[๗๕๗] เอกํ สมยํ ภควา จมฺปายํ วิหรติ คคฺคราย โปกฺขรณิยา
ตีเร มหตา ภิกฺขุสงฺเฆน สทฺธึ ปญฺจมตฺเตหิ ภิกฺขุสเตหิ สตฺตหิ
จ อุปาสกสเตหิ อเนเกหิ จ เทวตาสหสฺเสหิ ฯ ตฺยาสฺสุทํ ภควา
อติโรจติ วณฺเณน เจว ยสสา จ ฯ

[๗๕๘] อถ โข อายสฺมโต วงฺคีสสฺส เอตทโหสิ อยํ โข
ภควา จมฺปายํ วิหรติ คคฺคราย โปกฺขรณิยา ตีเร มหตา ภิกฺขุสงฺเฆน
สทฺธึ ปญฺจมตฺเตหิ ภิกฺขุสเตหิ สตฺตหิ จ อุปาสกสเตหิ [๒]-
อเนเกหิ จ เทวตาสหสฺเสหิ ตฺยาสฺสุทํ ภควา อติโรจติ วณฺเณน
เจว ยสสา จ ยนฺนูนาหํ ภควนฺตํ สมฺมุขา สรูปาย คาถาย
อภิตฺถเวยฺยนฺติ ฯ อถ โข อายสฺมา วงฺคีโส อุฏฺฐายาสนา เอกํสํ
อุตฺตราสงฺคํ กริตฺวา เยน ภควา เตนญฺชลิมฺปณาเมตฺวา ภควนฺตํ
เอตทโวจ ปฏิภาติ มํ ภควา ปฏิภาติ มํ สุคตาติ ฯ ปฏิภาตุ
ตํ วงฺคีสาติ ภควา อโวจ ฯ

[๗๕๙] อถ โข อายสฺมา วงฺคีโส ภควนฺตํ สมฺมุขา สรูปาย
คาถาย อภิตฺถวิ
#๑ ม. ยุ. อนุปริเยติ ฯ ๒ ม. ยุ. เอตฺถนฺตเร สตฺตหิ จ อุปาสิกาสเตหิ ฯ
จนฺโท ยถา วีตวลาหเก นเภ
วิโรจติ วีตมโลว ภาณุมา
เอวมฺปิ องฺคีรส ตฺวํ มหามุนิ
อติโรจสิ ยสสา สพฺพโลกนฺติ ฯ
ทฺวาทสมํ วงฺคีสสุตฺตํ

[๗๖๐] เอกํ สมยํ อายสฺมา วงฺคีโส สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อายสฺมา
วงฺคีโส อจิรอรหตฺตปฺปตฺโต โหติ ๑ วิมุตฺติสุขํ ปฏิสํเวที ตายํ
เวลายํ อิมา คาถาโย อภาสิ
กาเวยฺยมตฺตา วิจริมฺห ปุพฺเพ คามา คามํ ปุรา ปุรํ
อถทฺทสาม สมฺพุทฺธํ สทฺธา โน อุปปชฺชถ
โส เม ธมฺมมเทเสสิ ขนฺเธ อายตนานิ ธาตุโย
ตสฺสาหํ ธมฺมํ สุตฺวาน ปพฺพชึ อนคาริยํ
พหุนฺนํ วต อตฺถาย โพธิมชฺฌคมา มุนิ
ภิกฺขูนํ ภิกฺขุนีนญฺจ เย นิยามคตทฺทสา
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ
ปุพฺเพนิวาสํ ชานามิ ทิพฺพจกฺขุํ วิโสธิตํ
เตวิชฺโช อิทฺธิปตฺโตมฺหิ เจโตปริยายโกวิโทติ ฯ
วงฺคีสสํยุตฺตํ สมตฺตํ ฯ
#๑ ม. ยุ. หุตฺวา ฯ
ตสฺสุทฺทานํ
นิกฺขนฺตอรติ เจว เปสลาอติมญฺญนา
อานนฺเทน สุภาสิตา สารีปุตฺตปวารณา
ปโรสหสฺสํ โกณฺฑญฺโญ โมคฺคลฺลาเนน คคฺครา
วงฺคีเสน ทฺวาทสาติ ฯ
________________
วนสํยุตฺตํ
_______
ปฐมํ วิเวกสุตฺตํ

[๗๖๑] เอวมฺเม สุตํ เอกํ สมยํ อญฺญตโร ภิกฺขุ โกสเลสุ
วิหรติ อญฺญตรสฺมึ วนสณฺเฑ ฯ เตน โข ปน สมเยน โส ภิกฺขุ
ทิวาวิหารคโต ปาปเก อกุสเล วิตกฺเก วิตกฺเกติ เคหนิสฺสิเต ฯ

