[463] Saṅkhārapaccayā viññāṇena ye dhammā saḷāyatanapaccayā
phassena ye dhammā phassapaccayā vedanāya ye dhammā vippayuttā
te dhammā asaṅkhataṁ khandhato ṭhapetvā ekena khandhena ekādasahāyatanehi
ekādasahi dhātūhi saṅgahitā. Katīhi asaṅgahitā.
Catūhi khandhehi ekenāyatanena sattahi dhātūhi asaṅgahitā.

[464] Vedanāpaccayā taṇhāya ye dhammā taṇhāpaccayā
upādānena ye dhammā kammabhavena ye dhammā vippayuttā te
dhammā asaṅkhataṁ khandhato ṭhapetvā pañcahi khandhehi dvādasahāyatanehi
aṭṭhārasahi dhātūhi saṅgahitā. Katīhi asaṅgahitā. Na kehici
khandhehi na kehici āyatanehi na kāhici dhātūhi asaṅgahitā.

[465] Upapattibhavena ye dhammā saññābhavena ye dhammā
pañcavokārabhavena ye dhammā vippayuttā te dhammā catūhi khandhehi
dvīhāyatanehi tīhi dhātūhi saṅgahitā. Katīhi asaṅgahitā. Ekena
khandhena dasahāyatanehi pannarasahi dhātūhi asaṅgahitā.

[466] Kāmabhavena ye dhammā vippayuttā te dhammā catūhi
khandhehi dvīhāyatanehi pañcahi dhātūhi saṅgahitā. Katīhi asaṅgahitā.
Ekena khandhena dasahāyatanehi terasahi dhātūhi asaṅgahitā.

[467] Rūpabhavena ye dhammā asaññābhavena ye dhammā
ekavokārabhavena ye dhammā paridevena ye dhammā vippayuttā te dhammā
catūhi khandhehi dvīhāyatanehi aṭṭhahi dhātūhi saṅgahitā. Katīhi
asaṅgahitā. Ekena khandhena dasahāyatanehi dasahi dhātūhi asaṅgahitā.

[468] Arūpabhavena ye dhammā nevasaññānāsaññābhavena ye
dhammā catuvokārabhavena ye dhammā sokena ye dhammā dukkhena
ye dhammā domanassena ye dhammā upāyāsena ye dhammā
satipaṭṭhānena ye dhammā sammappadhānena ye dhammā iddhipādena
ye dhammā jhānena ye dhammā appamaññāya ye dhammā
pañcahi indriyehi ye dhammā pañcahi balehi ye dhammā sattahi
bojjhaṅgehi ye dhammā ariyena aṭṭhaṅgikena maggena ye dhammā
vippayuttā te dhammā asaṅkhataṁ khandhato ṭhapetvā pañcahi khandhehi
dvādasahāyatanehi aṭṭhārasahi dhātūhi saṅgahitā. Katīhi asaṅgahitā.
Na kehici khandhehi na kehici āyatanehi na kāhici dhātūhi asaṅgahitā.

[469] Phassena ye dhammā vedanāya ye dhammā saññāya
ye dhammā cetanāya ye dhammā cittena ye dhammā manasikārena
ye dhammā vippayuttā te dhammā asaṅkhataṁ khandhato ṭhapetvā
Ekena khandhena ekādasahāyatanehi ekādasahi dhātūhi saṅgahitā.
Katīhi asaṅgahitā. Catūhi khandhehi ekenāyatanena sattahi dhātūhi
asaṅgahitā.

[470] Adhimokkhena ye dhammā vippayuttā te dhammā asaṅkhataṁ
khandhato ṭhapetvā pañcahi khandhehi dvādasahāyatanehi sattarasahi
dhātūhi saṅgahitā. Katīhi asaṅgahitā. Na kehici khandhehi
na kehici āyatanehi ekāya dhātuyā asaṅgahitā.

[471] Kusalehi dhammehi ye dhammā akusalehi dhammehi ye
dhammā sukhāya vedanāya sampayuttehi dhammehi ye dhammā dukkhāya
vedanāya sampayuttehi dhammehi ye dhammā vippayuttā te dhammā
asaṅkhataṁ khandhato ṭhapetvā pañcahi khandhehi dvādasahāyatanehi
aṭṭhārasahi dhātūhi saṅgahitā. Katīhi asaṅgahitā. Na kehici
khandhehi na kehici āyatanehi na kāhici dhātūhi asaṅgahitā.

[472] Abyākatehi dhammehi ye dhammā vippayuttā te dhammā
catūhi khandhehi dvīhāyatanehi dvīhi dhātūhi saṅgahitā. Katīhi
asaṅgahitā. Ekena khandhena dasahāyatanehi soḷasahi dhātūhi asaṅgahitā.