[๑๑๙๐] ปริสุทฺธญฺจ กาเลน การุญฺเญ ๑ โอกาเสน จ
อตฺตาทานํ อธิกรณํ อปเรหิปิ วตฺถุญฺจ
สุตฺตํ ธมฺมํ ปุน วตฺถุญฺจ อาปตฺติ อธิกรเณน จาติ ฯ

[๑๑๙๑] กติ นุ โข ภนฺเต อารญฺญกาติ ๒ ฯ ปญฺจิเม
อุปาลิ อารญฺญกา ฯ กตเม ปญฺจ ฯ มนฺทตฺตา โมมูหตฺตา
อารญฺญโก โหติ ปาปิจฺโฉ อิจฺฉาปกโต อารญฺญโก โหติ
อุมฺมาทา จิตฺตกฺเขปา ๓ อารญฺญโก โหติ วณฺณิโต ๔ พุทฺเธหิ
พุทฺธสาวเกหีติ อารญฺญโก โหติ อปิจ อปฺปิจฺฉญฺเญว นิสฺสาย
สนฺตุฏฺฐิญฺเญว นิสฺสาย สลฺเลขญฺเญว นิสฺสาย ปวิเวกญฺเญว
นิสฺสาย อิทมตฺถิตญฺเญว นิสฺสาย อารญฺญโก โหติ ฯ อิเม
โข อุปาลิ ปญฺจ อารญฺญกาติ ฯ กติ นุ โข ภนฺเต
ปิณฺฑปาติกาติ … กติ นุ โข ภนฺเต ปํสุกูลิกาติ … กติ นุ โข
ภนฺเต รุกฺขมูลิกาติ … กติ นุ โข ภนฺเต โสสานิกาติ … กติ
นุ โข ภนฺเต อพฺโภกาสิกาติ … กติ นุ โข ภนฺเต เตจีวริกาติ …
กติ นุ โข ภนฺเต สปทานจาริกาติ … กติ นุ โข ภนฺเต
เนสชฺชิกาติ … กติ นุ โข ภนฺเต ยถาสนฺถติกาติ … กติ นุ
โข ภนฺเต เอกาสนิกาติ … กติ นุ โข ภนฺเต ขลุปจฺฉาภตฺติกาติ …
#๑ ม. การุญฺญํ ฯ ๒ โป. ม. อารญฺญิกา ฯ สพฺพตฺถ เอวํ ญาตพฺพํ ฯ ๓ โป.
#จิตฺตุกฺเขปา ฯ ๔ โป. ม. ยุ. วณฺณิตํ ฯ
กติ นุ โข ภนฺเต ปตฺตปิณฺฑิกาติ ฯ ปญฺจิเม อุปาลิ ปตฺตปิณฺฑิกา ฯ
กตเม ปญฺจ ฯ มนฺทตฺตา โมมูหตฺตา ปตฺตปิณฺฑิโก โหติ
ปาปิจฺโฉ อิจฺฉาปกโต ปตฺตปิณฺฑิโก โหติ อุมฺมาทา จิตฺตกฺเขปา
ปตฺตปิณฺฑิโก โหติ วณฺณิโต ๑ พุทฺเธหิ พุทฺธสาวเกหีติ
ปตฺตปิณฺฑิโก โหติ อปิจ อปฺปิจฺฉญฺเญว นิสฺสาย สนฺตุฏฺฐิญฺเญว
นิสฺสาย สลฺเลขญฺเญว นิสฺสาย ปวิเวกญฺเญว นิสฺสาย
อิทมตฺถิตญฺเญว นิสฺสาย ปตฺตปิณฺฑิโก โหติ ฯ อิเม โข อุปาลิ
ปญฺจ ปตฺตปิณฺฑิกาติ ฯ
ธูตงฺควคฺโค ฉฏฺโฐ ฯ
ตสฺสุทฺทานํ

[๑๑๙๒] อารญฺญโก ปิณฺฑิปํสุ รุกฺขสุสานปญฺจมํ
อพฺโภเตจีวรญฺเจว สปทานเนสชฺชิกา
สนฺถเตกาสนญฺเจว ขลุปจฺฉาปตฺตปิณฺฑิกาติ ฯ

