[1234] Katamā ca bhikkhave iddhipādabhāvanā. Idha bhikkhave
bhikkhu chandasamādhipadhānasaṅkhārasamannāgataṁ iddhipādaṁ bhāveti.
Viriyasamādhi cittasamādhi vīmaṁsāsamādhipadhānasaṅkhārasamannāgataṁ iddhipādaṁ
bhāveti. Ayaṁ vuccati bhikkhave iddhipādabhāvanā.

[1235] Katamā ca bhikkhave iddhipādabhāvanāgāminī paṭipadā.
Ayameva ariyo aṭṭhaṅgiko maggo. Seyyathīdaṁ. Sammādiṭṭhi
.pe. Sammāsamādhi. Ayaṁ vuccati bhikkhave iddhipādabhāvanāgāminī
paṭipadāti.

[1236] Atha kho sambahulā bhikkhū yena bhagavā .pe. Ekamantaṁ
nisinne kho te bhikkhū bhagavā etadavoca katamā nu kho bhikkhave
iddhi katamo iddhipādo katamā iddhipādabhāvanā katamā iddhipādabhāvanāgāminī
paṭipadāti. Bhagavaṁmūlakā no bhante dhammā
bhagavaṁnettikā .pe.

[1237] Katamā ca bhikkhave iddhi. Idha bhikkhave bhikkhu anekavihitaṁ
iddhividhaṁ paccanubhoti ekopi hutvā bahudhā hoti bahudhāpi hutvā
eko hoti .pe. Yāva brahmalokāpi kāyena vasaṁ vatteti.
Ayaṁ vuccati bhikkhave iddhi.

[1238] Katamo ca bhikkhave iddhipādo. Yo bhikkhave maggo
yā paṭipadā iddhilābhāya iddhipaṭilābhāya saṁvattati. Ayaṁ vuccati
bhikkhave iddhipādo.

[1239] Katamā ca bhikkhave iddhipādabhāvanā. Idha bhikkhave
bhikkhu chandasamādhipadhānasaṅkhārasamannāgataṁ iddhipādaṁ bhāveti.
Viriyasamādhi cittasamādhi vīmaṁsāsamādhipadhānasaṅkhārasamannāgataṁ iddhipādaṁ
bhāveti. Ayaṁ vuccati bhikkhave iddhipādabhāvanā.

[1240] Katamā ca bhikkhave iddhipādabhāvanāgāminī paṭipadā.
Ayameva ariyo aṭṭhaṅgiko maggo. Seyyathīdaṁ. Sammādiṭṭhi
.pe. Sammāsamādhi. Ayaṁ vuccati bhikkhave iddhipādabhāvanāgāminī
paṭipadāti.

[1241] Tatra kho bhagavā bhikkhū āmantesi taṁ kiṁ maññatha
bhikkhave katamesaṁ dhammānaṁ bhāvitattā bahulīkatattā moggallāno
bhikkhu evaṁmahiddhiko evaṁmahānubhāvoti. Bhagavaṁmūlakā no bhante
dhammā bhagavaṁnettikā .pe.

[1242] Catunnaṁ kho bhikkhave iddhipādānaṁ bhāvitattā bahulīkatattā
Moggallāno bhikkhu evaṁmahiddhiko evaṁmahānubhāvo.
Katamesaṁ catunnaṁ. Idha bhikkhave moggallāno bhikkhu chandasamādhi-
padhānasaṅkhārasamannāgataṁ iddhipādaṁ bhāveti iti me chando na ca
atilīno bhavissati na ca atipaggahito bhavissati na ca ajjhattaṁ
saṅkhitto bhavissati na ca bahiddhā vikkhitto bhavissati pacchāpure
saññī ca viharati yathā pure tathā pacchā yathā pacchā tathā
pure yathā adho tathā uddhaṁ yathā uddhaṁ tathā adho yathā divā
tathā rattiṁ yathā rattiṁ tathā divā iti vivaṭena cetasā apariyonaddhena
sappabhāsaṁ cittaṁ bhāveti. Viriyasamādhi cittasamādhi
vīmaṁsāsamādhipadhānasaṅkhārasamannāgataṁ iddhipādaṁ bhāveti iti me vīmaṁsā
na ca atilīnā bhavissati na ca atipaggahitā bhavissati na ca
ajjhattaṁ saṅkhittā bhavissati na ca bahiddhā vikkhittā bhavissati
.pe. Iti vivaṭena cetasā apariyonaddhena sappabhāsaṁ cittaṁ
bhāveti. Imesaṁ kho bhikkhave catunnaṁ iddhipādānaṁ bhāvitattā
bahulīkatattā moggallāno bhikkhu evaṁmahiddhiko evaṁmahānubhāvo.

[1243] Imesañca pana bhikkhave catunnaṁ iddhipādānaṁ bhāvitattā
bahulīkatattā moggallāno bhikkhu evaṁ anekavihitaṁ iddhividhaṁ paccanubhoti
ekopi hutvā bahudhā hoti bahudhāpi hutvā eko
hoti .pe. Yāva brahmalokāpi kāyena vasaṁ vatteti.