[๓๔๗] อถ โข ราชา ปเสนทิโกสโล ปาสาทา โอโรหิตฺวา ๑
เยน ภควา เตนุปสงฺกมิ อุปสงฺกมิตฺวา ภควนฺตํ อภิวาเทตฺวา
เอกมนฺตํ นิสีทิ ฯ เอกมนฺตํ นิสินฺโน โข ราชา ปเสนทิโกสโล
ภควนฺตํ เอตทโวจ อิธาหํ ภนฺเต มลฺลิกาย เทวิยา สทฺธึ
อุปริปาสาทวรคโต มลฺลิกํ เทวึ เอตทโวจํ อตฺถิ นุ โข มลฺลิเก
#๑ สี. โอตริตฺวา ฯ
โก จญฺโญ อตฺตนา ปิยตโรติ เอวํ วุตฺเต ภนฺเต มลฺลิกา เทวี
มํ เอตทโวจ นตฺถิ โข เม มหาราช โก จญฺโญ อตฺตนา
ปิยตโรติ ๑ ตุยฺหํ ปน มหาราช อตฺถญฺโญ โกจิ อตฺตนา ปิยตโรติ
เอวํ วุตฺตาหํ ภนฺเต มลฺลิกํ เทวึ เอตทโวจํ มยฺหมฺปิ โข
มลฺลิเก นตฺถญฺโญ โกจิ อตฺตนา ปิยตโรติ ฯ

[๓๔๘] อถ โข ภควา เอตมตฺถํ วิทิตฺวา ตายํ เวลายํ อิมํ
คาถํ อภาสิ
สพฺพา ทิสา อนุปริคมฺม เจตสา
เนวชฺฌคา ปิยตรมตฺตนา กฺวจิ
เอวํ ปิโย ปุถุ อตฺตา ปเรสํ
ตสฺมา น หึเส ปรํ อตฺตกาโมติ ฯ
นวมํ ยญฺญสุตฺตํ

[๓๔๙] สาวตฺถิยํ … เตน โข ปน สมเยน รญฺโญ
ปเสนทิโกสลสฺส มหายญฺโญ ปจฺจุปฏฺฐิโต โหติ ฯ ปญฺจ จ อุสภสตานิ
ปญฺจ จ วจฺฉตรสตานิ ปญฺจ จ วจฺฉตริสตานิ ปญฺจ จ อชสตานิ
ปญฺจ จ อุรพฺภสตานิ ถูณูปนีตานิ โหนฺติ ยญฺญตฺถาย ฯ เยปิสฺส
เต โหนฺติ ทาสาติ วา ๒ เปสฺสาติ วา กมฺมกราติ วา เตปิ
ทณฺฑตชฺชิตา ภยตชฺชิตา อสฺสุมุขา รุทมานา ปริกมฺมานิ กโรนฺติ ฯ

[๓๕๐] อถ โข สมฺพหุลา ภิกฺขู ปุพฺพณฺหสมยํ นิวาเสตฺวา
#๑ ม. อิติสทฺโท นตฺถิ ฯ ๒ ม. ทาสีติ วาติ อีทิโส ปาโฐ ทิสฺสติ ฯ
ปตฺตจีวรมาทาย สาวตฺถึ ปิณฺฑาย ปวิสึสุ สาวตฺถิยํ ปิณฺฑาย
จริตฺวา ปจฺฉาภตฺตํ ปิณฺฑปาตปฏิกฺกนฺตา เยน ภควา เตนุปสงฺกมึสุ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทึสุ ฯ เอกมนฺตํ
นิสินฺนา โข เต ภิกฺขู ภควนฺตํ เอตทโวจุํ อิธ ภนฺเต รญฺโญ
ปเสนทิโกสลสฺส มหายญฺโญ ปจฺจุปฏฺฐิโต โหติ ๑ ปญฺจ จ
อุสภสตานิ ปญฺจ จ วจฺฉตรสตานิ ปญฺจ จ วจฺฉตริสตานิ ปญฺจ จ
อชสตานิ ปญฺจ จ อุรพฺภสตานิ ถูณูปนีตานิ โหนฺติ ยญฺญตฺถาย
เยปิสฺส เต โหนฺติ ๒ ทาสาติ วา เปสฺสาติ วา กมฺมกราติ วา
เตปิ ทณฺฑตชฺชิตา ภยตชฺชิตา อสฺสุมุขา รุทมานา ปริกมฺมานิ
กโรนฺตีติ ฯ

