[542] Satta bojjhaṅgā satisambojjhaṅgo dhammavicayasambojjhaṅgo
viriyasambojjhaṅgo pītisambojjhaṅgo passaddhisambojjhaṅgo
samādhisambojjhaṅgo upekkhāsambojjhaṅgo.

[543] Tattha katamo satisambojjhaṅgo idha bhikkhu satimā
hoti paramena satinepakkena samannāgato cirakatampi cirabhāsitampi
saritā anussaritā ayaṁ vuccati satisambojjhaṅgo. So tathāsato
viharanto taṁ dhammaṁ paññāya vicinati pavicinati parivīmaṁsaṁ āpajjati
ayaṁ vuccati dhammavicayasambojjhaṅgo. Tassa taṁ dhammaṁ paññāya
vicinato pavicinato parivīmaṁsaṁ āpajjato āraddhaṁ hoti viriyaṁ asallīnaṁ
ayaṁ vuccati viriyasambojjhaṅgo. Āraddhaviriyassa uppajjati pīti
nirāmisā ayaṁ vuccati pītisambojjhaṅgo. Pītimanassa kāyopi
passambhati cittaṁpi passambhati ayaṁ vuccati passaddhisambojjhaṅgo.
Passaddhakāyassa sukhino cittaṁ samādhiyati ayaṁ vuccati samādhisambojjhaṅgo.
So tathāsamāhitaṁ cittaṁ sādhukaṁ ajjhupekkhitā hoti
ayaṁ vuccati upekkhāsambojjhaṅgo.

[544] Satta bojjhaṅgā satisambojjhaṅgo dhammavicayasambojjhaṅgo
viriyasambojjhaṅgo pītisambojjhaṅgo passaddhisambojjhaṅgo
samādhisambojjhaṅgo upekkhāsambojjhaṅgo.

[545] Tattha katamo satisambojjhaṅgo atthi ajjhattaṁ dhammesu
sati atthi bahiddhā dhammesu sati. Yadapi ajjhattaṁ dhammesu
sati tadapi satisambojjhaṅgo abhiññāya sambodhāya nibbānāya
saṁvattati. Yadapi bahiddhā dhammesu sati tadapi satisambojjhaṅgo
abhiññāya sambodhāya nibbānāya saṁvattati.

[546] Tattha katamo dhammavicayasambojjhaṅgo atthi ajjhattaṁ
dhammesu pavicayo atthi bahiddhā dhammesu pavicayo. Yadapi
ajjhattaṁ dhammesu pavicayo tadapi dhammavicayasambojjhaṅgo
abhiññāya sambodhāya nibbānāya saṁvattati. Yadapi bahiddhā dhammesu
pavicayo tadapi dhammavicayasambojjhaṅgo abhiññāya sambodhāya
nibbānāya saṁvattati.

[547] Tattha katamo viriyasambojjhaṅgo atthi kāyikaṁ viriyaṁ
atthi cetasikaṁ viriyaṁ. Yadapi kāyikaṁ viriyaṁ tadapi viriyasambojjhaṅgo
abhiññāya sambodhāya nibbānāya saṁvattati. Yadapi cetasikaṁ
viriyaṁ tadapi viriyasambojjhaṅgo abhiññāya sambodhāya nibbānāya
Saṁvattati.

[548] Tattha katamo pītisambojjhaṅgo atthi savitakkasavicārā
pīti atthi avitakkāvicārā pīti yadapi savitakkasavicārā pīti tadapi
pītisambojjhaṅgo abhiññāya sambodhāya nibbānāya saṁvattati.
Yadapi avitakkāvicārā pīti tadapi pītisambojjhaṅgo abhiññāya
sambodhāya nibbānāya saṁvattati.

[549] Tattha katamo passaddhisambojjhaṅgo atthi kāyappassaddhi
atthi cittappassaddhi. Yadapi kāyappassaddhi tadapi
passaddhisambojjhaṅgo abhiññāya sambodhāya nibbānāya saṁvattati.
Yadapi cittappassaddhi tadapi passaddhisambojjhaṅgo abhiññāya
sambodhāya nibbānāya saṁvattati.

[550] Tattha katamo samādhisambojjhaṅgo atthi savitakko
savicāro samādhi atthi avitakko avicāro samādhi. Yadapi savitakko
savicāro samādhi tadapi samādhisambojjhaṅgo abhiññāya sambodhāya
nibbānāya saṁvattati. Yadapi avitakko avicāro samādhi tadapi
samādhisambojjhaṅgo abhiññāya sambodhāya nibbānāya saṁvattati.

[551] Tattha katamo upekkhāsambojjhaṅgo atthi ajjhattaṁ
dhammesu upekkhā atthi bahiddhā dhammesu upekkhā. Yadapi
ajjhattaṁ dhammesu upekkhā tadapi upekkhāsambojjhaṅgo abhiññāya
sambodhāya nibbānāya saṁvattati. Yadapi bahiddhā dhammesu upekkhā
Tadapi upekkhāsambojjhaṅgo abhiññāya sambodhāya nibbānāya
saṁvattati.