[๑๒๖๐] กติ ปาจิตฺติยานิ สพฺพานิ นานาวตฺถุกานิ
กติวาจาย เทเสยฺย วุตฺตา อาทิจฺจพนฺธุนา ฯ
นว ปาจิตฺติยานิ สพฺพานิ นานาวตฺถุกานิ
เอกวาจาย เทเสยฺย วุตฺตา อาทิจฺจพนฺธุนา ฯ
#๑-๒ ยุ. กิตฺติกา ตตฺติกา ฯ

[๑๒๖๑] กติ ปาจิตฺติยานิ สพฺพานิ นานาวตฺถุกานิ
กิญฺจ ๑ กิตฺเตตฺวา เทเสยฺย วุตฺตา อาทิจฺจพนฺธุนา ฯ
ปญฺจ ปาจิตฺติยานิ สพฺพานิ นานาวตฺถุกานิ
วตฺถุํ กิตฺเตตฺวา เทเสยฺย วุตฺตา อาทิจฺจพนฺธุนา ฯ

[๑๒๖๒] กติ ปาจิตฺติยานิ สพฺพานิ นานาวตฺถุกานิ
กิญฺจ กิตฺเตตฺวา เทเสยฺย วุตฺตา อาทิจฺจพนฺธุนา ฯ
นว ปาจิตฺติยานิ สพฺพานิ นานาวตฺถุกานิ
วตฺถุํ กิตฺเตตฺวา เทเสยฺย วุตฺตา อาทิจฺจพนฺธุนา ฯ

[๑๒๖๓] ยาวตติยเก กติ อาปตฺติโย กติ โวหารปจฺจยา
ขาทนฺตสฺส กติ อาปตฺติโย กติ โภชนปจฺจยา ฯ
ยาวตติยเก ติสฺโส อาปตฺติโย ฉ โวหารปจฺจยา ฯ
ขาทนฺตสฺส ติสฺโส อาปตฺติโย ปญฺจ โภชนปจฺจยา ฯ

[๑๒๖๔] สพฺพา ยาวตติยกา กติ ฐานานิ คจฺฉนฺติ
กตีนญฺเจว อาปตฺติ กตีนํ อธิกรเณน จ ฯ
สพฺพา ยาวตติยกา ปญฺจ ฐานานิ คจฺฉนฺติ
ปญฺจนฺนญฺเจว อาปตฺติ ปญฺจนฺนํ อธิกรเณน จ ฯ

[๑๒๖๕] กตีนํ วินิจฺฉโย โหติ กตีนํ วูปสเมน จ
กตีนญฺเจว อนาปตฺติ กตีหิ ฐาเนหิ โสภติ ฯ
ปญฺจนฺนํ วินิจฺฉโย โหติ ปญฺจนฺนํ วูปสเมน จ
ปญฺจนฺนญฺเจว อนาปตฺติ ตีหิ ฐาเนหิ โสภติ ฯ
#๑ ยุ. กิญฺจิ ฯ

[๑๒๖๖] กติ กายิกา รตฺตึ กติ กายิกา ทิวา
นิชฺฌนฺตสฺส ๑ กติ อาปตฺติ กติ ปิณฺฑปาตปจฺจยา ฯ
เทฺว กายิกา รตฺตึ เทฺว กายิกา ทิวา
นิชฺฌนฺตสฺส ๑ เอกา อาปตฺติ เอกา ปิณฺฑปาตปจฺจยา ฯ

[๑๒๖๗] กตานิสํเส สมฺปสฺสํ ปเรสํ สทฺธาย เทสเย ๒
อุกฺขิตฺตกา กติ วุตฺตา กติ สมฺมาปวตฺตนา ๓
อฏฺฐานิสํเส สมฺปสฺสํ ปเรสํ สทฺธาย เทสเย ๒
อุกฺขิตฺตกา ตโย วุตฺตา เตจตฺตาฬีส สมฺมาวตฺตนา ฯ

[๑๒๖๘] กติฐาเน มุสาวาโท กติ ปรมนฺติ วุจฺจติ
กติ ปาฏิเทสนียา กตีนํ เทสนาย จ ฯ
ปญฺจฐาเน มุสาวาโท จุทฺทส ปรมนฺติ วุจฺจติx
ทฺวาทส ปาฏิเทสนียา จตุนฺนํ เทสนาย จ ฯ

[๑๒๖๙] กตงฺคิโก มุสาวาโท กติ อุโปสถงฺคานิ
กติ ทูเตยฺยงฺคานิ กติ ติตฺถิยวตฺตนา ฯ
อฏฺฐงฺคิโก มุสาวาโท อฏฺฐ อุโปสถงฺคานิ
อฏฺฐ ทูเตยฺยงฺคานิ อฏฺฐ ติตฺถิยวตฺตนา ฯ