[๓๕๑] อถ โข ภควา เอตมตฺถํ วิทิตฺวา ตายํ เวลายํ อิมา
คาถาโย อภาสิ
อสฺสเมธํ ปุริสเมธํ สมฺมาปาสํ วาชเปยฺยํ ๓
นิรคฺคฬํ มหายญฺญา ๔ มหารมฺภา น เต โหนฺติ มหปฺผลา
อเชฬกา จ คาโว จ วิวิธา ยตฺถ หญฺญเร
น ตํ สมฺมคฺคตา ยญฺญํ อุปยนฺติ มเหสิโน
เย จ ยญฺญา นิรารมฺภา ยชนฺตานุกุลํ สทา
อเชฬกา จ คาโว จ วิวิธา เนตฺถ หญฺญเร
#๑ สี. อยํ ปาโฐ น ทิสฺสติ ฯ ๒ สี. อยํ ปาโฐ น ทิสฺสติ ฯ ๓ อ. ราชเปยฺยํ ฯ
#๔ ม. ยุ. อยํ ปาโฐ น ทิสฺสติ ฯ
เอตํ สมฺมคฺคตา ยญฺญํ อุปยนฺติ มเหสิโน
เอตํ ยเชถ เมธาวี เอโส ยญฺโญ มหปฺผโล
เอตญฺหิ ยชมานสฺส เสยฺโย โหติ น ปาปิโย
ยญฺโญ จ วิปุโล โหติ ปสีทนฺติ จ เทวตาติ ฯ
ทสมํ พนฺธนสุตฺตํE

[๓๕๒] เตน โข ปน สมเยน รญฺญา ปเสนทิโกสเลน
มหาชนกาโย พนฺธาปิโต โหติ ฯ อปฺเปกจฺเจ รชฺชูหิ อปฺเปกจฺเจ
อทฺทูหิ ๑ อปฺเปกจฺเจ สงฺขลิกาหิ ฯ อถ โข สมฺพหุลา ภิกฺขู
ปุพฺพณฺหสมยํ นิวาเสตฺวา ปตฺตจีวรมาทาย สาวตฺถึ ปิณฺฑาย
ปวิสึสุ สาวตฺถิยํ ปิณฺฑาย จริตฺวา ๒ ปจฺฉาภตฺตํ ปิณฺฑปาตปฏิกฺกนฺตา
เยน ภควา เตนุปสงฺกมึสุ อุปสงฺกมิตฺวา ภควนฺตํ
อภิวาเทตฺวา เอกมนฺตํ นิสีทึสุ ฯ เอกมนฺตํ นิสินฺนา โข เต
ภิกฺขู ภควนฺตํ เอตทโวจุํ อิธ ภนฺเต รญฺญา ปเสนทิโกสเลน
มหาชนกาโย พนฺธาปิโต โหติ ๓ อปฺเปกจฺเจ รชฺชูหิ อปฺเปกจฺเจ
อทฺทูหิ อปฺเปกจฺเจ สงฺขลิกาหีติ ฯ

[๓๕๓] อถ โข ภควา เอตมตฺถํ วิทิตฺวา ตายํ เวลายํ อิมา
คาถาโย อภาสิ
#๑ สี. ยุ. อนฺทูหิ ฯ ๒ สี. ปวิสิตฺวา ฯ ๓ สี. ม. ยุ. อยํ ปาโฐ น ทิสฺสติ ฯ
น ตํ ทฬฺหํ พนฺธนมาหุ ธีรา
ยทายสํ ทารุชํ ปพฺพชญฺจ ๑
สารตฺตรตฺตา มณิกุณฺฑเลสุ
ปุตฺเตสุ ทาเรสุ จ ยา อเปกฺขา
เอตํ ทฬฺหํ พนฺธนมาหุ ธีรา
โอหารินํ สิถิลํ ทุปฺปมุญฺจํ
เอตมฺปิ เฉตฺวาน ปริพฺพชนฺติ
อนเปกฺขิโน กามสุขํ ปหายาติ ฯ
ปฐโม วคฺโค ฯ
ตสฺสุทฺทานํ
รหโท ๒ ปุริโส ราชา ปิยํ อตฺตานรกฺขิตา ๓
อปฺปกา อตฺถกรณา ๔ มลฺลิกา ยญฺญพนฺธนนฺติ ฯ
________________
#๑ พพฺพชญฺจาติ วา ปาโฐ ฯ ๒ ม. ยุ. ทหโร ฯ ๓ สี. อตฺเตน ฯ ม. ยุ.
#ปิยอตฺตานรกฺขิโต ฯ ๔ ม. อฏฺฏกรณํ ฯ
ทุติยวคฺโค ทุติโย
_______
ปฐมํ ชฏิลสุตฺตํ

