[๗๙๗] น หรามิ น ภญฺชามิ อารา สิงฺฆามิ วาริชํ
อถ เกน นุ วณฺเณน คนฺธตฺเถโนติ วุจฺจติ
ยฺวายํ ภึสานิ ขนติ ปุณฺฑรีกานิ ภญฺชติ
เอวํ อากิณฺณกมฺมนฺโต กสฺมา เอโส น วุจฺจตีติ ฯ

[๗๙๘] อากิณฺณลุทฺโธ ปุริโส อติเวลํว ๑ มกฺขิโต
ตสฺมึ เม วจนํ นตฺถิ ตญฺจ อรหามิ วตฺตเว
อนงฺคณสฺส โปสสฺส นิจฺจํ สุจิคเวสิโน
วาลคฺคมตฺตํ ปาปสฺส อพฺภามตฺตํว ขายตีติ ฯ

[๗๙๙] อทฺธา มํ ยกฺข ชานาสิ อโถ มํ อนุกมฺปสิ
ปุนปิ ยกฺข วชฺชาสิ ยทา ปสฺสสิ เอทิสนฺติ ฯ

[๘๐๐] เนว ตํ อุปชีวามิ นปิ เต ภทฺทกมฺหเส ๒
ตฺวเมว ภิกฺขุ ชาเนยฺย เยน คจฺเฉยฺย สุคตินฺติ ฯ
อถ โข โส ภิกฺขุ ตาย เทวตาย สํเวชิโต สํเวคมาปาทีติ ฯ
วนสํยุตฺตํ สมตฺตํ ฯ
#๑ ม. ยุ. ธาติเจลํว ฯ ๒ ม. ภตกามหเส ฯ ยุ. กตกมฺมเส ฯ
ตสฺสุทฺทานํ
วิเวกํ อุปฏฺฐานญฺจ กสฺสปโคตฺเตน สมฺพหุลา
อานนฺโท อนุรุทฺธญฺจ นาคทตฺตญฺจ กุลฆรณี
วชฺชีปุตฺโต จ เวสาลี สชฺฌาเยน อโยนิโส
มชฺฌนฺตกาลมฺหิ ปากตินฺทฺริยา ปทุมปุปฺเผน จุทฺทส ภเวติ ฯ
__________
ยกฺขสํยุตฺตํ
__________
ปฐมํ อินฺทกสุตฺตํ

[๘๐๑] เอวมฺเม สุตํ เอกํ สมยํ ภควา ราชคเห วิหรติ
อินฺทกูเฏ ปพฺพเต อินฺทกสฺส ยกฺขสฺส ภวเน ฯ

[๘๐๒] อถ โข อินฺทโก ยกฺโข เยน ภควา เตนุปสงฺกมิ
อุปสงฺกมิตฺวา ภควนฺตํ คาถาย อชฺฌภาสิ
รูปํ น ชีวนฺติ วทนฺติ พุทฺธา
กถํ นฺวยํ วินฺทติมํ สรีรํ
กุตสฺส อฏฺฐียกปิณฺฑเมติ
กถํ นฺวยํ สชฺชติ คพฺภสฺมินฺติ ฯ

[๘๐๓] ปฐมํ กลลํ โหติ กลลา โหติ อพฺพุทํ
อพฺพุทา ชายเต เปสิ เปสิ นิพฺพตฺตตี ฆโน
ฆนา ปสาขา ชายนฺติ เกสา โลมา นขาปิ จ
ยญฺจสฺส ภุญฺชติ มาตา อนฺนํ ปานญฺจ โภชนํ
เตน โส ตตฺถ ยาเปติ มาตุกุจฺฉิคฺคโต นโรติ ฯ
ทุติยํ สกฺกสุตฺตํ

[๘๐๔] เอกํ สมยํ ภควา ราชคเห วิหรติ คิชฺฌกูเฏ ปพฺพเต ฯ

[๘๐๕] อถ โข สกฺกนามโก ยกฺโข เยน ภควา เตนุปสงฺกมิ
อุปสงฺกมิตฺวา ภควนฺตํ คาถาย อชฺฌภาสิ
สพฺพคนฺถปฺปหีนสฺส วิปฺปมุตฺตสฺส เต สโต
สมณสฺส น ตํ สาธุ ยทญฺญมนุสาสตีติ ๑ ฯ

[๘๐๖] เยน เกนจิ วณฺเณน สํวาโส สกฺก ชายติ
น ตํ อรหติ สปฺปญฺโญ มนสา อนุกมฺปิตุํ
มนสา เจ ปสนฺเนน ยทญฺญมนุสาสติ
น เตน โหติ สํยุตฺโต ยานุกมฺปา ๒ อนุทฺทยาติ ฯ
ตติยํ สูจิโลมสุตฺตํ