[๓๕๗] อจฺฉริยํ ภนฺเต อพฺภูตํ ภนฺเต ยาว สุภาสิตญฺจิทํ
ภนฺเต ภควตา ทุชฺชานํ โข เอตํ มหาราช ตยา คิหินา
กามโภคินา ฯเปฯ ปญฺญวตา โน ทุปฺปญฺเญนาติ เอเต ภนฺเต
มม ปุริสา จารา ๑ โอจรกา ๒ ชนปทํ โอจริตฺวา อาคจฺฉนฺติ เตหิ
ปฐมํ โอจิณฺณํ อหํ ปจฺฉา โอหยิสฺสามิ ๓ อิทานิ เต ภนฺเต
ตํ รโชชลฺลํ ปวาเหตฺวา สุนฺหาตา สุวิลิตฺตา กปฺปิตเกสมสฺสู
โอทาตวตฺถวสนา ปญฺจหิ กามคุเณหิ สมปฺปิตา สมงฺคิภูตา มํ
ปริจารยนฺตีติ ฯ

[๓๕๘] อถ โข ภควา เอตมตฺถํ วิทิตฺวา ตายํ เวลายํ
อิมา คาถาโย อภาสิ
น วณฺณรูเปน นโร สุชาโต ๔
น วิสฺสเส อิตฺตรทสฺสเนน
สุสญฺญตานญฺหิ วิยญฺชเนน
อสญฺญตา โลกมิมํ จรนฺติ
ปฏิรูปโก มตฺติกกุณฺฑโล จ ๕
โลหทฺธมาโส ๖ จ ๗ สุวณฺณฉนฺโน
#๑ สี. โจรา ฯ ๒ สี. โอกจราติ วา โอกาจราติ วา ปาโฐ ฯ ๓ สี. โอยายิสฺสามีติปิ
#โอภายิสฺสามีติปิ ปาโฐ ฯ ม. ยุ. โอสาปยิสฺสามิ ฯ ๔ ม. ยุ. สุชาโน ฯ ๕ สี. ยุ.
#ว. ฯ ๖ โป. ม. ยุ. โลหฑฺฒมาโส ฯ ๗ สี. ยุ. ว. ฯ
จรนฺติ โลเก ๑ ปริวารฉนฺนา
อนฺโต อสุทฺธา พหิ โสภมานาติ ฯ
ทุติยํ ปญฺจราชสุตฺตํ

[๓๕๙] สาวตฺถิยํ วิหรติ … เตน โข ปน สมเยน ปญฺจนฺนํ
ราชูนํ ปเสนทิปมุขานํ ปญฺจหิ กามคุเณหิ สมปฺปิตานํ สมงฺคิภูตานํ
ปริจารยมานานํ อยมนฺตรากถา อุทปาทิ กึ นุ โข กามานํ
อคฺคนฺติ ฯ ตเตฺรกจฺเจ เอวมาหํสุ รูปา กามานํ อคฺคนฺติ ฯ
เอกจฺเจ เอวมาหํสุ สทฺทา กามานํ อคฺคนฺติ ฯ เอกจฺเจ เอวมาหํสุ
คนฺธา กามานํ อคฺคนฺติ ฯ เอกจฺเจ เอวมาหํสุ รสา กามานํ
อคฺคนฺติ ฯ เอกจฺเจ เอวมาหํสุ โผฏฺฐพฺพา กามานํ อคฺคนฺติ ฯ
ยโต โข เต ราชาโน นาสกฺขึสุ อญฺญมญฺญํ สญฺญาเปตุํ อถ
โข ราชา ปเสนทิโกสโล เต ราชาโน เอตทโวจ อายาม
มาริสา เยน ภควา เตนุปสงฺกมิสฺสาม อุปสงฺกมิตฺวา ภควนฺตํ
เอตมตฺถํ ปฏิปุจฺฉิสฺสาม ยถา โน ภควา พฺยากริสฺสติ ตถา นํ
ธาเรยฺยามาติ ๒ ฯ เอวํ มาริสาติ โข เต ราชาโน รญฺโญ
ปเสนทิโกสลสฺส ปจฺจสฺโสสุํ ฯ