[๑๑๙๓] กติ นุ โข ภนฺเต มุสาวาทาติ ฯ ปญฺจิเม อุปาลิ
มุสาวาทา ฯ กตเม ปญฺจ ฯ อตฺถิ มุสาวาโท ปาราชิกคามี
อตฺถิ มุสาวาโท สงฺฆาทิเสสคามี อตฺถิ มุสาวาโท ถุลฺลจฺจยคามี
อตฺถิ มุสาวาโท ปาจิตฺติยคามี อตฺถิ มุสาวาโท ทุกฺกฏคามีติ ฯ
อิเม โข อุปาลิ ปญฺจ มุสาวาทาติ ฯ

[๑๑๙๔] กตีหิ นุ โข ภนฺเต องฺเคหิ สมนฺนาคตสฺส ภิกฺขุโน
สงฺฆมชฺเฌ อุโปสถํ วา ปวารณํ วา ฐเปนฺตสฺส อลํ ภิกฺขุ
#๑ โป. ม. ยุ. วณฺณิตํ ฯ
มา ภณฺฑนํ มา กลหํ มา วิคฺคหํ มา วิวาทนฺติ โอมทฺทิตฺวา
สงฺเฆน อุโปสโถ วา ปวารณา วา กาตพฺพาติ ฯ ปญฺจหุปาลิ
องฺเคหิ สมนฺนาคตสฺส ภิกฺขุโน สงฺฆมชฺเฌ อุโปสถํ วา ปวารณํ
วา ฐเปนฺตสฺส อลํ ภิกฺขุ มา ภณฺฑนํ มา กลหํ มา วิคฺคหํ
มา วิวาทนฺติ โอมทฺทิตฺวา สงฺเฆน อุโปสโถ วา ปวารณา
วา กาตพฺพา ฯ กตเมหิ ปญฺจหิ ฯ อลชฺชี จ โหติ พาโล
จ อปกตตฺโต จ จาวนาธิปฺปาโย วตฺตา โหติ โน
วุฏฺฐานาธิปฺปาโย ฯ อิเมหิ โข อุปาลิ ปญฺจหงฺเคหิ สมนฺนาคตสฺส
ภิกฺขุโน สงฺฆมชฺเฌ อุโปสถํ วา ปวารณํ วา ฐเปนฺตสฺส อลํ
ภิกฺขุ มา ภณฺฑนํ มา กลหํ มา วิคฺคหํ มา วิวาทนฺติ โอมทฺทิตฺวา
สงฺเฆน อุโปสโถ วา ปวารณา วา กาตพฺพา ฯ อปเรหิปิ
อุปาลิ ปญฺจหงฺเคหิ สมนฺนาคตสฺส ภิกฺขุโน สงฺฆมชฺเฌ อุโปสถํ
วา ปวารณํ วา ฐเปนฺตสฺส อลํ ภิกฺขุ มา ภณฺฑนํ มา
กลหํ มา วิคฺคหํ มา วิวาทนฺติ โอมทฺทิตฺวา สงฺเฆน อุโปสโถ
วา ปวารณา วา กาตพฺพา ฯ กตเมหิ ปญฺจหิ ฯ อปริสุทฺธกายสมาจาโร
โหติ อปริสุทฺธวจีสมาจาโร โหติ อปริสุทฺธาชีโว
โหติ พาโล โหติ อพฺยตฺโต ภณฺฑนการโก โหติ กลหการโก ฯ
อิเมหิ โข อุปาลิ ปญฺจหงฺเคหิ สมนฺนาคตสฺส ภิกฺขุโน สงฺฆมชฺเฌ
อุโปสถํ วา ปวารณํ วา ฐเปนฺตสฺส อลํ ภิกฺขุ มา ภณฺฑนํ
มา กลหํ มา วิคฺคหํ มา วิวาทนฺติ โอมทฺทิตฺวา สงฺเฆน
อุโปสโถ วา ปวารณา วา กาตพฺพาติ ฯ

