[๖๖๗] เอกํ สมยํ ภควา โกสเลสุ วิหรติ อญฺญตรสฺมึ วนสณฺเฑ ฯ
เตน โข ปน สมเยน อญฺญตรสฺส ภารทฺวาชโคตฺตสฺส
พฺราหฺมณสฺส จตุทฺทส พลิพทฺทา นฏฺฐา โหนฺติ ฯ

[๖๖๘] อถ โข ภารทฺวาชโคตฺโต พฺราหฺมโณ เต พลิพทฺเท
คเวสนฺโต เยน โส วนสณฺโฑ เตนุปสงฺกมิ อุปสงฺกมิตฺวา อทฺทส
ภควนฺตํ ตสฺมึ วนสณฺเฑ นิสินฺนํ ปลฺลงฺกํ อาภุชิตฺวา อุชุํ กายํ
ปณิธาย ปริมุขํ สตึ อุปฏฺฐเปตฺวา ทิสฺวาน เยน ภควา เตนุปสงฺกมิ
อุปสงฺกมิตฺวา ภควโต สนฺติเก อิมา คาถาโย อภาสิ
#๑ ยู. อนลฺลินคตฺตาว ฯ
นห ๑ นูนิมสฺส สมณสฺส พลิพทฺทา จตุทฺทส
อชฺชสฏฺฐึ น ทิสฺสนฺติ เตนายํ สมโณ สุขี
นห นูนิมสฺส สมณสฺส ติลา เขตฺตสฺมิ ปาปิกา
เอกปณฺณา ทุปณฺณา จ เตนายํ สมโณ สุขี
นห นูนิมสฺส สมณสฺส ตุจฺฉโกฏฺฐสฺมิ มูสิกา
อุสฺโสฬฺหิกาย นจฺจนฺติ เตนายํ สมโณ สุขี
นห นูนิมสฺส สมณสฺส สนฺถาโร สตฺตมาสิโก
อุปฺปาทเกหิ สญฺฉนฺโน เตนายํ สมโณ สุขี
นห นูนิมสฺส สมณสฺส วิธวา ปุตฺตธีตโร
เอกปุตฺตา ทุปุตฺตา จ เตนายํ สมโณ สุขี
นห นูนิมสฺส สมณสฺส ปิงฺคลา ติลกาหตา
โสตฺตํ ปาเทน โปเถติ เตนายํ สมโณ สุขี
นห นูนิมสฺส สมณสฺส ปจฺจูสมฺหิ อิณายิกา
เทถ เทถาติ โจเทนฺติ เตนายํ สมโณ สุขีติ ฯ

[๖๖๙] นห มยฺหํ พฺราหฺมณ พลิพทฺทา จตุทฺทส
อชฺชสฏฺฐึ น ทิสฺสนฺติ เตนาหํ พฺราหฺมณ สุขี
นห มยฺหํ พฺราหฺมณ ติลา เขตฺตสฺมิ ปาปิกา
เอกปณฺณา ทุปณฺณา จ เตนาหํ พฺราหฺมณ สุขี
นห มยฺหํ พฺราหฺมณ ตุจฺฉโกฏฺฐสฺมิ มูสิกา
อุสฺโสฬฺหิกาย นจฺจนฺติ เตนาหํ พฺราหฺมณ สุขี
#๑ ม. ยุ. สพฺพตฺถ น หีติ ขายติ ฯ
นห มยฺหํ พฺราหฺมณ สนฺถาโร สตฺตมาสิโก
อุปฺปาทเกหิ สญฺฉนฺโน เตนาหํ พฺราหฺมณ สุขี
นห มยฺหํ พฺราหฺมณ วิธวา ปุตฺตธีตโร
เอกปุตฺตา ทฺวิปุตฺตา จ เตนาหํ พฺราหฺมณ สุขี
นห มยฺหํ พฺราหฺมณ ปิงฺคลา ติลกาหตา
โสตฺตํ ปาเทน โปเถติ เตนาหํ พฺราหฺมณ สุขี
นห มยฺหํ พฺราหฺมณ ปจฺจูสมฺหิ อิณายิกา
เทถ เทถาติ โจเทนฺติ เตนาหํ พฺราหฺมณ สุขีติ ฯ

