[๑๒๒๐] กติ นุ โข ภนฺเต อธมฺมิกา วินยพฺยากรณาติ ฯ
ปญฺจิเม อุปาลิ อธมฺมิกา วินยพฺยากรณา ฯ กตเม ปญฺจ ฯ
อิธุปาลิ ภิกฺขุ อธมฺมํ ธมฺโมติ ปริณาเมติ ธมฺมํ อธมฺโมติ
ปริณาเมติ อวินยํ วินโยติ ปริณาเมติ นินยํ อวินโยติ
ปริณาเมติ อปฺปญฺญตฺตํ ปญฺญาเปติ ปญฺญตฺตํ สมุจฺฉินฺทติ ฯ
อิเม โข อุปาลิ ปญฺจ อธมฺมิกา วินยพฺยากรณา ฯ ปญฺจิเม
อุปาลิ ธมฺมิกา วินยพฺยากรณา ฯ กตเม ปญฺจ ฯ อิธุปาลิ
ภิกฺขุ อธมฺมํ อธมฺโมติ ปริณาเมติ ธมฺมํ ธมฺโมติ ปริณาเมติ
อวินยํ อวินโยติ ปริณาเมติ วินยํ วินโยติ ปริณาเมติ
อปฺปญฺญตฺตํ น ปญฺญาเปติ ปญฺญตฺตํ น สมุจฺฉินฺทติ ฯ อิเม
โข อุปาลิ ปญฺจ ธมฺมิกา วินยพฺยากรณาติ ฯ

[๑๒๒๑] กตีหิ นุ โข ภนฺเต องฺเคหิ สมนฺนาคโต ภตฺตุทฺเทสโก
ยถาภตํ นิกฺขิตฺโต เอวํ นิรเยติ ฯ ปญฺจหุปาลิ องฺเคหิ สมนฺนาคโต
ภตฺตุทฺเทสโก ยถาภตํ นิกฺขิตฺโต เอวํ นิรเย ฯ กตเมหิ ปญฺจหิ ฯ
ฉนฺทาคตึ คจฺฉติ โทสาคตึ คจฺฉติ โมหาคตึ คจฺฉติ ภยาคตึ
คจฺฉติ อุทฺทิฏฺฐานุทฺทิฏฺฐํ น ชานาติ ฯ อิเมหิ โข อุปาลิ
ปญฺจหงฺเคหิ สมนฺนาคโต ภตฺตุทฺเทสโก ยถาภตํ นิกฺขิตฺโต เอวํ
นิรเย ฯ ปญฺจหุปาลิ องฺเคหิ สมนฺนาคโต ภตฺตุทฺเทสโก ยถาภตํ
นิกฺขิตฺโต เอวํ สคฺเค ฯ กตเมหิ ปญฺจหิ ฯ น ฉนฺทาคตึ คจฺฉติ
น โทสาคตึ คจฺฉติ น โมหาคตึ คจฺฉติ น ภยาคตึ คจฺฉติ
อุทฺทิฏฺฐานุทฺทิฏฺฐํ ชานาติ ฯ อิเมหิ โข อุปาลิ ปญฺจหงฺเคหิ
สมนฺนาคโต ภตฺตุทฺเทสโก ยถาภตํ นิกฺขิตฺโต เอวํ สคฺเคติ ฯ
กตีหิ นุ โข ภนฺเต องฺเคหิ สมนฺนาคโต เสนาสนปญฺญาปโก
ฯเปฯ ภณฺฑาคาริโก จีวรปฏิคฺคาหโก จีวรภาชโก ยาคุ-
ภาชโก ผลภาชโก ขชฺชภาชโก อปฺปมตฺตกวิสฺสชฺชโก
สาฏิยคาหาปโก ปตฺตคาหาปโก อารามิกเปสโก สามเณรเปสโก
ยถาภตํ นิกฺขิตฺโต เอวํ นิรเยติ ฯ ปญฺจหุปาลิ องฺเคหิ สมนฺนาคโต
สามเณรเปสโก ยถาภตํ นิกฺขิตฺโต เอวํ นิรเย ฯ กตเมหิ ปญฺจหิ ฯ
ฉนฺทาคตึ คจฺฉติ โทสาคตึ คจฺฉติ โมหาคตึ คจฺฉติ ภยาคตึ
คจฺฉติ เปสิตาเปสิตํ น ชานาติ ฯ อิเมหิ โข อุปาลิ ปญฺจหงฺเคหิ
สมนฺนาคโต สามเณรเปสโก ยถาภตํ นิกฺขิตฺโต เอวํ นิรเย ฯ
ปญฺจหุปาลิ องฺเคหิ สมนฺนาคโต สามเณรเปสโก ยถาภตํ นิกฺขิตฺโต
เอวํ สคฺเค ฯ กตเมหิ ปญฺจหิ ฯ น ฉนฺทาคตึ คจฺฉติ น
โทสาคตึ คจฺฉติ น โมหาคตึ คจฺฉติ น ภยาคตึ คจฺฉติ
เปสิตาเปสิตํ ชานาติ ฯ อิเมหิ โข อุปาลิ ปญฺจหงฺเคหิ สมนฺนาคโต
สามเณรเปสโก ยถาภตํ นิกฺขิตฺโต เอวํ สคฺเคติ ฯ
อาวาสิกวคฺโค เตรสโม ฯ
ตสฺสุทฺทานํ