[๓๖๐] อถ โข เต ปญฺจ ราชาโน ปเสนทิปมุขา เยน
ภควา เตนุปสงฺกมึสุ อุปสงฺกมิตฺวา ภควนฺตํ อภิวาเทตฺวา เอกมนฺตํ
นิสีทึสุ ฯ เอกมนฺตํ นิสินฺโน โข ราชา ปเสนทิโกสโล ภควนฺตํ
#๑ สี. ยุ. เอเก ฯ ๒ ม. ธาเรสฺสนฺตีติ ฯ
เอตทโวจ อิธ ภนฺเต อมฺหากํ ปญฺจนฺนํ ราชูนํ ปญฺจหิ
กามคุเณหิ สมปฺปิตานํ สมงฺคิภูตานํ ปริจารยมานานํ อยมนฺตรากถา
อุทปาทิ กึ นุ โข กามานํ อคฺคนฺติ เอกจฺเจ เอวมาหํสุ
รูปา กามานํ อคฺคนฺติ เอกจฺเจ เอวมาหํสุ สทฺทา กามานํ
อคฺคนฺติ เอกจฺเจ เอวมาหํสุ คนฺธา กามานํ อคฺคนฺติ เอกจฺเจ
เอวมาหํสุ รสา กามานํ อคฺคนฺติ เอกจฺเจ เอวมาหํสุ โผฏฺฐพฺพา
กามานํ อคฺคนฺติ กึ นุ โข ภนฺเต กามานํ อคฺคนฺติ ฯ

[๓๖๑] มนาปปริยนฺตํ ขฺวาหํ มหาราช ปญฺจสุ กามคุเณสุ
อคฺคนฺติ วทามิ เย จ ๑ มหาราช รูปา เอกจฺจสฺส มนาปา
โหนฺติ เต จ ๒ รูปา เอกจฺจสฺส อมนาปา โหนฺติ เยหิ จ
โส รูเปหิ อตฺตมโน โหติ ปริปุณฺณสงฺกปฺโป โส เตหิ
รูเปหิ อญฺญํ รูปํ อุตฺตริตรํ วา ปณีตตรํ วา น ปตฺเถติ
เต ตสฺส รูปา ปรมา โหนฺติ เต ตสฺส รูปา อนุตฺตรา
โหนฺติ ฯ เย จ มหาราช สทฺทา … เย จ มหาราช คนฺธา …
เย จ มหาราช รสา … เย จ มหาราช โผฏฺฐพฺพา เอกจฺจสฺส
มนาปา โหนฺติ เต จ โผฏฺฐพฺพา เอกจฺจสฺส อมนาปา โหนฺติ
เยหิ จ โส โผฏฺฐพฺเพหิ อตฺตมโน โหติ ปริปุณฺณสงฺกปฺโป
โส เตหิ โผฏฺฐพฺเพหิ อญฺญํ โผฏฺฐพฺพํ อุตฺตริตรํ วา ปณีตตรํ
วา น ปตฺเถติ เต ตสฺส โผฏฺฐพฺพา ปรมา โหนฺติ เต
#๑ สี. ตญฺเจ ฯ ม. ยุ. เต จ ฯ ๒ สี. ว. ฯ ๓ ม. ยุ. โย ฯ
ตสฺส โผฏฺฐพฺพา อนุตฺตรา โหนฺตีติ ฯ