[๖๗๐] เอวํ วุตฺเต ภารทฺวาชโคตฺโต พฺราหฺมโณ ภควนฺตํ
เอตทโวจ อภิกฺกนฺตํ โภ โคตม อภิกฺกนฺตํ โภ โคตม เสยฺยถาปิ
โภ โคตม นิกฺกุชฺชิตํ วา อุกฺกุชฺเชยฺย ปฏิจฺฉนฺนํ วา วิวเรยฺย
มูฬฺหสฺส วา มคฺคํ อาจิกฺเขยฺย อนฺธกาเร วา เตลปชฺโชตํ ธาเรยฺย
จกฺขุมนฺโต รูปานิ ทกฺขนฺตีติ เอวเมว โภตา โคตเมน อเนกปริยาเยน
ธมฺโม ปกาสิโต เอสาหํ ภวนฺตํ โคตมํ สรณํ คจฺฉามิ
ธมฺมญฺจ ภิกฺขุสงฺฆญฺจ ลเภยฺยาหํ โภโต โคตมสฺส สนฺติเก
ปพฺพชฺชํ ลเภยฺยํ อุปสมฺปทนฺติ ฯ อลตฺถ โข ภารทฺวาชโคตฺโต
พฺราหฺมโณ ภควโต สนฺติเก ปพฺพชฺชํ อลตฺถ อุปสมฺปทํ ฯ
อจิรูปสมฺปนฺโน จ ปนายสฺมา ภารทฺวาโช เอโก วูปกฏฺโฐ
อปฺปมตฺโต อาตาปี ปหิตตฺโต วิหรนฺโต น จิรสฺเสว ยสฺสตฺถาย
กุลปุตฺตา สมฺมเทว อคารสฺมา อนคาริยํ ปพฺพชนฺติ ตทนุตฺตรํ
พฺรหฺมจริยปริโยสานํ ทิฏฺเฐว ธมฺเม สยํ อภิญฺญา สจฺฉิกตฺวา
อุปสมฺปชฺช วิหาสิ ขีณา ชาติ วุสิตํ พฺรหฺมจริยํ กตํ กรณียํ
นาปรํ อิตฺถตฺตายาติ อพฺภญฺญาสิ ฯ อญฺญตโร จ ปนายสฺมา
ภารทฺวาโช อรหตํ อโหสีติ ฯ
อรหนฺตวคฺโค ปฐโม ฯ
ตสฺสุทฺทานํ
ธนญฺชานี จ อกฺโกสํ อสุรินฺท พิลงฺคิกํ
อหึสกํ ชฏา เจว สุทฺธิกญฺเจว อคฺคิกา
สุนฺทริกา พหุธิติ เยน จ เต ทสาติ ฯ
___________________
อุปาสกวคฺโค ทุติโย
_____________
ปฐมํ กสิสุตฺตํ

[๖๗๑] เอวมฺเม สุตํ เอกํ สมยํ ภควา มคเธสุ วิหรติ
ทกฺขิณาคิริสฺมึ เอกนาลายํ พฺราหฺมณคาเม ฯ เตน โข ปน สมเยน
กสิภารทฺวาชสฺส พฺราหฺมณสฺส ปญฺจมตฺตานิ นงฺคลสตานิ ปยุตฺตานิ
โหนฺติ วปฺปกาเล ฯ

