[๖๖๐] กิสฺมิญฺจิเทว อธิกรเณ ปจฺฉากตา ๑ กุปิตา ๒ ภิกฺขุนี
ยาวตติยํ สมนุภาสนาย นปฺปฏินิสฺสชฺชนฺตี ติสฺโส อาปตฺติโย
อาปชฺชติ ญตฺติยา ทุกฺกฏํ ทฺวีหิ กมฺมวาจาหิ ถุลฺลจฺจยา
กมฺมวาจาปริโยสาเน อาปตฺติ สงฺฆาทิเสสสฺส ฯ

[๖๖๑] สํสฏฺฐา ภิกฺขุนิโย ยาวตติยํ สมนุภาสนาย นปฺปฏินิสฺสชฺชนฺติโย
ติสฺโส อาปตฺติโย อาปชฺชนฺติ ญตฺติยา ทุกฺกฏํ
ทฺวีหิ กมฺมวาจาหิ ถุลฺลจฺจยา กมฺมวาจาปริโยสาเน อาปตฺติ
สงฺฆาทิเสสสฺส ฯ

[๖๖๒] สํสฏฺฐาวยฺเย ตุเมฺห วิหรถ มา ตุเมฺห นานา
วิหริตฺถาติ อุยฺโยเชนฺตี ยาวตติยํ สมนุภาสนาย นปฺปฏินิสฺสชฺชนฺตี
ติสฺโส อาปตฺติโย อาปชฺชติ ญตฺติยา ทุกฺกฏํ ทฺวีหิ กมฺมวาจาหิ
ถุลฺลจฺจยา กมฺมวาจาปริโยสาเน อาปตฺติ สงฺฆาทิเสสสฺส ฯ
สงฺฆาทิเสสา นิฏฺฐิตา ฯ

[๖๖๓] ปตฺตสนฺนิจยํ กโรนฺตี เอกํ อาปตฺตึ อาปชฺชติ
นิสฺสคฺคิยํ ปาจิตฺติยํ ฯ

[๖๖๔] อกาลจีวรํ กาลจีวรนฺติ อธิฏฺฐหิตฺวา ภาชาเปนฺตี
เทฺว อาปตฺติโย อาปชฺชติ ภาชาเปติ ปโยเค ทุกฺกฏํ
ภาชาปิเต นิสฺสคฺคิยํ ปาจิตฺติยํ ฯ

[๖๖๕] ภิกฺขุนิยา สทฺธึ จีวรํ ปริวฏฺเฏตฺวา อจฺฉินฺทนฺตี เทฺว
#๑ โป. ม. ยุ. ปจฺจากตา ฯ ๒ ม. ยุ. อยํ ปาโฐ นตฺถิ ฯ
อาปตฺติโย อาปชฺชติ อจฺฉินฺทติ ปโยเค ทุกฺกฏํ อจฺฉินฺเน
นิสฺสคฺคิยํ ปาจิตฺติยํ ฯ

[๖๖๖] อญฺญํ วิญฺญาเปตฺวา อญฺญํ วิญฺญาเปนฺตี เทฺว อาปตฺติโย
อาปชฺชติ วิญฺญาเปติ ปโยเค ทุกฺกฏํ วิญฺญาปิเต นิสฺสคฺคิยํ
ปาจิตฺติยํ ฯ

[๖๖๗] อญฺญํ เจตาเปตฺวา อญฺญํ เจตาเปนฺตี เทฺว อาปตฺติโย
อาปชฺชติ เจตาเปติ ปโยเค ทุกฺกฏํ เจตาปิเต นิสฺสคฺคิยํ
ปาจิตฺติยํ ฯ

[๖๖๘] อญฺญทตฺถิเกน ปริกฺขาเรน อญฺญุทฺทิสิเกน สงฺฆิเกน
อญฺญํ เจตาเปนฺตี เทฺว อาปตฺติโย อาปชฺชติ เจตาเปติ ปโยเค
ทุกฺกฏํ เจตาปิเต นิสฺสคฺคิยํ ปาจิตฺติยํ ฯ

[๖๖๙] อญฺญทตฺถิเกน ปริกฺขาเรน อญฺญุทฺทิสิเกน สงฺฆิเกน
สญฺญาจิเกน อญฺญํ เจตาเปนฺตี เทฺว อาปตฺติโย อาปชฺชติ
เจตาเปติ ปโยเค ทุกฺกฏํ เจตาปิเต นิสฺสคฺคิยํ ปาจิตฺติยํ ฯ