[๙๓๗] อิทํ วตฺวาน มฆวา เทวราชา สุชมฺปติ
ภควนฺตํ นมสฺสิตฺวา ปมุโข รถมารุหีติ ฯ
ทสมํ ตติยสกฺกนมสฺสนสุตฺตํ

[๙๓๘] สาวตฺถีนิทานํ ฯ ภูตปุพฺพํ ภิกฺขเว สกฺโก เทวานมินฺโท
มาตลึ สงฺคาหกํ อามนฺเตสิ โยเชหิ สมฺม มาตลิ สหสฺสยุตฺตํ
อาชญฺญรถํ อุยฺยานภูมึ คจฺฉาม สุภูมึ ทสฺสนายาติ ฯ เอวํ
ภทฺทนฺตวาติ โข ภิกฺขเว มาตลิ สงฺคาหโก สกฺกสฺส เทวานมินฺทสฺส
ปฏิสฺสุตฺวา สหสฺสยุตฺตํ อาชญฺญรถํ โยเชตฺวา สกฺกสฺส
เทวานมินฺทสฺส ปฏิเวเทสิ ยุตฺโต โข เต มาริส สหสฺสยุตฺโต
อาชญฺญรโถ ยสฺสทานิ กาลํ มญฺญสีติ ฯ อถ โข ภิกฺขเว สกฺโก
เทวานมินฺโท เวชยนฺตปาสาทา โอโรหนฺโต อญฺชลึ กตฺวา สุทํ
ภิกฺขุสงฺฆํ นมสฺสติ ฯ

[๙๓๙] อถ โข ภิกฺขเว มาตลิ สงฺคาหโก สกฺกํ เทวานมินฺทํ
คาถาย อชฺฌภาสิ
ตํ หิ เอเต นมสฺเสยฺยุํ ปูติเทหสยา นรา
นิมุคฺคา กุณปเสฺมเต ๑ ขุปฺปิปาสา สมปฺปิตา
กึ นุ เตสํ ปิหยสิ อนาคาราน วาสว
อาจารํ อิสินํ พฺรูหิ ตํ สุโณม วโจ ตวาติ ฯ

[๙๔๐] เอตํ เตสํ ปิหยามิ อนาคาราน มาตลิ
ยมฺหา คามา ปกฺกมนฺติ อนเปกฺขา วชนฺติ เต
น เตสํ โกฏฺเฐ โอเปนฺติ น กุมฺภา น กโฬปิยํ
ปรนิฏฺฐิตเมสนา ๒ เตน ยาเปนฺติ สุพฺพตา
#๑ ม. กุณปเมฺหเต ยุ. กุณเปสเวเต ฯ ๒ ม. ยุ. … เมสานา ฯ
สุมนฺตมนฺติโน ธีรา ตุณฺหีภูตา สมญฺจรา
เทวา วิรุทฺธา อสุเรหิ ปุถุมจฺจา จ มาตลิ
อวิรุทฺธา วิรุทฺเธสุ อตฺตทณฺเฑสุ นิพฺพุตา
สาทาเนสุ อนาทานา เต นมสฺสามิ มาตลีติ ฯ

[๙๔๑] เสฏฺฐา หิ กิร โลกสฺมึ เย ตฺวํ สกฺก นมสฺสสิ
อหมฺปิ เต นมสฺสามิ เย นมสฺสสิ วาสวาติ ฯ

[๙๔๒] อิทํ วตฺวาน มฆวา เทวราชา สุชมฺปติ
ภิกฺขุสงฺฆํ นมสฺสิตฺวา ปมุโข รถมารุหีติ ฯ
ทุติโย วคฺโค ฯ
ตสฺสุทฺทานํ
วตปเทน ๑ ตโย วุตฺตา ทฬิทฺทญฺจ รามเณยฺยกํ
ยชมานญฺจ วนฺทนา ตโย สกฺกนมสฺสนาติ ฯ
#๑ ยุ. เทวา ปน ฯ
สกฺกปญฺจกํ ตติยํ
__________
ปฐมํ ฆตฺวาสุตฺตํ

[๙๔๓] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯ อถ โข สกฺโก เทวานมินฺโท เยน ภควา เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ ฯ

[๙๔๔] เอกมนฺตํ ฐิโต โข สกฺโก เทวานมินฺโท ภควนฺตํ คาถาย
อชฺฌภาสิ
กึสุ ฆตฺวา ๑ สุขํ เสติ กึสุ ฆตฺวา น โสจติ
กิสฺสสฺส ๒ เอกธมฺมสฺส วธํ โรเจสิ โคตมาติ ฯ

[๙๔๕] โกธํ ฆตฺวา สุขํ เสติ โกธํ ฆตฺวา น โสจติ
โกธสฺส วิสมูลสฺส มธุรคฺคสฺส วาสว
วธํ อริยา ปสํสนฺติ ตํ หิ ฆตฺวา น โสจตีติ ฯ
ทุติยํ ทุพฺพณฺณิยสุตฺตํ

[๙๔๖] สาวตฺถีนิทานํ ฯ ภูตปุพฺพํ ภิกฺขเว อญฺญตโร ยกฺโข
ทุพฺพณฺโณ โอโกฏิมโก สกฺกสฺส เทวานมินฺทสฺส อาสเน นิสินฺโน
อโหสิ ฯ ตตฺร สุทํ ภิกฺขเว เทวา ตาวตึสา อุชฺฌายนฺติ ขียนฺติ
วิปาเจนฺติ อจฺฉริยํ วต โภ อพฺภูตํ วต โภ อยํ ยกฺโข
ทุพฺพณฺโณ โอโกฏิมโก สกฺกสฺส เทวานมินฺทสฺส อาสเน นิสินฺโนติ ฯ
#๑ ม. ยุ. เฉตฺวา ฯ สพฺพตฺถ เอวํ ญาตพฺพํ ฯ ๒ ม. กิสฺสสฺสุ ฯ
ยถา ยถา โข ภิกฺขเว เทวา ตาวตึสา อุชฺฌายนฺติ ขียนฺติ วิปาเจนฺติ
ตถา ตถา โส ยกฺโข อภิรูปตโร เจว โหติ ทสฺสนียตโร จ
ปาสาทิกตโร จ ฯ