[๓๕๔] เอกํ สมยํ ภควา สาวตฺถิยํ วิหรติ ปุพฺพาราเม
มิคารมาตุ ปาสาเท ฯ เตน โข ปน สมเยน ภควา สายณฺหสมยํ
ปฏิสลฺลานา วุฏฺฐิโต พหิทฺวารโกฏฺฐเก นิสินฺโน โหติ ฯ อถ โข
ราชา ปเสนทิโกสโล เยน ภควา เตนุปสงฺกมิ อุปสงฺกมิตฺวา
ภควนฺตํ อภิวาเทตฺวา เอกมนฺตํ นิสีทิ ฯ

[๓๕๕] เตน โข ปน สมเยน สตฺต จ ๑ ชฏิลา สตฺต จ
นิคนฺถา สตฺต จ อเจลา ๒ สตฺต จ เอกสาฏกา สตฺต จ
ปริพฺพาชกา ปรุฬฺหกจฺฉนขโลมา ขาริวิวิธมาทาย ๓ ภควโต อวิทูเร
อติกฺกมนฺติ ฯ อถ โข ราชา ปเสนทิโกสโล อุฏฺฐายาสนา เอกํสํ
อุตฺตราสงฺคํ กริตฺวา ทกฺขิณชานุมณฺฑลํ ปฐวิยํ นิหนฺโต ๔ เยน เต
สตฺต จ ชฏิลา สตฺต จ นิคนฺถา สตฺต จ อเจลา ๕ สตฺต จ
เอกสาฏกา สตฺต จ ปริพฺพาชกา เตนญฺชลึ ปณาเมตฺวา ติกฺขตฺตุํ
นามํ สาเวสิ ราชาหํ ภนฺเต ปเสนทิโกสโล … ราชาหํ ภนฺเต
ปเสนทิโกสโลติ ฯ อถ โข ราชา ปเสนทิโกสโล อจิรปกฺกนฺเตสุ
#สี. จกาโร วชฺชิโต ฯ ๒-๕ ม. อเจลกา ฯ ๓ สี. วิวิธํ ฯ ยุ. ขาริวิธํ ฯ
#ทาริวิธํ ฯ ๔ สี. ยุ. นิหนฺตฺวา ฯ
เตสุ ๑ สตฺตสุ จ ๒ ชฏิเลสุ สตฺตสุ จ นิคนฺเถสุ สตฺตสุ จ อเจเลสุ
สตฺตสุ จ เอกสาฏเกสุ สตฺตสุ จ ปริพฺพาชเกสุ เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ
เอกมนฺตํ นิสินฺโน โข ราชา ปเสนทิโกสโล ภควนฺตํ เอตทโวจ
เย เต ๓ ภนฺเต โลเก อรหนฺโต วา อรหตฺตมคฺคํ วา สมาปนฺนา
เอเต เตสํ อญฺญตราติ ฯ

[๓๕๖] ทุชฺชานํ โข เอตํ มหาราช ตยา คิหินา กามโภคินา
ปุตฺตสมฺพาธสยนํ อชฺฌาวสนฺเตน กาสิกจนฺทนํ ปจฺจนุโภนฺเตน
มาลาคนฺธวิเลปนํ ธารยนฺเตน ชาตรูปรชตํ สาทิยนฺเตน อิเม วา
อรหนฺโต อิเม วา อรหตฺตมคฺคํ สมาปนฺนาติ สํวาเสน โข
มหาราช สีลํ เวทิตพฺพํ ตญฺจ โข ทีเฆน อทฺธุนา น อิตรํ
มนสิกโรตา โน อมนสิการา ๔ ปญฺญวตา โน ทุปฺปญฺเญน
สํโวหาเรน โข มหาราช โสเจยฺยํ เวทิตพฺพํ ตญฺจ โข ทีเฆน
อทฺธุนา น อิตรํ มนสิกโรตา โน อมนสิการา ปญฺญวตา
โน ทุปฺปญฺเญน อาปทาสุ โข มหาราช ถาโม เวทิตพฺโพ
โส จ โข ทีเฆน อทฺธุนา น อิตรํ มนสิกโรตา โน อมนสิการา
ปญฺญวตา โน ทุปฺปญฺเญน สากจฺฉาย โข มหาราช ปญฺญา
เวทิตพฺพา สา จ โข ทีเฆน อทฺธุนา น อิตรํ มนสิกโรตา
#๑ สี. เตสูติ ปาโฐ นตฺถิ ฯ ๒ สี. จกาโร วชฺชิโต ฯ ๓ สี. เยน เต ฯ
#๔ สี. ยุ. อมนสิกโรตา ฯ
โน อมนสิการา ปญฺญวตา โน ทุปฺปญฺเญนาติ ฯ