[๑๓๓๐] มาตรํ จีวรํ ยาเจ โน จ สงฺฆสฺส ๑ ปริณตํ
เกนสฺส โหติ อาปตฺติ อนาปตฺติ จ ญาตเก
ปญฺหา เมสา กุสเลหิ จินฺติตา ฯ

[๑๓๓๑] กุทฺโธ อาราธโก โหติ กุทฺโธ โหติ ครหิโย
อถ โก นาม โส ธมฺโม เยน กุทฺโธ ปสํสิโย
ปญฺหา เมสา กุสเลหิ จินฺติตา ฯ

[๑๓๓๒] ตุฏฺโฐ อาราธโก โหติ ตุฏฺโฐ โหติ ครหิโย
อถ โก นาม โส ธมฺโม เยน ตุฏฺโฐ ครหิโย
ปญฺหา เมสา กุสเลหิ จินฺติตา ฯ

[๑๓๓๓] สงฺฆาทิเสสํ ถุลฺลจฺจยํ
ปาจิตฺติยํ ปาฏิเทสนียํ
ทุกฺกฏํ อาปชฺเชยฺย เอกโต
ปญฺหา เมสา กุสเลหิ จินฺติตา ฯ

[๑๓๓๔] อุโภ ปริปุณฺณวีสติวสฺสา อุภินฺนํ
เอกุปชฺฌาโย เอกาจริโย เอกา กมฺมวาจา
เอโก อุปสมฺปนฺโน เอโก อนุปสมฺปนฺโน
ปญฺหา เมสา กุสเลหิ จินฺติตา ฯ

[๑๓๓๕] อกปฺปกตํ นปิ รชนาย รตฺตํ
#๑ ม. สงฺเฆ ฯ
เตน นิวตฺโถ เยน กามํ วเชยฺย
น จสฺส โหติ อาปตฺติ
โส จ ธมฺโม สุคเตน เทสิโต
ปญฺหา เมสา กุสเลหิ จินฺติตา ฯ

[๑๓๓๖] น เทติ นปฺปฏิคฺคณฺหาติ
ปฏิคฺคโห เตน น วิชฺชติ
อาปชฺชติ ครุกํ น ลหุกํ
ตญฺจ ปริโภคปจฺจยา
ปญฺหา เมสา กุสเลหิ จินฺติตา ฯ

[๑๓๓๗] น เทติ นปฺปฏิคฺคณฺหาติ
ปฏิคฺคโห เตน น วิชฺชติ
อาปชฺชติ ลหุกํ น ครุกํ
ตญฺจ ปริโภคปจฺจยา
ปญฺหา เมสา กุสเลหิ จินฺติตา ฯ

[๑๓๓๘] อาปชฺชติ ครุกํ สาวเสสํ
ฉาเทติ อนาทริยํ ปฏิจฺจ
น ภิกฺขุนี โน จ ผุเสยฺย วชฺชํษ
ปญฺหา เมสา กุสเลหิ จินฺติตา ฯ
เสทโมจนคาถา ๑ นิฏฺฐิตา ฯ
#๑ ยุ. เสทโมจกคาถา ฯ
ตสฺสุทฺทานํ

[๑๓๓๙] อสํวาโส อวิสฺสชฺชิ ทส จ อนุกฺขิตฺตโก
อุเปติ ธมฺมํ อุพฺภกฺขํ ๑ ตโต สญฺญาจิกา จ เทฺว
น กายิกญฺจ ครุกํ น กายิกํ สุนาสิตํ ๒
อนาลปนฺโต สิกฺขา จ อุโภ จ จตุโร ชนา
อิตฺถี เตลญฺจ นิสฺสคฺคิ ภิกฺขู จ ปทวีติโย
นิวตฺโถ จ น จ ญตฺติ น มาตรํ ปิตรํ หเน
อโจทยิตฺวา โจทยิตฺวา ฉินฺทนฺตํ สจฺจเมว จ
อธิฏฺฐิตญฺจตฺถงฺคเต น รตฺตํ น จารญฺญกํ
กายิกา วาจสิกา จ ๓ ติสฺสิตฺถี จาปิ มาตรํ
กุทฺโธ อาราธโก ตุฏฺโฐ สงฺฆาทิเสสกา ๔ อุโภ
อกปฺปกตํ น เทติ น เทตาปชฺชเต ๕ ครุํ
เสทโมจนิกา คาถา ปญฺหา วิญฺญูวิภาวิตาติ ฯ
_____________________
#๑ ม. ยุ. อุพฺภกฺขกํ ฯ ๒ ยุ. น วาจสิกํ ฯ ๓ ยุ. กายิกวาจสิกา ฯ
#๔ ม. ยุ. สงฺฆาทิเสสา จ ฯ ๕ ยุ. น เทตาปชฺชติ ฯ
ปญฺจ วคฺคา