[๗๔๗] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม มหตา ภิกฺขุสงฺเฆน สทฺธึ อฑฺฒเตรเสหิ
ภิกฺขุสเตหิ ฯ เตน โข ปน สมเยน ภควา ภิกฺขู นิพฺพานปฏิสํยุตฺตาย
ธมฺมิยา กถาย สนฺทสฺเสติ สมาทเปติ สมุตฺเตเชติ
สมฺปหํเสติ ฯ เต จ ภิกฺขู อฏฺฐิกตฺวา มนสิกตฺวา สพฺพเจตโส
สมนฺนาหริตฺวา โอหิตโสตา ธมฺมํ สุณนฺติ ฯ

[๗๔๘] อถ โข อายสฺมโต วงฺคีสสฺส เอตทโหสิ อยํ โข
ภควา ภิกฺขู นิพฺพานปฏิสํยุตฺตาย ธมฺมิยา กถาย สนฺทสฺเสติ
สมาทเปติ สมุตฺเตเชติ สมฺปหํเสติ เต จ ภิกฺขู อฏฺฐิกตฺวา
มนสิกตฺวา สพฺพเจตโส สมนฺนาหริตฺวา โอหิตโสตา ธมฺมํ สุณนฺติ
ยนฺนูนาหํ ภควนฺตํ สมฺมุขา สรูปาหิ คาถาหิ อภิตฺถเวยฺยนฺติ ฯ
อถ โข อายสฺมา วงฺคีโส อุฏฺฐายาสนา เอกํสํ อุตฺตราสงฺคํ กริตฺวา
เยน ภควา เตนญฺชลิมฺปณาเมตฺวา ภควนฺตํ เอตทโวจ ปฏิภาติ
มํ ภควา ปฏิภาติ มํ สุคตาติ ฯ ปฏิภาตุ ตํ วงฺคีสาติ ภควา
อโวจ ฯ

[๗๔๙] อถ โข อายสฺมา วงฺคีโส ภควนฺตํ สมฺมุขา สรูปาหิ
คาถาหิ อภิตฺถวิ
ปโรสหสฺส ภิกฺขูนํ สุคตํ ปยิรุปาสติ
เทเสนฺตํ วิรชํ ธมฺมํ นิพฺพานํ อกุโตภยํ
สุณนฺติ ธมฺมํ วิมลํ สมฺมาสมฺพุทฺธเทสิตํ
โสภติ วต สมฺพุทฺโธ ภิกฺขุสงฺฆปุรกฺขโต
นาคนาโมสิ ภควา อิสีนํ อิสิสตฺตโม
มหาเมโฆว หุตฺวาน สาวเก อภิวสฺสติ
ทิวาวิหารา นิกฺขมฺม สตฺถุทสฺสนกามตา ๑
สาวโก เต มหาวีร ปาเท วนฺทติ วงฺคีโสติ ฯ
กึ นุ เต วงฺคีส อิมา คาถาโย ปุพฺเพ ปริวิตกฺกิตา อุทาหุ
ฐานโสว ตํ ปฏิภนฺตีติ ฯ น โข เม ภนฺเต อิมา คาถาโย
ปุพฺเพ ปริวิตกฺกิตา อถ โข ฐานโสว มํ ปฏิภนฺตีติ ฯ เตนหิ
ตํ วงฺคีส ภิยฺโยโส มตฺตาย ปุพฺเพ อปริวิตกฺกิตา คาถาโย
ปฏิภนฺตูติ ฯ

[๗๕๐] เอวํ ภนฺเตติ โข อายสฺมา วงฺคีโส ภควโต ปฏิสฺสุตฺวา
#๑ ม. ยุ. สตฺถุทสฺสนกามยตา ฯ
ภิยฺโยโส มตฺตาย ภควนฺตํ ปุพฺเพ อปริวิตกฺกิตาหิ คาถาหิ อภิตฺถวิ
อุมฺมคฺคสตํ ๑ มารสฺส อภิภุยฺย
จรสิ ปภิชฺช ขีลานิ
ตํ ปสฺสถ พนฺธปมุญฺจกรํ
อสิตํ ภาคโส ปวิภชฺชํ
โอฆสฺส หิ นิตฺถรณตฺถํ
อเนกวิหิตํ มคฺคํ อกฺขาสิ
ตสฺมึ เจ อมเต อกฺขาเต
ธมฺมทฺทสา ฐิตา อสํหิรา
ปชฺโชตกโร อติวิชฺฌ ธมฺมํ ๒
สพฺพทิฏฺฐีนํ อติกฺกมมทฺทส
ญตฺวา จ สจฺฉิกตฺวา จ อคฺคํ โส เทสยิ ทสฏฺฐานํ
เอวํ สุเทสิเต ธมฺเม โก ปมาโท วิชานตํ [๓]-
ตสฺมา หิ ตสฺส ภควโต สาสเน
อปฺปมตฺโต สทา นมสฺสมนุสิกฺเขติ ฯ
นวมํ โกณฺฑญฺญสุตฺตํ

[๗๕๑] เอกํ สมยํ ภควา ราชคเห วิหรติ เวฬุวเน
กลนฺทกนิวาเป ฯ อถ โข อายสฺมา อญฺญาโกณฺฑญฺโญ ๔ สุจิรสฺเสว
เยน ภควา เตนุปสงฺกมิ อุปสงฺกมิตฺวา ภควโต ปาเทสุ สิรสา
#๑ ม. ยุ. อุมฺมคฺปถํ ฯ ๒ ม. ยุ. อยํปาโฐนตฺถิ ฯ ๓ ม. ยุ. เอตฺถนฺตเร ธมฺมนฺติ
#ทิสฺสติ ฯ ๔ ม. ยุ. อญฺญาสิโกณฺฑญฺโญ ฯ
นิปติตฺวา ภควโต ปาทานิ มุเขน จ ปริจุมฺพติ ปาณีหิ จ
ปริสมฺพาหติ นามญฺจ สาเวติ โกณฺฑญฺโญหํ ภควา โกณฺฑญฺโญหํ
สุคตาติ ฯ

