[๓๑๗] อถ โข อาโกฏโก เทวปุตฺโต นานาติตฺถิเย อารพฺภ
ภควโต สนฺติเก อิมํ คาถํ อภาสิ
ปกุธโก กาติยาโน นิคนฺโถ
เย จาปิเม มกฺขลิปูรณาเส
คณสฺส สตฺถาโร สมญฺญปตฺตา
นหิ นูน เต สปฺปุริเสหิ ทูเรติ ฯ

[๓๑๘] อถ โข เวฏมฺพรี เทวปุตฺโต อาโกฏกํ เทวปุตฺตํ
คาถาย อชฺฌภาสิ
สห รจิเตน ๑ ฉโว ๒ สิคาโล
น โกฏฺฐุโก ๓ สีหสโม กทาจิ
นคฺโค มุสาวาทิ คณสฺส สตฺถา
สงฺกสฺสราจาโร น สตํ สริกฺโขติ ฯ

[๓๑๙] อถ โข มาโร ปาปิมา เวฏมฺพรึ เทวปุตฺตํ อนฺวาวิสิตฺวา
ภควโต สนฺติเก อิมํ คาถํ อภาสิ
ตโปชิคุจฺฉาย อายุตฺตา ปาลยํ ปวิเวกิยํ
รูเป จ เย นิวิฏฺฐาเส เทวโลกาภินนฺทิโน
เต เจ ๔ สมฺมานุสาสนฺติ ปรโลกาย มาติยาติ ฯ
#๑ สี. ยุ. สคารเวนาปิ ฯ ม. สหาจริเตน ฯ ๒ สี. ชโว ฯ ๓ สี. โกตฺถุโก ฯ
#ยุ. กุตฺถโก ฯ อ. กุฏฺฐโก ฯ ๔ ม. ยุ. เว. ฯ

[๓๒๐] อถ โข ภควา มาโร อยํ ปาปิมา อิติ วิทิตฺวา
มารํ ปาปิมนฺตํ คาถาย ปจฺจภาสิ
เยเกจิ รูปา อิธ วา หุรํ วา
เย จนฺตลิกฺขสฺมิ ปภาสวณฺณา
สพฺเพว เต เต นมุจิปฺปสตฺถา
อามิสํว มจฺฉานํ วธาย ขิตฺตาติ ฯ

[๓๒๑] อถ โข มาณวคามิโย เทวปุตฺโต ภควนฺตํ อารพฺภ
ภควโต สนฺติเก อิมา คาถาโย อภาสิ
วิปุโล ราชคหิยานํ คิริ เสฏฺโฐ ปวุจฺจติ
เสโต หิมวตํ เสฏฺโฐ อาทิจฺโจ อฆคามินํ
สมุทฺโททธินํ เสฏฺโฐ นกฺขตฺตานญฺจ ๑ จนฺทิมา
สเทวกสฺส โลกสฺส พุทฺโธ อคฺโค ปวุจฺจตีติ ฯ
นานาติตฺถิยวคฺโค ตติโย ฯ
ตสฺสุทฺทานํ
สิโว เขโม จ เสรี จ ฆฏิ ชนฺตุ จ โรหิโต
นนฺโท นนฺทิวิสาโล จ สุสิโม นานาติตฺถิเยน เต ทสาติ ฯ
เทวปุตฺตสํยุตฺตํ นิฏฺฐิตํ ฯ
__________
#๑ ม. ยุ. … ว ฯ
โกสลสํยุตฺตํ
ปฐมวคฺโค ปฐโม
_______
ปฐมํ ทหรสุตฺตํ

[๓๒๒] เอวมฺเม สุตํ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ อถ โข ราชา ปเสนทิโกสโล
เยน ภควา เตนุปสงฺกมิ อุปสงฺกมิตฺวา ภควตา สทฺธึ สมฺโมทิ
สมฺโมทนียํ กถํ สาราณียํ วีติสาเรตฺวา เอกมนฺตํ นิสีทิ ฯ

[๓๒๓] เอกมนฺตํ นิสินฺโน โข ราชา ปเสนทิโกสโล ภควนฺตํ
เอตทโวจ ภวํปิ โน โคตโม อนุตฺตรํ สมฺมาสมฺโพธึ อภิสมฺพุทฺโธติ
ปฏิชานาตีติ ๑ ฯ ยํ หิ ตํ มหาราช สมฺมา วทมาโน วเทยฺย
อนุตฺตรํ สมฺมาสมฺโพธึ อภิสมฺพุทฺโธติ มมนฺตํ ๒ สมฺมา วทมาโน
วเทยฺย อหํ หิ มหาราช อนุตฺตรํ สมฺมาสมฺโพธึ อภิสมฺพุทฺโธติ ฯ

