[๔๑๗] อถ โข มาโร ปาปิมา ภควโต เจตสา เจโต
ปริวิตกฺกมญฺญาย เยน ภควา เตนุปสงฺกมิ อุปสงฺกมิตฺวา ภควนฺตํ คาถาย
อชฺฌภาสิ
ตโปกมฺมา อปกฺกมฺม เยน สุชฺฌนฺติ มาณวา
อสุทฺโธ มญฺญสิ ๔ สุทฺโธ สุทฺธิมคฺคํ ๕ อปรทฺโธติ ฯ

[๔๑๘] อถ โข ภควา มาโร อยํ ปาปิมา อิติ วิทิตฺวา
มารํ ปาปิมนฺตํ คาถาหิ อชฺฌภาสิ
#๑ ม. ยุ. อชปาลนิโคฺรธมูเล ฯ ๒ ม. มุตฺโต ฯ ๓ สี. ยุ. สาธุ ฐิโต สโต โพธึ
#สมชฺฌคนฺติ ฯ ๔ ยุ. มญฺญติ ฯ ๕ ม. สุทฺธิมคฺคา ฯ
อนตฺถสญฺหิตํ ญตฺวา ยงฺกิญฺจิ อปรํ ๑ ตปํ
สพฺพํ นตฺถาวหํ ๒ โหติ ปิยาริตฺตํว ธมฺมนิ
สีลํ สมาธึ ปญฺญญฺจ มคฺคํ โพธาย ภาวยํ
ปตฺโตสฺมิ ปรมํ สุทฺธึ นิหโต ตฺวมสิ อนฺตกาติ ฯ
อถ โข มาโร ปาปิมา ชานาติ มํ ภควา ชานาติ มํ สุคโตติ
ทุกฺขี ทุมฺมโน ตตฺเถวนฺตรธายีติ ฯ
ทุติยํ นาคสุตฺตํ

[๔๑๙] เอวมฺเม สุตํ เอกํ สมยํ ภควา อุรุเวลายํ วิหรติ
นชฺชา เนรญฺชราย ตีเร อชปาลนิโคฺรเธ ปฐมาภิสมฺพุทฺโธ ฯ เตน
โข ปน สมเยน ภควา รตฺตนฺธการติมิสายํ อชฺโฌกาเส นิสินฺโน
โหติ ฯ เทโว จ เอกเมกํ ผุสายติ ฯ

[๔๒๐] อถ โข มาโร ปาปิมา ภควโต ภยํ ฉมฺภิตตฺตํ โลมหํสํ
อุปฺปาเทตุกาโม มหนฺตํ หตฺถิราชวณฺณํ อภินิมฺมินิตฺวา เยน ภควา
เตนุปสงฺกมิ ฯ เสยฺยถาปิ นาม มหาอริฏฺฐโก มณิ เอวมสฺส สีสํ
โหติ ฯ เสยฺยถาปิ นาม สุทฺธํ รูปิยํ เอวมสฺส ทนฺตา โหนฺติ ฯ
เสยฺยถาปิ นาม มหตี นงฺคลีสา เอวมสฺส โสณฺโฑ โหติ ฯ

[๔๒๑] อถ โข ภควา มาโร อยํ ปาปิมา อิติ วิทิตฺวา
มารํ ปาปิมนฺตํ คาถาย อชฺฌภาสิ
สํสารํ ๓ ทีฆมทฺธานํ วณฺณํ กตฺวา สุภาสุภํ
อลนฺเต เตน ปาปิม นิหโต ตฺวมสิ อนฺตกาติ ฯ
#๑ ม. อมรํ ฯ ๒ ยุ. สพฺพา นตฺถาวหํ โหติ ฯ ๓ โป. ม. สํสรํ ฯ
อถ โข มาโร ปาปิมา ชานาติ มํ ภควา ชานาติ มํ สุคโตติ
ทุกฺขี ทุมฺมโน ตตฺเถวนฺตรธายีติ ฯ
ตติยํ สุภสุตฺตํ

[๔๒๒] เอวมฺเม สุตํ เอกํ สมยํ ภควา อุรุเวลายํ วิหรติ
นชฺชา เนรญฺชราย ตีเร อชปาลนิโคฺรเธ ปฐมาภิสมฺพุทฺโธ ฯ เตน
โข ปน สมเยน ภควา รตฺตนฺธการติมิสายํ อชฺโฌกาเส นิสินฺโน
โหติ ฯ เทโว จ เอกเมกํ ผุสายติ ฯ

[๔๒๓] อถ โข มาโร ปาปิมา ภควโต ภยํ ฉมฺภิตตฺตํ โลมหํสํ
อุปฺปาเทตุกาโม เยน ภควา เตนุปสงฺกมิ อุปสงฺกมิตฺวา ภควโต
อวิทูเร อุจฺจาวจา วณฺณนิภา อุปทํเสติ สุภา เจว อสุภา จ ฯ

[๔๒๔] อถ โข ภควา มาโร อยํ ปาปิมา อิติ วิทิตฺวา
มารํ ปาปิมนฺตํ คาถาหิ อชฺฌภาสิ
สํสารํ ทีฆมทฺธานํ วณฺณํ กตฺวา สุภาสุภํ
อลนฺเต เตน ปาปิม นิหโต ตฺวมสิ อนฺตก
เย จ กาเยน วาจาย มนสา จ สุสํวุตา
น เต มารวสานุคา น เต มารสฺส ปจฺจคูติ ๑ ฯ
อถ โข มาโร ปาปิมา ฯเปฯ ตตฺเถวนฺตรธายีติ ฯ
จตุตฺถํ ปฐมปาสสุตฺตํ

[๔๒๕] เอวมฺเม สุตํ เอกํ สมยํ ภควา พาราณสิยํ วิหรติ
อิสิปตเน มิคทาเย ฯ ตตฺร โข ภควา ภิกฺขู อามนฺเตสิ ภิกฺขโวติ ฯ
#๑ ม. ปทฺธคู ฯ
ภทนฺเตติ เต ภิกฺขู ภควโต ปจฺจสฺโสสุํ ฯ ภควา เอตทโวจ
มยฺหํ โข ภิกฺขเว โยนิโสมนสิการา โยนิโสสมฺมปฺปธานา อนุตฺตรา
วิมุตฺติ อนุปฺปตฺตา อนุตฺตรา วิมุตฺติ สจฺฉิกตา ตุเมฺหปิ ภิกฺขเว
โยนิโสมนสิการา โยนิโสสมฺมปฺปธานา อนุตฺตรํ วิมุตฺตึ อนุปาปุณาถ
อนุตฺตรํ วิมุตฺตึ สจฺฉิกโรถาติ ฯ

[๔๒๖] อถ โข มาโร ปาปิมา เยน ภควา เตนุปสงฺกมิ
อุปสงฺกมิตฺวา ภควนฺตํ คาถาย อชฺฌภาสิ
พนฺโธสิ ๑ มารปาเสน เย ทิพฺพา เย จ มานุสา
มารพนฺธนพนฺโธสิ น เม สมณ โมกฺขสีติ ฯ