[๗๕๒] อถ โข อายสฺมโต วงฺคีสสฺส เอตทโหสิ อยํ โข
อายสฺมา อญฺญาโกณฺฑญฺโญ สุจิรสฺเสว เยน ภควา เตนุปสงฺกมิ
อุปสงฺกมิตฺวา ภควโต ปาเทสุ สิรสา นิปติตฺวา ภควโต ปาทานิ
มุเขน จ ปริจุมฺพติ ปาณีหิ จ ปริสมฺพาหติ นามญฺจ สาเวติ
โกณฺฑญฺโญหํ ภควา โกณฺฑญฺโญหํ สุคตาติ ยนฺนูนาหํ อายสฺมนฺตํ
อญฺญาโกณฺฑญฺญํ ภควโต สมฺมุขา สรูปาหิ คาถาหิ อภิตฺถเวยฺยนฺติ ฯ
อถ โข อายสฺมา วงฺคีโส อุฏฺฐายาสนา เอกํสํ อุตฺตราสงฺคํ
กริตฺวา เยน ภควา เตนญฺชลิมฺปณาเมตฺวา ภควนฺตํ
เอตทโวจ ปฏิภาติ มํ ภควา ปฏิภาติ มํ สุคตาติ ฯ ปฏิภาตุ
ตํ วงฺคีสาติ ภควา อโวจ ฯ

[๗๕๓] อถ โข อายสฺมา วงฺคีโส อายสฺมนฺตํ อญฺญาโกณฺฑญฺญํ
ภควโต สมฺมุขา สรูปาหิ คาถาหิ อภิตฺถวิ
พุทฺธานุพุทฺโธ โส เถโร โกณฺฑญฺโญ ติพฺพนิกฺกโม
ลาภี สุขวิหารานํ วิเวกานํ อภิณฺหโส
ยํ สาวเกน ปตฺตพฺพํ สตฺถุสาสนการินา
สพฺพสฺส ตํ อนุปฺปตฺตํ อปฺปมตฺตสฺส สิกฺขโต
มหานุภาโว เตวิชฺโช เจโตปริยายโกวิโท
โกณฺฑญฺโญ พุทฺธทายาโท ๑ ปาเท วนฺทติ สตฺถุโนติ ฯ
ทสมํ โมคฺคลฺลานสุตฺตํ

[๗๕๔] เอกํ สมยํ ภควา ราชคเห วิหรติ อิสิคิลิปสฺเส
กาฬสิลายํ มหตา ภิกฺขุสงฺเฆน สทฺธึ ปญฺจมตฺเตหิ ภิกฺขุสเตหิ
สพฺเพเหว อรหนฺเตหิ ฯ เตสํ สุทํ อายสฺมา มหาโมคฺคลฺลาโน
เจตสา จิตฺตํ สมนฺเนสติ วิปฺปมุตฺตํ นิรูปธึ ฯ

[๗๕๕] อถ โข อายสฺมโต วงฺคีสสฺส เอตทโหสิ อยํ โข
ภควา ราชคเห วิหรติ อิสิคิลิปสฺเส กาฬสิลายํ มหตา ภิกฺขุสงฺเฆน
สทฺธึ ปญฺจมตฺเตหิ ภิกฺขุสเตหิ สพฺเพเหว อรหนฺเตหิ เตสํ สุทํ
อายสฺมา มหาโมคฺคลฺลาโน เจตสา จิตฺตํ สมนฺเนสติ วิปฺปมุตฺตํ
นิรูปธึ ยนฺนูนาหํ อายสฺมนฺตํ มหาโมคฺคลฺลานํ ภควโต สมฺมุขา
สรูปาหิ คาถาหิ อภิตฺถเวยฺยนฺติ ฯ อถ โข อายสฺมา วงฺคีโส
อุฏฺฐายาสนา เอกํสํ อุตฺตราสงฺคํ กริตฺวา เยน ภควา เตนญฺชลิมฺปณาเมตฺวา
ภควนฺตํ เอตทโวจ ปฏิภาติ มํ ภควา ปฏิภาติ
มํ สุคตาติ ฯ ปฏิภาตุ ตํ วงฺคีสาติ ภควา อโวจ ฯ

[๗๕๖] อถ โข อายสฺมา วงฺคีโส อายสฺมนฺตํ มหาโมคฺคลฺลานํ
ภควโต สมฺมุขา สรูปาหิ คาถาหิ อภิตฺถวิ
นคสฺส ปสฺเส อาสีนํ มุนึ ทุกฺขสฺส ปารคุํ
สาวกา ปยิรุปาสนฺติ เตวิชฺชา มจฺจุหายิโน
#๑ ยุ. พุทฺธสาวโก ฯ
เต เจตสา อนุปริเยสติ ๑ โมคฺคลฺลาโน มหิทฺธิโก
จิตฺตํ เนสํ สมนฺเนสํ วิปฺปมุตฺตํ นิรูปธึ
เอวํ สพฺพงฺคสมฺปนฺนํ มุนึ ทุกฺขสฺส ปารคุํ
อเนกาการสมฺปนฺนํ ปยิรุปาสนฺติ โคตมนฺติ ฯ
เอกาทสมํ คคฺคราสุตฺตํ