[๙๗] อถ โข อปรา เทวตา ภควโต สนฺติเก อิมํ อุทานํ
อุทาเนสิ
สาธุ โข มาริส ทานํ อปฺปกสฺมึปิ สาหุ ทานํ
อปิจ สทฺธายปิ สาหุ ทานํ
ทานญฺจ ยุทฺธญฺจ สมานมาหุ
อปฺปาปิ สนฺตา พหุเก ชินนฺติ
อปฺปมฺปิ เจ สทฺทหาโน ททาติ
เตเนว โส โหติ สุขี ปรตฺถาติ ฯ

[๙๘] อถ โข อปรา เทวตา ภควโต สนฺติเก อิมํ อุทานํ
อุทาเนสิ
สาธุ โข มาริส ทานํ อปฺปกสฺมึปิ สาหุ ทานํ
สทฺธายปิ สาหุ ทานํ อปิจ ธมฺมลทฺธสฺสปิ สาหุ ทานํ
โย ธมฺมลทฺธสฺส ททาติ ทานํ
อุฏฺฐานวิริยาธิคตสฺส ชนฺตุ
อติกฺกมฺม [๑]- เวตรณึ ยมสฺส
ทิพฺพานิ ฐานานิ อุเปติ มจฺโจติ ฯ

[๙๙] อถ โข อปรา เทวตา ภควโต สนฺติเก อิมํ อุทานํ
อุทาเนสิ
สาธุ โข มาริส ทานํ อปฺปกสฺมึปิ สาหุ ทานํ
สทฺธายปิ สาหุ ทานํ ธมฺมลทฺธสฺสปิ สาหุ ทานํ
#๑ ม. ยุ. เอตฺถนฺตเร โสติ อตฺถิ ฯ
อปิจ วิเจยฺยทานํปิ สาธุ
วิเจยฺยทานํ สุคตปฺปสตฺถํ
เย ทกฺขิเณยฺยา อิธ ชีวโลเก
เอเตสุ ทินฺนานิ มหปฺผลานิ
วีชานิ วุตฺตานิ ยถา สุเขตฺเตติ ฯ

[๑๐๐] อถ โข อปรา เทวตา ภควโต สนฺติเก อิมํ อุทานํ อุทาเนสิ
สาธุ โข มาริส ทานํ อปฺปกสฺมึปิ สาหุ ทานํ
สทฺธายปิ สาหุ ทานํ ธมฺมลทฺธสฺสปิ สาหุ ทานํ
วิเจยฺยทานํปิ สาธุ อปิจ ปาเณสุปิ สาธุ สํยโม
โย ปาณภูตานิ ๑ อเหฐยํ จรํ
ปรูปวาทา น กโรติ ปาปํ
ภีรุํ ปสํสนฺติ น หิ ตตฺถ สูรํ
ภยา หิ สนฺโต น กโรนฺติ ปาปนฺติ ฯ
อถ โข อปรา เทวตา ภควนฺตํ เอตทโวจ กสฺส นุ โข ภควา
สุภาสิตนฺติ ฯ

[๑๐๑] สพฺพาสํ โว สุภาสิตํ ปริยาเยน อปิจ มมาปิ ๒ สุณาถ
สทฺธาหิ ๓ ทานํ พหุธา ปสตฺถํ
ทานา จ ๔ โข ธมฺมปทํว เสยฺโย
#๑ ยุ. ปาณภูเตสุ ฯ ๒ ยุ. มมํปิติ ทิสฺสติ ฯ ๓ อทฺธาหีติ วา ปาโฐ ฯ
#๔ สี. ทานญฺจ ฯ
ปุพฺเพว หิ ปุพฺพตเรว สนฺโต
นิพฺพานเมวชฺฌคมม สปญฺญาติ ฯ
จตุตฺถํ นสนฺติสุตฺตํ

[๑๐๒] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯ อถ โข สมฺพหุลา สตุลฺลปกายิกา เทวตาโย
อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํๆ
โอภาเสตฺวา เยน ภควา เตนุปสงฺกมึสุ อุปสงฺกมิตฺวา ภควนฺตํ
อภิวาเทตฺวา เอกมนฺตํ อฏฺฐํสุ ฯ

[๑๐๓] เอกมนฺตํ ฐิตา โข เอกา เทวตา ภควโต สนฺติเก
อิมํ คาถํ อภาสิ
น สนฺติ กามา มนุเชสุ นิจฺจา
สนฺตีธ กมนียานิ เยสุ พทฺโธ
เยสุ ปมตฺโต ๑ อปุนาคมนํ
อนาคนฺตฺวา ปุริโส มจฺจุเธยฺยาติ ฯ
ฉนฺทชํ อฆํ ฉนฺทชํ ทุกฺขํ
ฉนฺทวินยา อฆวินโย
อฆวินยา ทุกฺขวินโยติ ฯ
น เต กามา ยานิ จิตฺรานิ ๒ โลเก
#๑ สี. เยสุ จ พทฺโธ สุปมตฺโต ฯ ๒ สี. กามานิ จิตฺรานิ ฯ
สงฺกปฺปราโค ปุริสสฺส กาโม
ติฏฺฐนฺติ จิตฺรานิ ตเถว โลเก
อเถตฺถ ธีรา วินยนฺติ ฉนฺทํ ฯ
โกธํ ชเห วิปฺปชเหยฺย มานํ
สญฺโญชนํ สพฺพมติกฺกเมยฺย
ตํ นามรูปสฺมิมสชฺชมานํ
อกิญฺจนํ นานุปตนฺติ ทุกฺขา ฯ
ปหาสิ สงฺขํ น วิมานมาคา ๑
อจฺเฉชฺชิ ตณฺหํ อิธ นามรูเป
ตํ ฉินฺนคนฺถํ อนิฆํ นิราสํ
ปริเยสมานา นาชฺฌคมม ๒
เทวา มนุสฺสา อิธ วา หุรํ วา
สคฺเคสุ วา สพฺพนิเวสเนสูติ ฯ

[๑๐๔] ตญฺเจ หิ นาทฺทกฺขุํ ตถา วิมุตฺตํ [อิจฺจายสฺมา โมฆราชา]
เทวา มนุสฺสา อิธ วา หุรํ วา
นรุตฺตมํ อตฺถจรํ นรานํ
เย ตํ นมสฺสนฺติ ปสํสิยา เตติ ฯ

[๑๐๕] ปสํสิยา เตปิ ภวนฺติ ภิกฺขุ [โมฆราชาติ ภควา]
เย ตํ นมสฺสนฺติ ตถา วิมุตฺตํ
#๑ โป. ม. ยุ. น วิมานมชฺฌคา ฯ ๒ ยุ. น จ อชฺฌคมม ฯ
อญฺญาย ธมฺมํ วิจิกิจฺฉํ ปหาย
สงฺคาติตา ๑ เตปิ ภวนฺติ ภิกฺขูติ ฯ
ปญฺจมํ อุชฺฌานสญฺญิสุตฺตํ

[๑๐๖] เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม ฯ อถ โข สมฺพหุลา อุชฺฌานสญฺญิกา เทวตาโย
อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา
เยน ภควา เตนุปสงฺกมึสุ อุปสงฺกมิตฺวา เวหาสํ อฏฺฐํสุ ฯ