[634] Uddhaccakukkuccapariyuṭṭhitena cetasā.

[635] Vicikicchāpariyuṭṭhitena cetasā viharati vicikicchāparetena
uppannāya ca vicikicchāya nissaraṇaṁ yathābhūtaṁ nappajānāti na passati.
Ayampi kho rājakumāra hetu ayaṁ paccayo aññāṇāya adassanāya.
Evampi sahetu sappaccayo aññāṇaṁ adassanaṁ hotīti.
1 Ma. Yu. pana.

[636] Ko nāmāyaṁ bhante dhammapariyāyoti. Nīvaraṇā nāmete
rājakumārāti. Taggha bhagavā nīvaraṇā taggha sugata nīvaraṇā
ekamekenapi kho bhante nīvaraṇena abhibhūto yathābhūtaṁ nappajāneyya
na passeyya ko pana vādo pañcahi nīvaraṇehi.

[637] Katamo pana bhante hetu katamo paccayo ñāṇāya
dassanāya. Kathaṁ sahetu sappaccayo ñāṇaṁ dassanaṁ hotīti.

[638] Idha rājakumāra bhikkhu satisambojjhaṅgaṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ. So satisambojjhaṅgaṁ
bhāveti 1 tena cittena yathābhūtaṁ pajānāti passati.
Ayampi kho rājakumāra hetu ayaṁ paccayo ñāṇāya dassanāya.
Evampi sahetu sappaccayo ñāṇaṁ dassanaṁ hoti.

[639] Puna caparaṁ rājakumāra bhikkhu .pe. Upekkhāsombajjhaṅgaṁ
bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
So upekkhāsambojjhaṅgaṁ bhāveti 2 tena cittena yathābhūtaṁ
pajānāti passati. Ayaṁpi kho rājakumāra hetu ayaṁ paccayo
ñāṇāya dassanāya. Evampi sahetu sappaccayo ñāṇaṁ dassanaṁ
hotīti.

[640] Ko nāmāyaṁ bhante dhammapariyāyoti. Bojjhaṅgā
nāmete rājakumārāti. Taggha bhagavā bojjhaṅgā taggha sugata
bojjhaṅgā ekamekenapi kho bhante bojjhaṅgena samannāgato
1-2 Ma. Yu. bhāvitena cittena.
Yathābhūtaṁ pajāneyya passeyya ko pana vādo sattahi bojjhaṅgehi.
Yopi me bhante gijjhakūṭaṁ pabbataṁ ārohantassa kāyakilamatho cittakilamatho
sopi me paṭippassaddho dhammo ca me abhisametoti.
Uddānaṁ bhavati
āhārāpariyāyaggi 1 mittaṁ 2 sagāravena ca
abhayo pucchito pañhaṁ gijjhakūṭamhi pabbateti.
Bojjhaṅgasaṁyuttassa bojjhaṅgachaṭṭhakaṁ chaṭṭhaṁ.
--------------
1 Ma. āhārāpariyāyamaggi. 2 Ma. Yu. mettaṁ saṅgāravena ca.
Bojjhaṅgassa ānāpānādipeyyālo sattamo

[641] Sāvatthīnidānaṁ. Aṭṭhikasaññā bhikkhave bhāvitā bahulīkatā
mahapphalā hoti mahānisaṁsā. Kathaṁ bhāvitā ca bhikkhave aṭṭhikasaññā
kathaṁ bahulīkatā mahapphalā hoti mahānisaṁsā. Idha bhikkhave bhikkhu
aṭṭhikasaññāsahagataṁ satisambojjhaṅgaṁ bhāveti vivekanissitaṁ virāganissitaṁ
nirodhanissitaṁ vossaggapariṇāmiṁ .pe. Aṭṭhikasaññāsahagataṁ
upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ. Evaṁ bhāvitā kho bhikkhave aṭṭhikasaññā
evaṁ bahulīkatā mahapphalā hoti mahānisaṁsāti.

[642] Sāvatthīnidānaṁ. Aṭṭhikasaññāya bhikkhave bhāvitāya
bahulīkatāya davinnaṁ phalānaṁ aññataraṁ phalaṁ pāṭikaṅkhaṁ diṭṭheva
dhamme aññā sati vā upādisese anāgāmitā. Kathaṁ bhāvitāya ca
kho bhikkhave aṭṭhikasaññāya kathaṁ bahulīkatāya dvinnaṁ phalānaṁ aññataraṁ
phalaṁ pāṭikaṅkhaṁ diṭṭheva dhamme aññā sati vā upādisese
anāgāmitā. Idha bhikkhave bhikkhu aṭṭhikasaññāsahagataṁ satisambojjhaṅgaṁ
bhāveti .pe. Upekkhāsambojjhaṅgaṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ. Evaṁ bhāvitāya
kho bhikkhave aṭṭhikasaññāya evaṁ bahulīkatāya dvinnaṁ phalānaṁ aññataraṁ
Phalaṁ pāṭikaṅkhaṁ diṭṭheva dhamme aññā sati vā upādisese
anāgāmitāti.

[643] Sāvatthīnidānaṁ. Aṭṭhikasaññā bhikkhave bhāvitā bahulīkatā
mahato atthāya saṁvattati. Kathaṁ bhāvitā ca bhikkhave aṭṭhikasaññā
kathaṁ bahulīkatā mahato atthāya saṁvattati. Idha bhikkhave bhikkhu
aṭṭhikasaññāsahagataṁ satisambojjhaṅgaṁ bhāveti .pe. Aṭṭhikasaññāsahagataṁ
upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ. Evaṁ bhāvitā kho bhikkhave aṭṭhikasaññā
evaṁ bahulīkatā mahato atthāya saṁvattatīti.