[๓๒๔] เยปิ เต โภ โคตม สมณพฺราหฺมณา สงฺฆิโน คณิโน
คณาจริยา ญาตา ยสสฺสิโน ติตฺถกรา สาธุสมฺมตา พหุชนสฺส
เสยฺยถีทํ ปูรโณ กสฺสโป มกฺขลิ โคสาโล นิคนฺโถ นาฏปุตฺโต
สญฺชโย เวลฏฺฐปุตฺโต ปกุโธ ๓ กจฺจายโน อชิโต เกสกมฺพโล ๔ เตปิ
#๑ สี. อิติ ปฏิชานาตีติ ปาฐทฺวยํ น ปญฺญายติ ฯ ๒ ม. มเมว ตํ ฯ
#๓ สี. ยุ. กกุโธ ฯ ๔ สี. เกสกมฺพลี ฯ
มยา อนุตฺตรํ สมฺมาสมฺโพธึ อภิสมฺพุทฺโธติ ปฏิชานาถาติ ปุฏฺฐาฝ
สมานา น อนุตฺตรํ สมฺมาสมฺโพธึ อภิสมฺพุทฺโธติ ปฏิชานนฺติ
กึ ปน ภวํ โคตโม ทหโร เจว ชาติยา นโว จ ปพฺพชฺชายาติ ฯ

[๓๒๕] จตฺตาโร โขเม มหาราช ทหราติ น อุญฺญาตพฺพา
ทหราติ น ปริโภตพฺพา กตเม จตฺตาโร ขตฺติโย โข มหาราช
ทหโรติ น อุญฺญาตพฺโพ ทหโรติ น ปริโภตพฺโพ อุรโค โข
มหาราช ทหโรติ น อุญฺญาตพฺโพ ทหโรติ น ปริโภตพฺโพ อคฺคิ
โข มหาราช ทหโรติ น อุญฺญาตพฺโพ ทหโรติ น ปริโภตพฺโพ
ภิกฺขุ โข มหาราช ทหโรติ น อุญฺญาตพฺโพ ทหโรติ น
ปริโภตพฺโพ อิเม โข มหาราช จตฺตาโร ทหราติ น อุญฺญาตพฺพา
ทหราติ น ปริโภตพฺพาติ ฯ

[๓๒๖] อิทมโวจ ภควา อิทํ วตฺวาน สุคโต อถาปรํ
เอตทโวจ สตฺถา
ขตฺติยํ ชาติสมฺปนฺนํ อภิชาตํ ยสสฺสินํ
ทหโรติ นาวชาเนยฺย น นํ ปริภเว นโร
ฐานมฺหิ โส มนุสฺสินฺโท รชฺชํ ลทฺธาน ขตฺติโย
โส กุทฺโธ ราชทณฺเฑน ตสฺมึ ปกฺกมเต ภุสํ
ตสฺมา ตํ ปริวชฺเชยฺย รกฺขํ ชีวิตมตฺตโน
คาเม วา ยทิ วารญฺเญ ยตฺถ ปสฺเส ภุชงฺคมํ
ทหโรติ นาวชาเนยฺย น นํ ปริภเว นโร
อุจฺจาวเจหิ วณฺเณหิ อุรโค จรติ เตชสี
โส อาสชฺช ฑํเส พาลํ นรํ นาริญฺจ เอกทา
ตสฺมา ตํ ปริวชฺเชยฺย รกฺขํ ชีวิตมตฺตโน
ปหูตภกฺขํ ชาลินํ ปาวกํ กณฺหวตฺตนึ
ทหโรติ นาวชาเนยฺย น นํ ปริภเว นโร
ลทฺธา หิ โส อุปาทานํ มหา หุตฺวาน ปาวโก
โส อาสชฺช ฑเห พาลํ นรํ นาริญฺจ เอกทา
ตสฺมา ตํ ปริวชฺเชยฺย รกฺขํ ชีวิตมตฺตโน
วนํ ยทคฺคิ ฑหติ ปาวโก กณฺหวตฺตนี
ชายนฺติ ตตฺถ ปาโรหา อโหรตฺตานมจฺจเย
ยญฺจ โข สีลสมฺปนฺโน ภิกฺขุ ฑหติ เตชสา
น ตสฺส ปุตฺตา ปสโว ทายาทา วินฺทเร ธนํ
อนปจฺจา อทายาทา ตาลวตฺถุ ภวนฺติ เต
ตสฺมา หิ ปณฺฑิโต โปโส สมฺปสฺสํ ภยมตฺตโน ๑
ภุชงฺคมํ ปาวกญฺจ ขตฺติยญฺจ ยสสฺสินํ
ภิกฺขุญฺจ สีลสมฺปนฺนํ สมฺมเทว สมาจเรติ ฯ