[๘๐๗] เอกํ สมยํ ภควา คยายํ วิหรติ ฏงฺกิตมญฺเจ
สูจิโลมสฺส ยกฺขสฺส ภวเน ฯ เตน โข ปน สมเยน ขโร จ ยกฺโข
สูจิโลโม จ ยกฺโข ภควโต อวิทูเร อติกฺกมนฺติ ฯ อถ โข
ขโร ยกฺโข สูจิโลมํ ยกฺขํ เอตทโวจ เอโส สมโณติ ฯ เนโส
สมโณ สมณโก เอโส ยาว ชานามิ ยทิ วา โส สมโณ
ยทิ วา ๓ สมณโกติ ฯ

[๘๐๘] อถ โข สูจิโลโม ยกฺโข เยน ภควา เตนุปสงฺกมิ
อุปสงฺกมิตฺวา ภควโต กายํ อุปนาเมสิ ฯ อถ โข ภควา กายํ
อปนาเมสิ ฯ อถ โข สูจิโลโม ยกฺโข ภควนฺตํ เอตทโวจ ภายสิ
มํ สมณาติ ฯ น ขฺวาหนฺตํ อาวุโส ภายามิ อปิจ เต สมฺผสฺโส
ปาปโกติ ฯ ปญฺหํ ตํ สมณ ปุจฺฉิสฺสามิ สเจ เม สมณ น
พฺยากริสฺสสิ จิตฺตํ วา เต ขิปิสฺสามิ หทยํ วา เต ผาเลสฺสามิ
#๑ โป. ม. ยทญฺญมนุสาสสีติ ฯ ๒ ยุ. สานุกมฺปา ฯ ๓ ม. ยุ. ยทิ วา ปน โส ฯ
ปาเทสุ วา คเหตฺวา ปารคงฺคาย ขิปิสฺสามีติ ฯ น ขฺวาหนฺตํ
อาวุโส ปสฺสามิ สเทวเก โลเก สมารเก สพฺรหฺมเก สสฺสมณพฺราหฺมณิยา
ปชาย สเทวมนุสฺสาย โย เม จิตฺตํ วา ขิเปยฺย
หทยํ วา ผาเลยฺย ปาเทสุ วา คเหตฺวา ปารคงฺคาย ตีเร ขิเปยฺย
อปิจ ตฺวํ อาวุโส ปุจฺฉ ยทากงฺขสีติ ฯ

[๘๐๙] ราโค จ โทโส จ กุโตนิทานา
อรตี รติ โลมหํโส กุโตชา
กุโต สมุฏฺฐาย มโนวิตกฺกา
กุมารกา ธงฺกมิโวสฺสชนฺตีติ ฯ

[๘๑๐] ราโค จ โทโส จ อิโตนิทานา
อรตี รติ โลมหํโส อิโตชา
อิโต สมุฏฺฐาย มโนวิตกฺกา
กุมารกา ธงฺกมิโวสฺสชนฺติ
เสฺนหชา อตฺตสมฺภูตา นิโคฺรธสฺเสว ขนฺธชา
ปุถู วิสตฺตา กาเมสุ มาลุวา วิตฺถตา วเน
เย นํ ปชานนฺติ ยโตนิทานํ ๑
เต นํ วิโนเทนฺติ สุโณหิ ยกฺข
เต ทุตฺตรํ โอฆมิมํ ตรนฺติ
อติณฺณปุพฺพํ อปุนพฺภวายาติ ฯ
#๑ สี. ยโตนิทานา ฯ
จตุตฺถํ มณิภทฺทสุตฺตํ

[๘๑๑] เอกํ สมยํ ภควา มคเธสุ วิหรติ มณิมาฬเก เจติเย
มณิภทฺทสฺส ยกฺขสฺส ภวเน ฯ

[๘๑๒] อถ โข มณิภทฺโท ยกฺโข เยน ภควา เตนุปสงฺกมิ
อุปสงฺกมิตฺวา ภควโต สนฺติเก อิมํ คาถํ อภาสิ
สติมโต สทา ภทฺทํ สติมา สุขเมธติ
สติมโต สุเว เสยฺโย เวรา จ ปริมุจฺจตีติ ๑ ฯ
สติมโต สทา ภทฺทํ สติมา สุขเมธติ
สติมโต สุเว เสยฺโย เวรา น ปริมุจฺจตีติ ฯ

[๘๑๓] ยสฺส สพฺพมโหรตฺตึ ๒ อหึสาย รโต มโน
เมตฺตํโส ๓ สพฺพภูเตสุ เวรนฺตสฺส น เกนจีติ ฯ
ปญฺจมํ สานุสุตฺตํ

[๘๑๔] เอกํ สมยํ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อญฺญตริสฺสา
อุปาสิกาย สานุ นาม ปุตฺโต ยกฺเขน คหิโต โหติ ฯ

[๘๑๕] อถ โข สา อุปาสิกา ปริเทวมานา ตายํ เวลายํ
อิมา คาถาโย อภาสิ
#๑ ม. อยํ คาถา น ทิสฺสติ ฯ ๒ ม. ยุ. สพฺพมโหรตฺตํ ฯ ๓ เมตฺตํ โสติปิ
#ปาเฐน ภวิตพฺพํ ฯ
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาริหาริกปกฺขญฺจ อฏฺฐงฺคสุสมาคตํ
อุโปสถํ อุปวสนฺติ พฺรหฺมจริยํ จรนฺติ เย
น เตหิ ยกฺขา กีฬนฺติ อิติ เม อรหตํ สุตํ
สาทานิ อชฺช ปสฺสามิ ยกฺขา กีฬนฺติ สานุนาติ ฯ

[๘๑๖] จาตุทฺทสึ ปญฺจทสึ ยา จ ปกฺขสฺส อฏฺฐมี
ปาริหาริกปกฺขญฺจ อฏฺฐงฺคสุสมาคตํ
อุโปสถํ อุปวสนฺติ พฺรหฺมจริยํ จรนฺติ เย
น เตหิ ยกฺขา กีฬนฺติ สาหุ ๑ เต อรหตํ สุตํ
สานน ปพุทฺธํ วชฺชาสิ ยกฺขานํ วจนํ อิทํ
มากาสิ ปาปกํ กมฺมํ อาวิ วา ยทิ วา รโห
สเจว ๒ ปาปกํ กมฺมํ กริสฺสสิ กโรสิ วา
น เต ทุกฺขา ปมุตฺยตฺถิ อุปฺปจฺจาปิ ปลายโตติ ฯ