[๓๖๒] เตน โข ปน สมเยน จนฺทนงฺคลิโก ๑ อุปาสโก ตสฺสํ
ปริสายํ นิสินฺโน โหติ ฯ อถ โข จนฺทนงฺคลิโก อุปาสโก
อุฏฺฐายาสนา เอกํสํ อุตฺตราสงฺคํ กริตฺวา เยน ภควา เตนญฺชลึ
ปณาเมตฺวา ภควนฺตํ เอตทโวจ ปฏิภาติ มํ ภควา ปฏิภาติ มํ
สุคตาติ ฯ ปฏิภาตุ ตํ จนฺทนงฺคลิกาติ ภควา อโวจ ฯ อถ โข
จนฺทนงฺคลิโก อุปาสโก ภควนฺตํ ๒ สมฺมุขา ตทนุรูปาย คาถาย
อภิตฺถวิ
ปทุมํ ยถา โกกนทํ สุคนฺธํ
ปาโต สิยา ผุลฺลมวีตคนฺธํ
องฺคีรสํ ปสฺส วิโรจมานํ
ตปนฺตมาทิจฺจมิวนฺตลิกฺเขติ ฯ

[๓๖๓] อถ โข เต ปญฺจ ราชาโน จนฺทนงฺคลิกํ อุปาสกํ
ปญฺจหิ อุตฺตราสงฺเคหิ อจฺฉาเทสุํ ฯ อถ โข จนฺทนงฺคลิโก อุปาสโก
เตหิ ปญฺจหิ อุตฺตราสงฺเคหิ ภควนฺตํ อจฺฉาเทสีติ ฯ
ตติยํ โทณปากสุตฺตํ

[๓๖๔] สาวตฺถิยํ วิหรติ … เตน โข ปน สมเยน ราชา
ปเสนทิโกสโล โทณปากสุธํ ๓ ภุญฺชติ ฯ อถ โข ราชา
#๑ สี. จนฺทนงฺกลิโกติ ปาโฐ ทิสฺสติ ฯ อ. จนฺทนงฺคลิโย ฯ ๒ ภควโตติปิ ปาโฐ ฯ
#๓ ม. โทณปากกุรํ ฯ โป. ยุ. โทณปากสุทํ ฯ
ปเสนทิโกสโล ภุตฺตาวี มหสฺสาสี เยน ภควา เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ

[๓๖๕] อถ โข ภควา ตํ ๑ ราชานํ ปเสนทิโกสลํ ภุตฺตาวึ
มหสฺสาสึ วิทิตฺวา ตายํ เวลายํ อิมํ คาถํ อภาสิ
มนุชสฺส สทา สติมโต
มตฺตํ ชานโต ลทฺธโภชเน
ตนุกสฺส ๒ ภวนฺติ เวทนา
สณิกํ ชีรติ อายุ ปาลยนฺติ ฯ

[๓๖๖] เตน โข ปน สมเยน สุทสฺสโน มาณโว รญฺโญ
ปเสนทิโกสลสฺส ปิฏฺฐิโต ฐิโต โหติ ฯ อถ โข ราชา ปเสนทิโกสโล
สุทสฺสนํ มาณวํ อามนฺเตสิ เอหิ ตฺวํ ตาต สุทสฺสน ภควโต
สนฺติเก อิมํ คาถํ ปริยาปุณิตฺวา มม ภตฺตาภิหาเร ภาส
อหญฺจ เต เทวสิกํ กหาปณสตํ นิจฺจภตฺตํ ๓ ปวตฺตยิสฺสามีติ ฯ
ปรมํ โภติ ๔ โข สุทสฺสโน มาณโว รญฺโญ ปเสนทิโกสลสฺส
ปฏิสฺสุณิตฺวา ภควโต สนฺติเก อิมํ คาถํ ปริยาปุณิตฺวา รญฺโญ
ปเสนทิโกสลสฺส ภตฺตาภิหาเร [๕]- ภาสติ
มนุชสฺส สทา สติมโต
มตฺตํ ชานโต ลทฺธโภชเน
#๑ โป. ม. ตนฺติ นตฺถิ ฯ ๒ ยุ. ตนุ ตสฺส ฯ ๓ นิจฺจภิกฺขนฺติปิ ปาโฐ ฯ
#๔ ยุ. เอวํ เทวาติ ฯ ๕ โป. ม. ยุ เอตฺถนฺตเร สุทนฺติ ทิสฺสติ ฯ
ตนุกสฺส ภวนฺติ เวทนา
สณิกํ ชีรติ อายุ ปาลยนฺติ ฯ