[2] Tattha katamo rūpakkhandho yaṅkiñci rūpaṁ atītānāgatapaccuppannaṁ
ajjhattaṁ vā bahiddhā vā oḷārikaṁ vā sukhumaṁ vā hīnaṁ
vā paṇītaṁ vā yaṁ dūre santike vā tadekajjhaṁ abhisaññūhitvā
abhisaṅkhipitvā ayaṁ vuccati rūpakkhandho.

[3] Tattha katamaṁ rūpaṁ atītaṁ yaṁ rūpaṁ atītaṁ niruddhaṁ vigataṁ
vipariṇataṁ atthaṅgataṁ abbhatthaṅgataṁ uppajjitvā vigataṁ atītaṁ
atītaṁsena saṅgahitaṁ cattāro ca mahābhūtā catunnañca mahābhūtānaṁ
upādāya rūpaṁ idaṁ vuccati rūpaṁ atītaṁ. Tattha katamaṁ rūpaṁ anāgataṁ
yaṁ rūpaṁ ajātaṁ abhūtaṁ asañjātaṁ anibbattaṁ anabhinibbattaṁ apātubhūtaṁ
anuppannaṁ asamuppannaṁ anuṭṭhitaṁ asamuṭṭhitaṁ anāgataṁ anāgataṁsena
saṅgahitaṁ cattāro ca mahābhūtā catunnañca mahābhūtānaṁ upādāya
rūpaṁ idaṁ vuccati rūpaṁ anāgataṁ. Tattha katamaṁ rūpaṁ paccuppannaṁ
yaṁ rūpaṁ jātaṁ bhūtaṁ sañjātaṁ nibbattaṁ abhinibbattaṁ pātubhūtaṁ
Uppannaṁ samuppannaṁ uṭṭhitaṁ samuṭṭhitaṁ paccuppannaṁ puccuppannaṁsena
saṅgahitaṁ cattāro ca mahābhūtā catunnañca mahābhūtānaṁ upādāya
rūpaṁ idaṁ vuccati rūpaṁ paccuppannaṁ.

[4] Tattha katamaṁ rūpaṁ ajjhattaṁ yaṁ rūpaṁ tesaṁ tesaṁ sattānaṁ
ajjhattaṁ paccattaṁ niyakaṁ pāṭipuggalikaṁ upādinnaṁ cattāro ca
mahābhūtā catunnañca mahābhūtānaṁ upādāya rūpaṁ idaṁ vuccati rūpaṁ
ajjhattaṁ. Tattha katamaṁ rūpaṁ bahiddhā yaṁ rūpaṁ tesaṁ tesaṁ parasattānaṁ
parapuggalānaṁ ajjhattaṁ paccattaṁ niyakaṁ pāṭipuggalikaṁ upādinnaṁ cattāro
ca mahābhūtā catunnañca mahābhūtānaṁ upādāya rūpaṁ idaṁ vuccati
rūpaṁ bahiddhā.

[5] Tattha katamaṁ rūpaṁ oḷārikaṁ cakkhāyatanaṁ .pe. Phoṭṭhabbāyatanaṁ
idaṁ vuccati rūpaṁ oḷārikaṁ. Tattha katamaṁ rūpaṁ sukhumaṁ
itthindriyaṁ .pe. Kabaḷiṅkāro āhāro idaṁ vuccati rūpaṁ sukhumaṁ.

[6] Tattha katamaṁ rūpaṁ hīnaṁ yaṁ rūpaṁ tesaṁ tesaṁ sattānaṁ
uññātaṁ avaññātaṁ hīḷitaṁ paribhūtaṁ acitīkataṁ hīnaṁ hīnamataṁ hīnasammataṁ
aniṭṭhaṁ akantaṁ amanāpaṁ rūpā saddā gandhā rasā
phoṭṭhabbā idaṁ vuccati rūpaṁ hīnaṁ. Tattha katamaṁ rūpaṁ paṇītaṁ yaṁ rūpaṁ
tesaṁ tesaṁ sattānaṁ anuññātaṁ anavaññātaṁ ahīḷitaṁ aparibhūtaṁ citīkataṁ
paṇītaṁ paṇītamataṁ paṇītasammataṁ iṭṭhaṁ kantaṁ manāpaṁ rūpā saddā
gandhā rasā phoṭṭhabbā idaṁ vuccati rūpaṁ paṇītaṁ. Taṁ taṁ vā
Pana rūpaṁ upādāya upādāya rūpaṁ hīnaṁ paṇītaṁ daṭṭhabbaṁ.

