[๔๓๗] เอวมฺเม สุตํ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ

[๔๓๘] อถ โข มาโร ปาปิมา เยน ภควา เตนุปสงฺกมิ
อุปสงฺกมิตฺวา ภควโต สนฺติเก อิมํ คาถํ อภาสิ
นนฺทติ ปุตฺเตหิ ปุตฺติมา
โคมิโก โคหิ ๑ ตเถว นนฺทติ
อุปธีหิ นรสฺส นนฺทนา
น หิ โส นนฺทติ โย นิรูปธีติ ฯ

[๔๓๙] โสจติ ปุตฺเตหิ ปุตฺติมา
โคมิโก โคหิ ตเถว โสจติ
อุปธีหิ นรสฺส โสจนา
น หิ โส โสจติ โย นิรูปธีติ ฯ
อถ โข มาโร ปาปิมา ชานาติ มํ ภควา ชานาติ มํ สุคโตติ
ทุกฺขี ทุมฺมโน ตตฺเถวนฺตรธายีติ ฯ
#๑ ม. โคมา โคภิ ฯ
นวมํ ปฐมอายุสุตฺตํ

[๔๔๐] เอวมฺเม สุตํ เอกํ สมยํ ภควา ราชคเห วิหรติ
เวฬุวเน กลนฺทกนิวาเป ฯ ตตฺร โข ภควา ภิกฺขู อามนฺเตสิ
ภิกฺขโวติ ฯ ภทนฺเตติ เต ภิกฺขู ภควโต ปจฺจสฺโสสุํ ฯ ภควา
เอตทโวจ อปฺปมิทํ ภิกฺขเว มนุสฺสานํ อายุ คมนีโย สมฺปราโย
กตฺตพฺพํ กุสลํ จริตพฺพํ พฺรหฺมจริยํ นตฺถิ ชาตสฺส อมรณํ โย
ภิกฺขเว จิรํ ชีวติ โส วสฺสสตํ อปฺปํ วา ภิยฺโยติ ฯ

[๔๔๑] อถ โข มาโร ปาปิมา เยน ภควา เตนุปสงฺกมิ
อุปสงฺกมิตฺวา ภควนฺตํ คาถาย อชฺฌภาสิ
ทีฆมายุ มนุสฺสานํ น นํ หิเฬ สุโปริโส
จเรยฺย ขีรมตฺโตว นตฺถิ มจฺจุสฺส อาคโมติ ฯ

[๔๔๒] อปฺปมายุ มนุสฺสานํ หิเฬยฺย นํ สุโปริโส
จเรยฺยาทิตฺตสีโสว นตฺถิ มจฺจุสฺส นาคโมติ ฯ
อถ โข มาโร ปาปิมา ฯเปฯ ตตฺเถวนฺตรธายีติ ฯ
ทสมํ ทุติยอายุสุตฺตํ

[๔๔๓] เอกํ สมยํ ภควา ราชคเห ฯเปฯ ตตฺร โข ภควา
เอตทโวจ อปฺปมิทํ ภิกฺขเว มนุสฺสานํ อายุ คมนีโย สมฺปราโย
กตฺตพฺพํ กุสลํ จริตพฺพํ พฺรหฺมจริยํ นตฺถิ ชาตสฺส อมรณํ โย
ภิกฺขเว จิรํ ชีวติ โส วสฺสสตํ อปฺปํ วา ภิยฺโยติ ฯ

[๔๔๔] อถ โข มาโร ปาปิมา เยน ภควา เตนุปสงฺกมิ
อุปสงฺกมิตฺวา ภควนฺตํ คาถาย อชฺฌภาสิ
นาจฺจยนฺติ อโหรตฺตา ชีวิตํ นูปรุชฺฌติ
อายุํ อนุจริยติ ๑ มจฺจานํ เนมิว รถกุพฺพรนฺติ ฯ

[๔๔๕] อจฺจยนฺติ อโหรตฺตา ชีวิตํ อุปรุชฺฌติ
อายุ ขียติ มจฺจานํ กุนฺนทีนํว โอทกนฺติ ฯ
อถ โข มาโร ปาปิมา ชานาติ มํ ภควา ชานาติ มํ สุคโตติ
ทุกฺขี ทุมฺมโน ตตฺเถวนฺตรธายีติ ฯ
ปฐโม วคฺโค ฯ
ตสฺสุทฺทานํ
ตโปกมฺมญฺจ นาโค จ สุภํ ปาเสน เต ทุเว
สปฺโป สุปฺปติ นนฺทนํ อายุนา อปเร ทุเวติ ฯ
__________
#๑ สี. ปริเยตีติปิ อนุปริเยตีติปิ ปาโฐ ฯ ยุ. อนุปริยาติ ฯ ม. อายุ อนุปริยายติ.
ทุติยวคฺโค ทุติโย
_______________
ปฐมํ ปาสาณสุตฺตํ

[๔๔๖] เอกํ สมยํ ภควา ราชคเห วิหรติ คิชฺฌกูเฏ ปพฺพเต ฯ
เตน โข ปน สมเยน ภควา รตฺตนฺธการติมิสายํ อชฺโฌกาเส
นิสินฺโน โหติ ฯ เทโว จ เอกเมกํ ผุสายติ ฯ