[๑๑๙๕] กตีหิ นุ โข ภนฺเต องฺเคหิ สมนฺนาคตสฺส ภิกฺขุโน
อนุโยโค น ทาตพฺโพติ ฯ ปญฺจหุปาลิ องฺเคหิ สมนฺนาคตสฺส
ภิกฺขุโน อนุโยโค น ทาตพฺโพ ฯ กตเมหิ ปญฺจหิ ฯ อาปตฺตานาปตฺตึ
น ชานาติ ลหุกครุกํ อาปตฺตึ น ชานาติ สาวเสสานวเสสํ
อาปตฺตึ น ชานาติ ทุฏฺฐุลฺลาทุฏฺฐุลฺลํ อาปตฺตึ น ชานาติ
สปฺปฏิกมฺมอปฺปฏิกมฺมํ อาปตฺตึ น ชานาติ ฯ อิเมหิ โข อุปาลิ
ปญฺจหงฺเคหิ สมนฺนาคตสฺส ภิกฺขุโน อนุโยโค น ทาตพฺโพ ฯ
ปญฺจหุปาลิ องฺเคหิ สมนฺนาคตสฺส ภิกฺขุโน อนุโยโค ทาตพฺโพ ฯ
กตเมหิ ปญฺจหิ ฯ อาปตฺตานาปตฺตึ ชานาติ ลหุกครุกํ อาปตฺตึ
ชานาติ สาวเสสานวเสสํ อาปตฺตึ ชานาติ ทุฏฺฐุลฺลาทุฏฺฐุลฺลํ
อาปตฺตึ ชานาติ สปฺปฏิกมฺมอปฺปฏิกมฺมํ อาปตฺตึ ชานาติ ฯ
อิเมหิ โข อุปาลิ ปญฺจหงฺเคหิ สมนฺนาคตสฺส ภิกฺขุโน อนุโยโค
ทาตพฺโพติ ฯ

[๑๑๙๖] กตีหิ นุ โข ภนฺเต อากาเรหิ ภิกฺขุ อาปตฺตึ
อาปชฺชตีติ ฯ ปญฺจหุปาลิ อากาเรหิ ภิกฺขุ อาปตฺตึ อาปชฺชติ ฯ
กตเมหิ ปญฺจหิ ฯ อลชฺชิตา อญฺญาณตา กุกฺกุจฺจปกตตา
อกปฺปิเย กปฺปิยสญฺญิตา กปฺปิเย อกปฺปิยสญฺญิตา ฯ อิเมหิ
โข อุปาลิ ปญฺจหากาเรหิ ภิกฺขุ อาปตฺตึ อาปชฺชติ ฯ อปเรหิปิ
อุปาลิ ปญฺจหากาเรหิ ภิกฺขุ อาปตฺตึ อาปชฺชติ ฯ กตเมหิ
ปญฺจหิ ฯ อทสฺสเนน อสฺสวเนน ปสุตฺตตา ๑ ตถาสญฺญี
สติสมฺโมสา ฯ อิเมหิ โข อุปาลิ ปญฺจหากาเรหิ ภิกฺขุ อาปตฺตึ
อาปชฺชตีติ ฯ

[๑๑๙๗] กติ นุ โข ภนฺเต เวราติ ฯ ปญฺจิเม อุปาลิ
เวรา ฯ กตเม ปญฺจ ฯ ปาณาติปาโต อทินฺนาทานํ กาเมสุ
มิจฺฉาจาโร มุสาวาโท สุราเมรยมชฺชปมาทฏฺฐานํ ฯ อิเมหิ โข
อุปาลิ ปญฺจ เวราติ ฯ

[๑๑๙๘] กติ นุ โข ภนฺเต เวรมณิโยติ ฯ ปญฺจิมา อุปาลิ
เวรมณิโย ฯ กตมา ปญฺจ ฯ ปาณาติปาตา เวรมณี อทินฺนาทานา
เวรมณี กาเมสุ มิจฺฉาจารา เวรมณี มุสาวาทา เวรมณี
สุราเมรยมชฺชปมาทฏฺฐานา เวรมณี ฯ อิมา โข อุปาลิ ปญฺจ
เวรมณิโยต ฯ

[๑๑๙๙] กติ นุ โข ภนฺเต พฺยสนานีติ ฯ ปญฺจิมานิ อุปาลิ
พฺยสนานิ ฯ กตมานิ ปญฺจ ฯ ญาติพฺยสนํ โภคพฺยสนํ โรคพฺยสนํ
สีลพฺยสนํ ทิฏฺฐิพฺยสนํ ฯ อิมานิ โข อุปาลิ ปญฺจ พฺยสนานีติ ฯ