[๕๓๗] สาวตฺถีนิทานํ ฯ อถ โข จาลา ภิกฺขุนี ปุพฺพณฺหสมยํ
นิวาเสตฺวา ฯเปฯ อญฺญตรสฺมึ รุกฺขมูเล ทิวาวิหารํ นิสีทิ ฯ

[๕๓๘] อถ โข มาโร ปาปิมา เยน จาลา ภิกฺขุนี ฯเปฯ
อุปสงฺกมิตฺวา จาลํ ภิกฺขุนึ เอตทโวจ กึ นุ โข ตฺวํ ภิกฺขุนิ
น โรเจสีติ ฯ ชาตึ ขฺวาหํ อาวุโส น โรเจมีติ ฯ

[๕๓๙] กึ นุ ชาตึ น โรเจสิ ชาโต กามานิ ภุญฺชติ
โก นุ ตฺวํ อิทมาทปยิ ชาติ มา โรจ ภิกฺขุนีติ ฯ

[๕๔๐] ชาตสฺส มรณํ โหติ ชาโต ทุกฺขานิ ปสฺสติ ๒
พนฺธํ วธํ ปริเกฺลสํ ตสฺมา ชาตึ น โรจเย
พุทฺโธ ธมฺมมเทเสสิ ชาติยา สมติกฺกมํ
สพฺพทุกฺขปฺปหานาย โส มํ สจฺเจ นิเวสยิ
เย จ รูปูปคา สตฺตา เย จ อรูปภาคิโน
นิโรธํ อปฺปชานนฺตา อาคนฺตาโร ปุนพฺภวนฺติ ฯ
อถ โข มาโร ปาปิมา ชานาติ มํ จาลา ภิกฺขุนีติ ทุกฺขี
ทุมฺมโน ตตฺเถวนฺตรธายีติ ฯ
#๑ โป. ม. ยุ. สพฺพพนฺธนมุตฺตามฺหิ ฯ ๒ ม. ผุสฺสติ ฯ
สตฺตมํ อุปจาลาสุตฺตํ

[๕๔๑] สาวตฺถีนิทานํ ฯ อถ โข อุปจาลา ภิกฺขุนี ปุพฺพณฺหสมยํ
นิวาเสตฺวา ฯเปฯ อญฺญตรสฺมึ รุกฺขมูเล ทิวาวิหารํ นิสีทิ ฯ

[๕๔๒] อถ โข มาโร ปาปิมา ฯเปฯ อุปจาลํ ภิกฺขุนึ
เอตทโวจ กถนฺนุ ตฺวํ ภิกฺขุนิ อุปฺปชฺชิตุกามาติ ฯ น ขฺวาหํ
อาวุโส กตฺถจิ อุปฺปชฺชิตุกามาติ ฯ

[๕๔๓] ตาวตึสา จ ยามา จ ตุสิตา จาปิ เทวตา
นิมฺมานรติโน เทวา เย เทวา วสวตฺติโน
ตตฺถ จิตฺตํ ปณิเธหิ รติ ๑ ปจฺจนุโภสฺสสีติ ฯ

[๕๔๔] ตาวตึสา จ ยามา จ ตุสิตา จาปิ เทวตา
นิมฺมานรติโน เทวา เย เทวา วสวตฺติโน
กามพนฺธนพนฺธา เต เอนฺติ มารวสํ ปุน
สพฺโพว อาทิตฺโต ๒ โลโก สพฺโพ โลโก ปธูปิโต
สพฺโพ ปชฺชลิโต ๓ โลโก สพฺโพ โลโก ปกมฺปิโต
อกมฺปิตํ อจลิตํ ๔ อปุถุชฺชนเสวิตํ
อคติ ยตฺถ มารสฺส ตตฺถ เม นิรโต มโนติ ฯ
อถ โข มาโร ปาปิมา ชานาติ มํ อุปจาลา ภิกฺขุนีติ ทุกฺขี
ทุมฺมโน ตตฺเถวนฺตรธายีติ ฯ
อฏฺฐมํ สีสุปจาลาสุตฺตํ

[๕๔๕] สาวตฺถิยํ … อถ โข สีสุปจาลา ภิกฺขุนี ปุพฺพณฺหสมยํ
#๑ ม. ยุ. รตึ ฯ ๒ ม. สพฺโพ อาทีปิโต ฯ ยุ. – อาทิปิโต ฯ ๓ ม. ปชฺชาลิโต ฯ
#๔ ม. อปชฺชลิตํ ฯ
นิวาเสตฺวา ฯเปฯ อญฺญตรสฺมึ รุกฺขมูเล ทิวาวิหารํ นิสีทิ ฯ

[๕๔๖] อถ โข มาโร ปาปิมา เยน สีสุปจาลา ภิกฺขุนี
เตนุปสงฺกมิ อุปสงฺกมิตฺวา สีสุปจารํ ภิกฺขุนึ เอตทโวจ กสฺส
นุ ตฺวํ ภิกฺขุนิ ปาสณฺฑํ โรเจสีติ ฯ น ขฺวาหํ อาวุโส กสฺสจิ
ปาสณฺฑํ โรเจมีติ ฯ