[๘๙๗] อถ โข ภิกฺขเว เต อิสโย สีลวนฺโต กลฺยาณธมฺมา
สกฺกํ เทวานมินฺทํ คาถาย อชฺฌภาสึสุ
#๑ โป. ม. ปฏลิโย ฯ
คนฺโธ อิสีนํ จิรทกฺขิตานํ
กายา จุโต คจฺฉติ มาลุเตน
อิโต ปฏิกฺกมฺม สหสฺสเนตฺต
คนฺโธ อิสีนํ อสุจิ เทวราชาติ ฯ

[๘๙๘] คนฺโธ อิสีนํ จิรทกฺขิตานํ
กายา จุโต คจฺฉติ ๑ มาลุเตน
สุจิตฺรปุปฺผํ สิรสฺมึว มาลํ
คนฺธํ เอตํ ปฏิกงฺขาม ภนฺเต
น เหตฺถ เทวา ปฏิกฺกูลสญฺญิโนติ ฯ
ทสมํ สมุทฺทกสุตฺตํ

[๘๙๙] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯ ตตฺร โข ฯเปฯ

[๙๐๐] ภควา เอตทโวจ ภูตปุพฺพํ ภิกฺขเว สมฺพหุลา อิสโย
สีลวนฺโต กลฺยาณธมฺมา สมุทฺทตีเร ปณฺณกุฏีสุ สมฺมนฺติ ฯ เตน
โข ปน สมเยน ภิกฺขเว เทวาสุรสงฺคาโม สมุปพฺยูโฬฺห อโหสิ ฯ
อถ โข ภิกฺขเว เตสํ อิสีนํ สีลวนฺตานํ กลฺยาณธมฺมานํ เอตทโหสิ
ธมฺมิกา โข เทวา อธมฺมิกา อสุรา สิยาปิ นํ ๒ อสุรโต ภยํ
ยนฺนูน มยํ สมฺพรํ อสุรินฺทํ อุปสงฺกมิตฺวา อภยทกฺขิณํ
ยาเจยฺยามาติ ฯ

[๙๐๑] อถ โข ภิกฺขเว เต อิสโย สีลวนฺโต กลฺยาณธมฺมา
#๑ โป. ม. ยุ. คจฺฉตุ ฯ ๒ ม. โน ฯ
เสยฺยถาปิ นาม พลวา ปุริโส สมฺมิญฺชิตํ วา พาหํ ปสาเรยฺย
ปสาริตํ วา พาหํ สมฺมิญฺเชยฺย เอวเมว สมุทฺทตีเร ปณฺณกุฏีสุ
อนฺตรหิตา สมฺพรสฺส อสุรินฺทสฺส สมฺมุเข ปาตุรเหสุํ ฯ อถ โข
ภิกฺขเว เต อิสโย สีลวนฺโต กลฺยาณธมฺมา สมฺพรํ อสุรินฺทํ
คาถาย อชฺฌภาสึสุ
อิสโย สมฺพรํ ปตฺตา ยาจนฺติ อภยทกฺขิณํ
กามํ กโรสิ ๑ เต ทาตุํ ภยสฺส อภยสฺส วาติ ฯ

[๙๐๒] อิสีนํ อภยํ นตฺถิ ทุฏฺฐานํ สกฺกเสวินํ
อภยํ ยาจมานานํ ภยเมว ททามิ โวติ ฯ

[๙๐๓] อภยํ ยาจมานานํ ภยเมว ททาสิ โน
ปฏิคฺคณฺหาม เต เอกํ ๒ อภยํ ๓ โหตุ เต ภยํ
ยาทิสํ ลภเต ๔ พีชํ ตาทิสํ ลภเต ๕ ผลํ
กลฺยาณการี กลฺยาณํ ปาปการี จ ปาปกํ
ปวุตฺตํ ตาต ๖ เต พีชํ ผลํ ปจฺจนุโภสฺสสีติ ฯ
อถ โข ภิกฺขเว เต อิสโย สีลวนฺโต กลฺยาณธมฺมา สมฺพรํ
อสุรินฺทํ อภิสเปตฺวา ๗ เสยฺยถาปิ นาม พลวา ปุริโส สมฺมิญฺชิตํ
วา พาหํ ปสาเรยฺย ปสาริตํ วา พาหํ สมฺมิญฺเชยฺย เอวเมว
สมฺพรสฺส อสุรินฺทสฺส สมฺมุเข อนฺตรหิตา สมุทฺทตีเร ปณฺณกุฏีสุ
ปาตุรเหสุํ ฯ
#๑ ม. กโรหิ ฯ ๒ ม. ยุ. เอตํ ฯ ๓ ม. ยุ. อกฺขยํ ฯ ๔ ม. วปเต ฯ
#๕ ม. ยุ. หรเต ฯ ยุ. วปฺปเต ฯ ๖ วปฺปเต ฯ ๗ ม. อภิสปิตฺวา ฯ

[๙๐๔] อถ โข ภิกฺขเว สมฺพโร อสุรินฺโท เตหิ อิสีหิ สีลวนฺเตหิ
กลฺยาณธมฺเมหิ อภิสปิโต รตฺติยา สุทํ ติกฺขตฺตุํ อุพฺพิชฺชตีติ ฯ
ปฐโม วคฺโค ฯ
ตสฺสุทฺทานํ
สุวีรํ สุสิมญฺเจว ธชคฺคํ เวปจิตฺติโน
สุภาสิตํ ชยญฺเจว กุลาวกํ นทุพฺภิยํ
วิโรจนอสุรินฺโท อิสโย อรญฺญกญฺเจว
อิสโย จ สมุทฺทกาติ ฯ
_______________
ทุติยวคฺโค ทุติโย
_____________
ปฐมํ ปฐมเทวสุตฺตํ

[๙๐๕] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯ ตตฺร โข ฯเปฯ

[๙๐๖] ภควา เอตทโวจ สกฺกสฺส ภิกฺขเว เทวานมินฺทสฺส
ปุพฺเพ มนุสฺสภูตสฺส สตฺต วตฺตปทานิ ๑ สมตฺตานิ สมาทินฺนานิ อเหสุํ
เยสํ สมาทินฺนตฺตา สกฺโก สกฺกตฺตํ อชฺฌคา ฯ กตมานิ สตฺต ฯ
ยาวชีวํ มาตาเปตฺติภโร อสฺสํ ยาวชีวํ กุเล เชฏฺฐาปจายี อสฺสํ
ยาวชีวํ สณฺหวาโจ อสฺสํ ยาวชีวํ อปิสุณวาโจ อสฺสํ ยาวชีวํ
วิคตมลมจฺเฉเรน เจตสา อคารํ อชฺฌาวเสยฺยํ มุตฺตจาโค ปยตปาณี
โวสฺสคฺครโต ยาจโยโค ทานสํวิภาครโต ยาวชีวํ สจฺจวาโจ อสฺสํ
ยาวชีวํ อกฺโกธโน อสฺสํ สเจปิ เม โกโธ อุปฺปชฺเชยฺย ขิปฺปเมว
นํ ปฏิวิเนยฺยนฺติ ฯ สกฺกสฺส ภิกฺขเว เทวานมินฺทสฺส ปุพฺเพ มนุสฺสภูตสฺส
อิมานิ สตฺต วตฺตปทานิ ๒ สมตฺตานิ สมาทินฺนานิ อเหสุํ
เยสํ สมาทินฺนตฺตา สกฺโก สกฺกตฺตํ อชฺฌคาติ ฯ