[๖๗๒] อถ โข ภควา ปุพฺพณฺหสมยํ นิวาเสตฺวา ปตฺตจีวรมาทาย
เยน กสิภารทฺวาชสฺส พฺราหฺมณสฺส กมฺมนฺโต เตนุปสงฺกมิ ฯ
เตน โข ปน สมเยน กสิภารทฺวาชสฺส พฺราหฺมณสฺส ปริเวสนา
วตฺตติ ฯ อถ โข ภควา เยน ปริเวสนา เตนุปสงฺกมิ อุปสงฺกมิตฺวา
เอกมนฺตํ อฏฺฐาสิ ฯ อทฺทสา โข กสิภารทฺวาโช
พฺราหฺมโณ ภควนฺตํ ปิณฺฑาย ฐิตํ ทิสฺวาน ภควนฺตํ เอตทโวจ
อหํ โข สมณ กสามิ จ วปามิ จ กสิตฺวา จ วปิตฺวา จ
ภุญฺชามิ ตฺวมฺปิ สมณ กส จ วปสฺสุ จ กสิตฺวา จ วปิตฺวา จ
ภุญฺชสฺสูติ ฯ อหมฺปิ โข พฺราหฺมณ กสามิ จ วปามิ จ กสิตฺวา จ
วปิตฺวา จ ภุญฺชามีติ ฯ น โข ปน มยํ ปสฺสาม โภโต โคตมสฺส
ยุคํ วา นงฺคลํ วา ผาลํ วา ปาจนํ วา พลิพทฺเท วา อถ จ
ปน ภวํ โคตโม เอวมาห อหมฺปิ โข พฺราหฺมณ กสามิ จ
วปามิ จ กสิตฺวา จ วปิตฺวา จ ภุญฺชามีติ ฯ

[๖๗๓] อถ โข กสิภารทฺวาโช พฺราหฺมโณ ภควนฺตํ คาถาย
อชฺฌภาสิ
กสฺสโก ปฏิชานาสิ น จ ปสฺสามิ เต กสึ
กสฺสโก ปุจฺฉิโต พฺรูหิ กถํ ชาเนมุ ตํ กสินฺติ ฯ

[๖๗๔] สทฺธา พีชํ ตโป วุฏฺฐิ ปญฺญา เม ยุคนงฺคลํ
หิริ อีสา มโน โยตฺตํ สติ เม ผาลปาจนํ
กายคุตฺโต วจีคุตฺโต อาหาเร อุทเร ยโต
สจฺจํ กโรมิ นิทฺทานํ โสรจฺจํ เม ปโมจนํ
วิริยํ เม ธุรโธรยฺหํ โยคกฺเขมาธิวาหนํ
คจฺฉติ อนิวตฺตนฺตํ ยตฺถ คนฺตฺวา น โสจติ
เอวเมสา กสี กฏฺฐา สา โหติ อมตปฺผลา
เอตํ กสึ กสิตฺวาน สพฺพทุกฺขา ปมุจฺจตีติ ฯ
ภุญฺชตุ ภวํ โคตโม กสฺสโก ภวํ ยญฺหิ ภวํ โคตโม อมตปฺผลํปิ ๑
กสตีติ ฯ

[๖๗๕] คาถาภิคีตํ เม อโภชเนยฺยํ
สมฺปสฺสตํ พฺราหฺมณ เอส ๒ ธมฺโม
คาถาภิคีตํ ปนุทนฺติ พุทฺธา
ธมฺเม สติ พฺราหฺมณ วุตฺติ เรสา
#๑ ม. ยุ. เอตฺถนฺตเร กสึ อิติ ทิสฺสติ ฯ ๒ เนส ฯ
อญฺเญน จ เกวลินํ มเหสึ
ขีณาสวํ กุกฺกุจฺจวูปสนฺตํ
อนฺเนน ปาเนน อุปฏฺฐหสฺสุ
เขตฺตญฺหิ ตํ ปุญฺญเปกฺขสฺส โหตีติ ฯ

[๖๗๖] เอวํ วุตฺเต กสิภารทฺวาโช พฺราหฺมโณ ภควนฺตํ
เอตทโวจ อภิกฺกนฺตํ โภ โคตม อภิกฺกนฺตํ โภ โคตม ฯเปฯ
อชฺชตคฺเค ปาณุเปตํ สรณงฺคตนฺติ ฯ
ทุติยํ อุทยสุตฺตํ