[200] Katamā tasmiṁ samaye cetanā hoti yā tasmiṁ samaye
tajjāmanoviññāṇadhātusamphassajā cetanā sañcetanā sañcetayitattaṁ
ayaṁ tasmiṁ samaye cetanā hoti.

[201] Katamaṁ tasmiṁ samaye cittaṁ hoti yaṁ tasmiṁ samaye cittaṁ
mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ
viññāṇakkhandho tajjā manoviññāṇadhātu idaṁ tasmiṁ samaye
cittaṁ hoti.

[202] Katamo tasmiṁ samaye vitakko hoti yo tasmiṁ samaye
takko vitakko saṅkappo appanā byappanā cetaso abhiniropanā
sammāsaṅkappo maggaṅgaṁ maggapariyāpannaṁ ayaṁ tasmiṁ samaye vitakko
hoti.

[203] Katamo tasmiṁ samaye vicāro hoti yo tasmiṁ samaye
cāro vicāro anuvicāro upavicāro cittassa anusandhanatā anupekkhanatā
ayaṁ tasmiṁ samaye vicāro hoti.

[204] Katamā tasmiṁ samaye pīti hoti yā tasmiṁ samaye
pīti pāmojjaṁ āmodanā pamodanā hāso pahāso vitti odagyaṁ
attamanatā cittassa pītisambojjhaṅgo ayaṁ tasmiṁ samaye pīti
hoti.

[205] Katamaṁ tasmiṁ samaye sukhaṁ hoti yaṁ tasmiṁ samaye
cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ
cetosamphassajā sātā sukhā vedanā idaṁ tasmiṁ samaye sukhaṁ
hoti.

[206] Katamā tasmiṁ samaye cittassekaggatā hoti yā tasmiṁ
Samaye cittassa ṭhiti saṇṭhiti avaṭṭhiti avisāhāro avikkhepo
avisāhaṭamānasatā samatho samādhindriyaṁ samādhibalaṁ sammāsamādhi
samādhisambojjhaṅgo maggaṅgaṁ maggapariyāpannaṁ ayaṁ tasmiṁ samaye
cittassekaggatā hoti.

[207] Katamaṁ tasmiṁ samaye saddhindriyaṁ hoti yā tasmiṁ
samaye saddhā saddahanā okappanā abhippasādo saddhā saddhindriyaṁ
saddhābalaṁ idaṁ tasmiṁ samaye saddhindriyaṁ hoti.

[208] Katamaṁ tasmiṁ samaye viriyindriyaṁ hoti yo tasmiṁ
samaye cetasiko viriyārambho nikkamo parakkamo uyyāmo vāyāmo
ussāho ussoḷhī thāmo dhiti asithilaparakkamatā anikkhittacchandatā
anikkhittadhuratā dhurasampaggāho viriyaṁ viriyindriyaṁ viriyabalaṁ sammāvāyāmo
viriyasambojjhaṅgo maggaṅgaṁ maggapariyāpannaṁ idaṁ tasmiṁ
samaye viriyindriyaṁ hoti.

[209] Katamaṁ tasmiṁ samaye satindriyaṁ hoti yā tasmiṁ
samaye sati anussati paṭissati sati saraṇatā dhāraṇatā apilāpanatā
asammusanatā sati satindriyaṁ satibalaṁ sammāsati satisambojjhaṅgo
maggaṅgaṁ maggapariyāpannaṁ idaṁ tasmiṁ samaye satindriyaṁ hoti.