[7] Tattha katamaṁ rūpaṁ dūre itthindriyaṁ .pe. Kabaḷiṅkāro
āhāro yaṁ vā panaññampi atthi rūpaṁ anāsanne anupakkaṭṭhe
dūre asantike idaṁ vuccati rūpaṁ dūre. Tattha katamaṁ rūpaṁ santike
cakkhāyatanaṁ .pe. Phoṭṭhabbāyatanaṁ yaṁ vā panaññampi atthi rūpaṁ
āsanne upakkaṭṭhe avidūre santike idaṁ vuccati rūpaṁ santike.
Taṁ taṁ vā pana rūpaṁ upādāya upādāya rūpaṁ dūre santike daṭṭhabbaṁ.

[8] Tattha katamo vedanākkhandho yākāci vedanā
atītānāgatapaccuppannā ajjhattā vā bahiddhā vā oḷārikā vā sukhumā vā
hīnā vā paṇītā vā yā dūre santike vā tadekajjhaṁ abhisaññūhitvā
abhisaṅkhipitvā ayaṁ vuccati vedanākkhandho.

[9] Tattha katamā vedanā atītā yā vedanā atītā niruddhā
vigatā vipariṇatā atthaṅgatā abbhatthaṅgatā uppajjitvā vigatā
atītā atītaṁsena saṅgahitā sukhā vedanā dukkhā vedanā adukkhamasukhā
vedanā ayaṁ vuccati vedanā atītā. Tattha katamā
vedanā anāgatā yā vedanā ajātā abhūtā asañjātā anibbattā
anabhinibbattā apātubhūtā anuppannā asamuppannā anuṭṭhitā
asamuṭṭhitā anāgatā anāgataṁsena saṅgahitā sukhā vedanā dukkhā
vedanā adukkhamasukhā vedanā ayaṁ vuccati vedanā anāgatā.
Tattha katamā vedanā paccuppannā yā vedanā jātā bhūtā
Sañjātā nibbattā abhinibbattā pātubhūtā uppannā samuppannā
uṭṭhitā samuṭṭhitā paccuppannā paccuppannaṁsena saṅgahitā sukhā
vedanā dukkhā vedanā adukkhamasukhā vedanā ayaṁ vuccati vedanā
paccuppannā.

[10] Tattha katamā vedanā ajjhattā yā vedanā tesaṁ tesaṁ
sattānaṁ ajjhattaṁ paccattaṁ niyakā pāṭipuggalikā upādinnā sukhā
vedanā dukkhā vedanā adukkhamasukhā vedanā ayaṁ vuccati vedanā
ajjhattā. Tattha katamā vedanā bahiddhā yā vedanā tesaṁ
tesaṁ parasattānaṁ parapuggalānaṁ ajjhattaṁ paccattaṁ niyakā pāṭipuggalikā
upādinnā sukhā vedanā dukkhā vedanā adukkhamasukhā vedanā
ayaṁ vuccati vedanā bahiddhā.

[11] Tattha katamā vedanā oḷārikā sukhumā akusalā vedanā
oḷārikā kusalābyākatā vedanā sukhumā kusalākusalā vedanā
oḷārikā abyākatā vedanā sukhumā dukkhā vedanā oḷārikā
sukhā ca adukkhamasukhā ca vedanā sukhumā sukhadukkhā vedanā
oḷārikā adukkhamasukhā vedanā sukhumā asamāpannassa vedanā
oḷārikā samāpannassa vedanā sukhumā sāsavā vedanā oḷārikā
anāsavā vedanā sukhumā taṁ taṁ vā pana vedanaṁ upādāya upādāya
vedanā oḷārikā sukhumā daṭṭhabbā.