[130] Katame dhammā kusalā yasmiṁ samaye kāmāvacaraṁ kusalaṁ
cittaṁ uppannaṁ hoti upekkhāsahagataṁ ñāṇasampayuttaṁ rūpārammaṇaṁ
vā saddārammaṇaṁ vā gandhārammaṇaṁ vā rasārammaṇaṁ vā phoṭṭhabbārammaṇaṁ
vā dhammārammaṇaṁ vā yaṁ yaṁ vā panārabbha tasmiṁ samaye
phasso hoti vedanā hoti saññā hoti cetanā hoti cittaṁ hoti
vitakko hoti vicāro hoti upekkhā hoti cittassekaggatā hoti
saddhindriyaṁ hoti viriyindriyaṁ hoti satindriyaṁ hoti samādhindriyaṁ
hoti paññindriyaṁ hoti manindriyaṁ hoti upekkhindriyaṁ hoti
jīvitindriyaṁ hoti sammādiṭṭhi hoti sammāsaṅkappo hoti sammāvāyāmo
hoti sammāsati hoti sammāsamādhi hoti saddhābalaṁ hoti
viriyabalaṁ hoti satibalaṁ hoti samādhibalaṁ hoti paññābalaṁ hoti
hirībalaṁ hoti ottappabalaṁ hoti alobho hoti adoso hoti
amoho hoti anabhijjhā hoti abyāpādo hoti sammādiṭṭhi hoti
hirī hoti ottappaṁ hoti kāyappassaddhi hoti cittappassaddhi
hoti kāyalahutā hoti cittalahutā hoti kāyamudutā hoti
cittamudutā hoti kāyakammaññatā hoti cittakammaññatā hoti
Kāyapāguññatā hoti cittapāguññatā hoti kāyujukatā hoti
cittujukatā hoti sati hoti sampajaññaṁ hoti samatho hoti
vipassanā hoti paggāho hoti avikkhepo hoti ye vā pana
tasmiṁ samaye aññepi atthi paṭiccasamuppannā arūpino dhammā
ime dhammā kusalā.

[131] Katamo tasmiṁ samaye phasso hoti yo tasmiṁ samaye
phasso phusanā samphusanā samphusitattaṁ ayaṁ tasmiṁ samaye phasso
hoti. Katamā tasmiṁ samaye vedanā hoti yaṁ tasmiṁ samaye
tajjāmanoviññāṇadhātusamphassajaṁ cetasikaṁ nevasātaṁ nāsātaṁ cetosamphassajaṁ
adukkhamasukhaṁ vedayitaṁ cetosamphassajā adukkhamasukhā vedanā
ayaṁ tasmiṁ samaye vedanā hoti .pe. Katamā tasmiṁ samaye
upekkhā hoti yaṁ tasmiṁ samaye cetasikaṁ nevasātaṁ nāsātaṁ cetosamphassajaṁ
adukkhamasukhaṁ vedayitaṁ cetosamphassajā adukkhamasukhā vedanā
ayaṁ tasmiṁ samaye upekkhā hoti .pe. Katamaṁ tasmiṁ samaye
upekkhindriyaṁ hoti yaṁ tasmiṁ samaye cetasikaṁ nevasātaṁ nāsātaṁ
cetosamphassajaṁ adukkhamasukhaṁ vedayitaṁ cetosamphassajā adukkhamasukhā
vedanā idaṁ tasmiṁ samaye upekkhindriyaṁ hoti. Ye vā pana
tasmiṁ samaye aññepi atthi paṭiccasamuppannā arūpino dhammā
ime dhammā kusalā.

[132] Tasmiṁ kho pana samaye cattāro khandhā honti dvāyatanāni
Honti dve dhātuyo honti tayo āhārā honti aṭṭhindriyāni
honti caturaṅgikaṁ jhānaṁ hoti pañcaṅgiko maggo hoti satta balāni
honti tayo hetū honti eko phasso hoti .pe. Ekaṁ dhammāyatanaṁ
hoti ekā dhammadhātu hoti ye vā pana tasmiṁ samaye aññepi
atthi paṭiccasamuppannā arūpino dhammā ime dhammā kusalā .pe.

[133] Katamo tasmiṁ samaye saṅkhārakkhandho hoti phasso
cetanā vitakko vicāro cittassekaggatā saddhindriyaṁ viriyindriyaṁ
satindriyaṁ samādhindriyaṁ paññindriyaṁ jīvitindriyaṁ sammādiṭṭhi
sammāsaṅkappo sammāvāyāmo sammāsati sammāsamādhi saddhābalaṁ
viriyabalaṁ satibalaṁ samādhibalaṁ paññābalaṁ hirībalaṁ ottappabalaṁ alobho
adoso amoho anabhijjhā abyāpādo sammādiṭṭhi hirī
ottappaṁ kāyappassaddhi cittappassaddhi kāyalahutā cittalahutā
kāyamudutā cittamudutā kāyakammaññatā cittakammaññatā
kāyapāguññatā cittapāguññatā kāyujukatā cittujukatā sati
sampajaññaṁ samatho vipassanā paggāho avikkhepo ye vā
pana tasmiṁ samaye aññepi atthi paṭiccasamuppannā arūpino
dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā
viññāṇakkhandhaṁ ayaṁ tasmiṁ samaye saṅkhārakkhandho hoti .pe.
Ime dhammā kusalā .pe.
Pañcamaṁ cittaṁ.