[๑๒๒๒] อาวาสิกพฺยากรณา ภตฺตเสนาสนานิ ๑ จ
ภณฺฑจีวรคาโห จ จีวรสฺส จ ภาชโก
ยาคุ ผลํ ขชฺชกญฺจ อปฺปสาฏิยคาหโก
ปตฺตอารามิกา ๒ เจว สามเณเรน เปสโกติ ฯ

[๑๒๒๓] กติ นุ โข ภนฺเต อานิสํสา กฐิวตฺถาเรติ ฯ ปญฺจิเม
อุปาลิ อานิสํสา กฐินตฺถาเร ฯ กตเม ปญฺจ ฯ อนามนฺตจาโร
อสมาทานจาโร คณโภชนํ ยาวทตฺถจีวรํ โย จ ตตฺถ
จีวรุปฺปาโท โส เนสํ ภวิสฺสติ ฯ อิเม โข อุปาลิ ปญฺจ
อานิสํสา กฐินตฺถาเรติ ฯ

[๑๒๒๔] กติ นุ โข ภนฺเต อาทีนวา มุฏฺฐสฺสติสฺส อสมฺปชานสฺส
#๑ ม. ภตฺตุเสนาสนานิ ฯ ยุ. ภตฺตุทฺเทสเสนาสนานิ ฯ ๒ ม. ปตฺโต อารามิโก ฯ
นิทฺทํ โอกฺกมโตติ ฯ ปญฺจิเม อุปาลิ อาทีนวา มุฏฺฐสฺสติสฺส
อสมฺปชานสฺส นิทฺทํ โอกฺกมโต ฯ กตเม ปญฺจ ฯ ทุกฺขํ สุปติ

ทุกฺขํ ปฏิพุชฺฌติ ปาปกํ สุปินํ ปสฺสติ เทวตา น รกฺขนฺติ
อสุจิ มุจฺจติ ฯ อิเม โข อุปาลิ ปญฺจ อาทีนวา มุฏฺฐสฺสติสฺส
อสมฺปชานสฺส นิทฺทํ โอกฺกมโต ฯ ปญฺจิเม อุปาลิ อานิสํสา
อุปฏฺฐิตสฺสติสฺส สมฺปชานสฺส นิทฺทํ โอกฺกมโต ฯ กตเม ปญฺจ ฯ
สุขํ สุปติ สุขํ ปฏิพุชฺฌติ น ปาปกํ สุปินํ ปสฺสติ เทวตา
รกฺขนฺติ อสุจิ น มุจฺจติ ฯ อิเม โข อุปาลิ ปญฺจ อานิสํสา
อุปฏฺฐิตสฺสติสฺส สมฺปชานสฺส นิทฺทํ โอกฺกมโตติ ฯ

