[370] Katamā tasmiṁ samaye cetanā hoti yā tasmiṁ samaye
tajjāmanodhātusamphassajā cetanā sañcetanā sañcetayitattaṁ ayaṁ
tasmiṁ samaye cetanā hoti.

[371] Katamaṁ tasmiṁ samaye cittaṁ hoti yaṁ tasmiṁ samaye cittaṁ
mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ
viññāṇakkhandho tajjā manodhātu idaṁ tasmiṁ samaye cittaṁ hoti.

[372] Katamo tasmiṁ samaye vitakko hoti yo tasmiṁ samaye
takko vitakko saṅkappo appanā byappanā cetaso abhiniropanā
Ayaṁ tasmiṁ samaye vitakko hoti.

[373] Katamo tasmiṁ samaye vicāro hoti yo tasmiṁ samaye cāro
vicāro anuvicāro upavicāro cittassa anusandhanatā anupekkhanatā
ayaṁ tasmiṁ samaye vicāro hoti.

[374] Katamā tasmiṁ samaye upekkhā hoti yaṁ tasmiṁ samaye
cetasikaṁ nevasātaṁ nāsātaṁ cetosamphassajaṁ adukkhamasukhaṁ vedayitaṁ
cetosamphassajā adukkhamasukhā vedanā ayaṁ tasmiṁ samaye upekkhā
hoti.

[375] Katamā tasmiṁ samaye cittassekaggatā hoti yā tasmiṁ
samaye cittassa ṭhiti ayaṁ tasmiṁ samaye cittassekaggatā hoti.

[376] Katamaṁ tasmiṁ samaye manindriyaṁ hoti yaṁ tasmiṁ samaye cittaṁ
mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ
viññāṇakkhandho tajjā manodhātu idaṁ tasmiṁ samaye manindriyaṁ hoti.

[377] Katamaṁ tasmiṁ samaye upekkhindriyaṁ hoti yaṁ tasmiṁ
samaye cetasikaṁ nevasātaṁ nāsātaṁ cetosamphassajaṁ adukkhamasukhaṁ vedayitaṁ
cetosamphassajā adukkhamasukhā vedanā idaṁ tasmiṁ samaye upekkhindriyaṁ
hoti.

[378] Katamaṁ tasmiṁ samaye jīvitindriyaṁ hoti yo tesaṁ arūpīnaṁ
dhammānaṁ āyu ṭhiti yapanā yāpanā iriyanā vattanā pālanā jīvitaṁ
jīvitindriyaṁ idaṁ tasmiṁ samaye jīvitindriyaṁ hoti.

[379] Ye vā pana tasmiṁ samaye aññepi atthi paṭiccasamuppannā
arūpino dhammā ime dhammā abyākatā.