[๗๖๒] อถ โข ยา ตสฺมึ วนสณฺเฑ อธิวตฺถา เทวตา ตสฺส
ภิกฺขุโน อนุกมฺปิกา อตฺถกามา ตํ ภิกฺขุํ สํเวเชตุกามา เยน โส
ภิกฺขุ เตนุปสงฺกมิ อุปสงฺกมิตฺวา ตํ ภิกฺขุํ คาถาหิ อชฺฌภาสิ
วิเวกกาโมสิ วนํ ปวิฏฺโฐ
อถ เต มโน นิจฺฉรติ พหิทฺธา
ตฺวํ ๑ ชโน ชนสฺมึ วินยสฺสุ ฉนฺทํ
ตโต สุขี โหหิสิ วีตราโค
อรตึ ปชหาสิ สโต
ภวาสิ สตํ ตํ สารยามเส
ปาตาลรโช หิ ทุตฺตโร
มา ตํ กามรโช อวาหริ
สกุโณ ยถา ปํสุกุณฺฑิโต ๒
วิธุนํ ปาตยติ สิตํ รชํ
#๑ ม. ยุ. อยํ ปาโฐ นตฺถิ ฯ ๒ โป. ยุ. กุณฺฐิโต ฯ ม. กุนฺติโต ฯ
เอวํ ภิกฺขุ ปธานวา สติมา
ปาตยติ สิตํ รชนฺติ ฯ
อถ โข โส ภิกฺขุ ตาย เทวตาย สํเวชิโต สํเวคมาปาทีติ ฯ
ทุติยํ อุปฏฺฐานสุตฺตํ

[๗๖๓] เอกํ สมยํ อญฺญตโร ภิกฺขุ โกสเลสุ วิหรติ อญฺญตรสฺมึ
วนสณฺเฑ ฯ เตน โข ปน สมเยน โส ภิกฺขุ ทิวาวิหารคโต
สุปติ ฯ

[๗๖๔] อถ โข ยา ตสฺมึ วนสณฺเฑ อธิวตฺถา เทวตา ตสฺส
ภิกฺขุโน อนุกมฺปิกา อตฺถกามา ตํ ภิกฺขุํ สํเวเชตุกามา เยน โส
ภิกฺขุ เตนุปสงฺกมิ อุปสงฺกมิตฺวา ตํ ภิกฺขุํ คาถาหิ อชฺฌภาสิ
อุฏฺเฐหิ ภิกฺขุ กึ โสปิ ๑ โก อตฺโถ สุปิเตน เต
อาตุรสฺส หิ เต ๒ นิทฺทา สลฺลวิทฺธสฺส รุปฺปโต
ยาย สทฺธาปพฺพชิโต ๓ อคารสฺมานคาริยํ
ตเมว สทฺธํ พฺรูเหหิ มา นิทฺทาย วสํ คมีติ ฯ

[๗๖๕] อนิจฺจา อทฺธุวา กามา เยสุ มนฺโทว มุจฺฉิโต
พทฺเธสุ มุตฺตํ อสิตํ กสฺมา ปพฺพชิตํ ตเป
ฉนฺทราคสฺส วินยา อวิชฺชาสมติกฺกมา
ตํ ญาณํ ปรโมทาตํ ๔ กสฺมา ปพฺพชิตํ ตเป
#๑ ม. ยุ. เสสิ ฯ ๒ ม. ยุ. กา ฯ ๓ ม. ยุ. สทฺธาย ปพฺพชิโต ฯ ๔ ม. ปริโมทานํ ฯ
#ยุ. ปริโยทาตํ ฯ
เภตฺวา ๑ อวิชฺชํ วิชฺชาย อาสวานํ ปริกฺขยา
อโสกํ อนุปายาสํ กสฺมา ปพฺพชิตํ ตเป
อารทฺธวิริยํ ปหิตตฺตํ นิจฺจํ ทฬฺหปรกฺกมํ
นิพฺพานํ อภิกงฺขนฺตํ กสฺมา ปพฺพชิตํ ตเปติ ฯ
ตติยํ กสฺสปโคตฺตสุตฺตํ

[๗๖๖] เอกํ สมยํ อายสฺมา กสฺสปโคตฺโต โกสเลสุ วิหรติ
อญฺญตรสฺมึ วนสณฺเฑ ฯ เตน โข ปน สมเยน อายสฺมา
กสฺสปโคตฺโต ทิวาวิหารคโต อญฺญตรํ เฉตํ โอวทติ ฯ