[864] Pañcimāni bhikkhave indriyāni. Katamāni pañca.
Saddhindriyaṁ .pe. Paññindriyaṁ.

[865] Katamañca bhikkhave saddhindriyaṁ. Idha bhikkhave ariyasāvako
saddho hoti saddahati tathāgatassa bodhiṁ itipi so bhagavā arahaṁ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavāti. Idaṁ
vuccati bhikkhave saddhindriyaṁ.

[866] Katamañca bhikkhave viriyindriyaṁ. Idha bhikkhave ariyasāvako
āraddhaviriyo viharati akusalānaṁ dhammānaṁ pahānāya kusalānaṁ dhammānaṁ
upasampadāya thāmavā daḷhaparakkamo anikkhittadhuro kusalesu dhammesu.
So anuppannānaṁ pāpakānaṁ akusalānaṁ dhammānaṁ anuppādāya chandaṁ
janeti vāyamati viriyaṁ ārabhati cittaṁ paggaṇhāti padahati.
Uppannānaṁ pāpakānaṁ akusalānaṁ dhammānaṁ pahānāya chandaṁ janeti
vāyamati viriyaṁ ārabhati cittaṁ paggaṇhāti padahati. Anuppannānaṁ
kusalānaṁ dhammānaṁ uppādāya chandaṁ janeti vāyamati viriyaṁ ārabhati
cittaṁ paggaṇhāti padahati. Uppannānaṁ kusalānaṁ dhammānaṁ samāpattiyā
asammosāya bhiyyobhāvāya vepullāya bhāvanāya pāripūriyā
chandaṁ janeti vāyamati viriyaṁ ārabhati cittaṁ paggaṇhāti padahati.
Idaṁ vuccati bhikkhave viriyindriyaṁ.

[867] Katamañca bhikkhave satindriyaṁ. Idha bhikkhave ariyasāvako
satimā hoti paramena satinepakkena samannāgato cirakataṁpi cirabhāsitaṁpi
saritā anussaritā. So kāye kāyānupassī viharati ātāpī
sampajāno satimā vineyya loke abhijjhādomanassaṁ. Vedanāsu
citte dhammesu dhammānupassī viharati ātāpī sampajāno satimā
vineyya loke abhijjhā domanassaṁ. Idaṁ vuccati bhikkhave satindriyaṁ.

[868] Katamañca bhikkhave samādhindriyaṁ. Idha bhikkhave ariyasāvako
vossaggārammaṇaṁ karitvā labhati samādhiṁ labhati cittassa ekaggataṁ.
So vivicceva kāmehi vivicca akusalehi dhammehi savitakkaṁ savicāraṁ
vivekajaṁ pītisukhaṁ paṭhamaṁ jhānaṁ upasampajja viharati vitakkavicārānaṁ
vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ
samādhijaṁ pītisukhaṁ dutiyaṁ jhānaṁ upasampajja viharati pītiyā ca virāgā
upekkhako ca viharati sato ca sampajāno sukhañca kāyena paṭisaṁvedeti
Yantaṁ ariyā ācikkhanti upekkhako satimā sukhavihārīti
tatiyaṁ jhānaṁ upasampajja viharati sukhassa ca pahānā dukkhassa ca
pahānā pubbeva somanassadomanassānaṁ atthaṅgamā adukkhamasukhaṁ
upekkhāsatipārisuddhiṁ catutthaṁ jhānaṁ upasampajja viharati. Idaṁ
vuccati bhikkhave samādhindriyaṁ.

[869] Katamañca bhikkhave paññindriyaṁ. Idha bhikkhave ariyasāvako
paññavā hoti udayatthagāminiyā paññāya samannāgato ariyāya
nibbedhikāya sammādukkhakkhayagāminiyā. So idaṁ dukkhanti yathābhūtaṁ
pajānāti ayaṁ dukkhasamudayoti yathābhūtaṁ pajānāti ayaṁ dukkhanirodhoti
yathābhūtaṁ pajānāti ayaṁ dukkhanirodhagāminī paṭipadāti
yathābhūtaṁ pajānāti. Idaṁ vuccati bhikkhave paññindriyaṁ. Imāni
kho bhikkhave pañcindriyānīti.
Suddhikavaggo paṭhamo.
Tassuddānaṁ
suddhikañceva dve sotā arahantā apare dve
samaṇabrāhmaṇā daṭṭhabbaṁ vibhaṅge apare duveti.
-------
Mudutaravaggo dutiyo

[870] Pañcimāni bhikkhave indriyāni. Katamāni pañca.
Saddhindriyaṁ .pe. Paññindriyaṁ.

[871] Katamañca bhikkhave saddhindriyaṁ. Idha bhikkhave ariyasāvako
saddho hoti saddahati tathāgatassa bodhiṁ itipi so bhagavā arahaṁ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavāti. Idaṁ
vuccati bhikkhave saddhindriyaṁ.

[872] Katamañca bhikkhave viriyindriyaṁ. Yaṁ kho bhikkhave cattāro
sammappadhāne ārabbha viriyaṁ paṭilabhati. Idaṁ vuccati bhikkhave
viriyindriyaṁ.

[873] Katamañca bhikkhave satindriyaṁ. Yaṁ kho bhikkhave cattāro
satipaṭṭhāne ārabbha satiṁ paṭilabhati. Idaṁ vuccati bhikkhave
satindriyaṁ.