammakusalassa arahato natthi aññāṇanti.
Sadhammakusalassa arahato atthi aññāṇanti. Āmantā. Paradhammakusalassa
arahato atthi 1 aññāṇanti. Na hevaṁ vattabbe .pe.

[506] Paradhammakusalassa arahato natthi aññāṇanti. Āmantā.
Sadhammakusalassa arahato atthi aññāṇanti. Na hevaṁ vattabbe .pe.