[๗๘๗] อถ โข ยา ตสฺมึ วนสณฺเฑ อธิวตฺถา เทวตา ตสฺส
ภิกฺขุโน ธมฺมํ อสุณนฺตี เยน โส ภิกฺขุ เตนุปสงฺกมิ อุปสงฺกมิตฺวา
#๑ ม. อปวิทฺธํว ฯ ๒ ม. ยุ. สงฺกสายติ ฯ
ตํ ภิกฺขุํ คาถาย อชฺฌภาสิ
กสฺมา ตุวํ ธมฺมปทานิ ภิกฺขุ
นาธียสิ ๑ ภิกฺขูหิ สํวสนฺโต
สุตฺวาน ธมฺมํ ลภติปฺปสาทํ
ทิฏฺเฐว ธมฺเม ลภติปฺปสํสนฺติ ฯ

[๗๘๘] อหุ ปุเร ธมฺมปเทสุ ฉนฺโท
ยาว วิราเคน สมาคมิมฺห
ยโต วิราเคน สมาคมิมฺห
ยงฺกิญฺจิ ทิฏฺฐํว สุตํ มุตํ วา
อญฺญาย นิกฺเขปนมาหุ สนฺโตติ ฯ
เอกาทสมํ อโยนิโสมนสิการสุตฺตํ

[๗๘๙] เอกํ สมยํ อญฺญตโร ภิกฺขุ โกสเลสุ วิหรติ อญฺญตรสฺมึ
วนสณฺเฑ ฯ เตน โข ปน สมเยน โส ภิกฺขุ ทิวาวิหารคโต
ปาปเก อกุสเล วิตกฺเก วิตกฺเกติ เสยฺยถีทํ กามวิตกฺกํ
พฺยาปาทวิตกฺกํ วิหึสาวิตกฺกํ ฯ

[๗๙๐] อถ โข ยา ตสฺมึ วนสณฺเฑ อธิวตฺถา เทวตา
ตสฺส ภิกฺขุโน อนุกมฺปิกา อตฺถกามา ตํ ภิกฺขุํ สํเวเชตุกามา
เยน โส ภิกฺขุ เตนุปสงฺกมิ อุปสงฺกมิตฺวา ตํ ภิกฺขุํ คาถาหิ
อชฺฌภาสิ
#๑ นาทียสีติปิ ปาเฐน ภวิตพฺพํ ฯ
อโยนิโส มนสิการา โส ๑ วิตกฺเกหิ ขชฺชสิ ๒
อโยนิโส ปฏินิสฺสชฺช โยนิโส อนุวิจินฺตย
สตฺถารํ ธมฺมํ อารพฺภ สงฺฆํ สีลานิ วตฺตโน
อธิคจฺฉสิ ปาโมชฺชํ ปีติสุขมสํสยํ
ตโต ปามุชฺชพหุโล ๓ ทุกฺขสฺสนฺตํ กริสฺสสีติ ฯ
อถ โข โส ภิกฺขุ ตาย เทวตาย สํเวชิโต สํเวคมาปาทีติ ฯ
ทฺวาทสมํ มชฺฌนฺติกสุตฺตํ

[๗๙๑] เอกํ สมยํ อญฺญตโร ภิกฺขุ โกสเลสุ วิหรติ
อญฺญตรสฺมึ วนสณฺเฑ ฯ

[๗๙๒] อถ โข ยา ตสฺมึ วนสณฺเฑ อธิวตฺถา เทวตา เยน
โส ภิกฺขุ เตนุปสงฺกมิ อุปสงฺกมิตฺวา ตสฺส ภิกฺขุโน สนฺติเก
อิมา คาถา อภาสิ
ฐิเต มชฺฌนฺติเก กาเล สนฺนิสินฺเนสุ ๔ ปกฺขิสุ
สณเตว พฺรหารญฺญํ ตํ ภยํ ปฏิภาติ มํ
ฐิเต มชฺฌนฺติเก กาเล สนฺนิสินฺเนสุ ปกฺขิสุ
สณเตว พฺรหารญฺญํ สา รติ ปฏิภาติ มนฺติ ฯ
เตรสมํ ปากตินฺทฺริยสุตฺตํ

[๗๙๓] เอกํ สมยํ สมฺพหุลา ภิกฺขู โกสเลสุ วิหรนฺติ
อญฺญตรสฺมึ วนสณฺเฑ อุทฺธตา อุนฺนฬา จปลา มุขรา วิกิณฺณวาจา
มุฏฺฐสฺสติโน อสมฺปชานา อสมาหิตา วิพฺภนฺตจิตฺตา ปากตินฺทฺริยา ฯ
#๑ ยุ. โภ ฯ ๒ ยุ. มชฺชสิ ฯ ๓ ม. ยุ. ปาโมชฺชพหุโล ฯ ๔ ม. สนฺนิสีเวสุ ฯ

[๗๙๔] อถ โข ยา ตสฺมึ วนสณฺเฑ อธิวตฺถา เทวตา
เตสํ ภิกฺขูนํ อนุกมฺปิกา อตฺถกามา เต ภิกฺขู สํเวเชตุกามา
เยน เต ภิกฺขู เตนุปสงฺกมิ อุปสงฺกมิตฺวา เต ภิกฺขู คาถาหิ
อชฺฌภาสิ
สุขชีวิโน ปุเร อาสุํ ภิกฺขู โคตมสาวกา
อนิจฺฉา ปิณฺฑํ เอสนา อนิจฺฉา สยนาสนํ
โลเก อนิจฺจตํ ญตฺวา ทุกฺขสฺสนฺตํ อกํสุ เต
ทุปฺโปสํ กตฺวา อตฺตานํ คาเม คามณิกา วิย
ภุตฺวา ภุตฺวา นิปชฺชนฺติ ปราคาเรสุ มุจฺฉิตา
สงฺฆสฺส อญฺชลึ กตฺวา อิเธกจฺเจ วทามหํ
อปวิฏฺฐา ๑ อนาถา เต ยถา เปตา ตเถว เต
เย โข ปมตฺตา วิหรนฺติ เต เม สนฺธาย ภาสิตํ
เย อปฺปมตฺตา วิหรนฺติ นโม เตสํ กโรมหนฺติ ฯ
อถ โข เต ภิกฺขู ตาย เทวตาย สํเวชิตา สํเวคมาปาทุนฺติ ฯ
จุทฺทสมํ ปทุมปุปฺผสุตฺตํ

[๗๙๕] เอกํ สมยํ อญฺญตโร ภิกฺขุ โกสเลสุ วิหรติ อญฺญตรสฺมึ
วนสณฺเฑ ฯ เตน โข ปน สมเยน โส ภิกฺขุ ปจฺฉาภตฺตํ
ปิณฺฑปาตปฏิกฺกนฺโต โปกฺขรณึ โอคาเหตฺวา ปทุมํ อุปสิงฺฆติ ฯ

[๗๙๖] อถ โข ยา ตสฺมึ วนสณฺเฑ อธิวตฺถา เทวตา
ตสฺส ภิกฺขุโน อนุกมฺปิกา อตฺถกามา ตํ ภิกฺขุํ สํเวเชตุกามา
#๑ ม. ยุ. อปวิทฺธา ฯ
เยน โส ภิกฺขุ เตนุปสงฺกมิ อุปสงฺกมิตฺวา ตํ ภิกฺขุํ คาถาย
อชฺฌภาสิ
ยเมตํ วาริชํ ปุปฺผํ อทินฺนํ อุปสิงฺฆสิ
เอกงฺคเมตํ เถยฺยานํ คนฺธตฺเถโนสิ มาริสาติ ฯ