[134] Katame dhammā kusalā yasmiṁ samaye kāmāvacaraṁ kusalaṁ
cittaṁ uppannaṁ hoti upekkhāsahagataṁ ñāṇasampayuttaṁ sasaṅkhārena
rūpārammaṇaṁ vā .pe. Dhammārammaṇaṁ vā yaṁ yaṁ vā panārabbha
tasmiṁ samaye phasso hoti .pe. Avikkhepo hoti .pe. Ime
dhammā kusalā .pe.
Chaṭṭhaṁ cittaṁ.

[135] Katame dhammā kusalā yasmiṁ samaye kāmāvacaraṁ kusalaṁ
cittaṁ uppannaṁ hoti upekkhāsahagataṁ ñāṇavippayuttaṁ rūpārammaṇaṁ
vā .pe. Dhammārammaṇaṁ vā yaṁ yaṁ vā panārabbha tasmiṁ samaye
phasso hoti vedanā hoti saññā hoti cetanā hoti cittaṁ hoti
vitakko hoti vicāro hoti upekkhā hoti cittassekaggatā hoti
saddhindriyaṁ hoti viriyindriyaṁ hoti satindriyaṁ hoti samādhindriyaṁ
hoti manindriyaṁ hoti upekkhindriyaṁ hoti jīvitindriyaṁ hoti sammāsaṅkappo
hoti sammāvāyāmo hoti sammāsati hoti sammāsamādhi
hoti saddhābalaṁ hoti viriyabalaṁ hoti satibalaṁ hoti samādhibalaṁ
hoti hirībalaṁ hoti ottappabalaṁ hoti alobho hoti adoso
hoti anabhijjhā hoti abyāpādo hoti hirī hoti ottappaṁ
hoti kāyappassaddhi hoti cittappassaddhi hoti kāyalahutā
hoti cittalahutā hoti kāyamudutā hoti cittamudutā hoti
kāyakammaññatā hoti cittakammaññatā hoti kāyapāguññatā
Hoti cittapāguññatā hoti kāyujukatā hoti cittujukatā hoti
sati hoti samatho hoti paggāho hoti avikkhepo hoti ye
vā pana tasmiṁ samaye aññepi atthi paṭiccasamuppannā arūpino
dhammā ime dhammā kusalā .pe.

[136] Tasmiṁ kho pana samaye cattāro khandhā honti dvāyatanāni
honti dve dhātuyo honti tayo āhārā honti sattindriyāni
honti caturaṅgikaṁ jhānaṁ hoti caturaṅgiko maggo hoti cha balāni
honti dve hetū honti eko phasso hoti .pe. Ekaṁ dhammāyatanaṁ
hoti ekā dhammadhātu hoti ye vā pana tasmiṁ samaye aññepi
atthi paṭiccasamuppannā arūpino dhammā ime dhammā kusalā .pe.

[137] Katamo tasmiṁ samaye saṅkhārakkhandho hoti phasso
cetanā vitakko vicāro cittassekaggatā saddhindriyaṁ viriyindriyaṁ
satindriyaṁ samādhindriyaṁ jīvitindriyaṁ sammāsaṅkappo sammāvāyāmo
sammāsati sammāsamādhi saddhābalaṁ viriyabalaṁ satibalaṁ samādhibalaṁ
hirībalaṁ ottappabalaṁ alobho adoso anabhijjhā abyāpādo
hirī ottappaṁ kāyappassaddhi cittappassaddhi kāyalahutā cittalahutā
kāyamudutā cittamudutā kāyakammaññatā cittakammaññatā
kāyapāguññatā cittapāguññatā kāyujukatā cittujukatā sati
samatho paggāho avikkhepo ye vā pana tasmiṁ samaye aññepi
atthi paṭiccasamuppannā arūpino dhammā ṭhapetvā vedanākkhandhaṁ
Ṭhapetvā saññākkhandhaṁ ṭhapetvā viññāṇakkhandhaṁ ayaṁ tasmiṁ samaye
saṅkhārakkhandho hoti .pe. Ime dhammā kusalā .pe.
Sattamaṁ cittaṁ.

[138] Katame dhammā kusalā yasmiṁ samaye kāmāvacaraṁ kusalaṁ
cittaṁ uppannaṁ hoti upekkhāsahagataṁ ñāṇavippayuttaṁ sasaṅkhārena
rūpārammaṇaṁ vā .pe. Dhammārammaṇaṁ vā yaṁ yaṁ vā panārabbha
tasmiṁ samaye phasso hoti .pe. Avikkhepo hoti .pe. Ime
dhammā kusalā .pe.
Aṭṭhamaṁ cittaṁ.
Kāmāvacarāṭṭhamahākusalacittāni.
Dutiyabhāṇavāraṁ.
---------

[139] Katame dhammā kusalā yasmiṁ samaye rūpūpapattiyā maggaṁ
bhāveti vivicceva kāmehi vivicca akusalehi dhammehi savitakkaṁ savicāraṁ
vivekajaṁ pītisukhaṁ paṭhamaṁ jhānaṁ upasampajja viharati paṭhavīkasiṇaṁ tasmiṁ
samaye phasso hoti .pe. Avikkhepo hoti .pe. Ime dhammā
kusalā 1 .