[๑๒๒๕] กติ นุ โข ภนฺเต อวนฺทิยาติ ฯ ปญฺจิเม อุปาลิ
อวนฺทิยา ฯ กตเม ปญฺจ ฯ อนฺตรฆรํ ปวิฏฺโฐ อวนฺทิโย
รจฺฉํ คโต อวนฺทิโย โอตมสิโก อวนฺทิโย อสมนฺนาหรนฺโต
อวนฺทิโย สุตฺโต อวนฺทิโย ฯ อิเม โข อุปาลิ ปญฺจ อวนฺทิยา ฯ
อปเรปิ อุปาลิ ปญฺจ อวนฺทิยา ฯ กตเม ปญฺจ ฯ ยาคุปาเน
อวนฺทิโย ภตฺตคฺเค อวนฺทิโย เอกาวตฺโต อวนฺทิโย อญฺญาวิหิโต
อวนฺทิโย นคฺโค อวนฺทิโย ฯ อิเม โข อุปาลิ ปญฺจ
อวนฺทิยา ฯ อปเรปิ อุปาลิ ปญฺจ อวนฺทิยา ฯ กตเม ปญฺจ ฯ
ขาทนฺโต อวนฺทิโย ภุญฺชนฺโต อวนฺทิโย อุจฺจารํ กโรนฺโต
อวนฺทิโย ปสฺสาวํ กโรนฺโต อวนฺทิโย อุกฺขิตฺตโก อวนฺทิโย ฯ
อิเม โข อุปาลิ ปญฺจ อวนฺทิยา ฯ อปเรปิ อุปาลิ ปญฺจ
อวนฺทิยา ฯ กตเม ปญฺจ ฯ ปุเร อุปสมฺปนฺเนน ปจฺฉา
อุปสมฺปนฺโน อวนฺทิโย อนุปสมฺปนฺโน อวนฺทิโย นานาสํวาสโก
วุฑฺฒตโร อธมฺมวาที อวนฺทิโย มาตุคาโม อวนฺทิโย ปณฺฑโก
อวนฺทิโย ฯ อิเม โข อุปาลิ ปญฺจ อวนฺทิยา ฯ อปเรปิ อุปาลิ
ปญฺจ อวนฺทิยา ฯ กตเม ปญฺจ ฯ ปาริวาสิโก อวนฺทิโย มูลาย
ปฏิกสฺสนารโห อวนฺทิโย มานตฺตารโห อวนฺทิโย มานตฺตจาริโก
อวนฺทิโย อพฺภานารโห อวนฺทิโย ฯ อิเม โข อุปาลิ
ปญฺจ อวนฺทิยาติ ฯ

[๑๒๒๖] กติ นุ โข ภนฺเต วนฺทิยาติ ฯ ปญฺจิเม อุปาลิ
วนฺทิยา ฯ กตเม ปญฺจ ฯ ปจฺฉา อุปสมฺปนฺเนน ปุเร อุปสมฺปนฺโน
วนฺทิโย นานาสํวาสโก วุฑฺฒตโร ธมฺมวาที วนฺทิโย
อาจริโย วนฺทิโย อุปชฺฌาโย วนฺทิโย สเทวเก โลเก สมารเก
สพฺรหฺมเก สสฺสมณพฺราหฺมณิยา ปชาย สเทวมนุสฺสาย ตถาคโต
อรหํ สมฺมาสมฺพุทฺโธ วนฺทิโย ฯ อิเม โข อุปาลิ ปญฺจ วนฺทิยาติ ฯ

[๑๒๒๗] นวกตเรน ภนฺเต ภิกฺขุนา วุฑฺฒตรสฺส ภิกฺขุโน ปาเท
วนฺทนฺเตน กติ ธมฺเม อชฺฌตฺตํ อุปฏฺฐาเปตฺวา ปาทา วนฺทิตพฺพาติ ฯ
นวกตเรนุปาลิ ภิกฺขุนา วุฑฺฒตรสฺส ภิกฺขุโน ปาเท
วนฺทนฺเตน ปญฺจ ธมฺเม อชฺฌตฺตํ อุปฏฺฐาเปตฺวา ปาทา วนฺทิตพฺพา ฯ
กตเม ปญฺจ ฯ นวกตเรนุปาลิ ภิกฺขุนา วุฑฺฒตรสฺส ภิกฺขุโน
ปาเท วนฺทนฺเตน เอกํสํ อุตฺตราสงฺคํ กริตฺวา อญฺชลึ ปคฺคเหตฺวา
อุโภหิ ปาณิตเลหิ ปาทานิ ปริสมฺพาหนฺเตน เปมญฺจ คารวญฺจ
อุปฏฺฐาเปตฺวา ปาทา วนฺทิตพฺพา ฯ นวกตเรนุปาลิ ภิกฺขุนา
วุฑฺฒตรสฺส ภิกฺขุโน ปาเท วนฺทนฺเตน อิเม ปญฺจ ธมฺเม อชฺฌตฺตํ
อุปฏฺฐาเปตฺวา ปาทา วนฺทิตพฺพาติ ฯ
กฐินตฺถารวคฺโค จุทฺทสโม ฯ
ตสฺสุทฺทานํ

[๑๒๒๘] กฐินตฺถารนิทฺทา จ อนฺตรยาคุขาทเน
ปุเร จ ปาริวาสิ จ วนฺเทยฺโย วนฺทิตพฺพกนฺติ ฯ
อุปาลิปญฺจกํ นิฏฺฐิตํ ฯ
เตสํ วคฺคานํ อุทฺทานํ

[๑๒๒๙] อนิสฺสิเตน กมฺมญฺจ โวหาราวิกมฺเมน จ
โจทนา จ ธุตงฺคา จ มุสา ภิกฺขุนิเมว จ
อุพฺพาหิกาธิกรณํ เภทกา ปญฺจมา ปุเร
อาวาสิกา กฐินญฺจ จุทฺทสา สุปฺปกาสิตาติ ฯ
________________
สมุฏฺฐานํ