[๗๔๔] กามาวจโร ธมฺโม กามาวจรสฺส ธมฺมสฺส
วิปฺปยุตฺตปจฺจเยน ปจฺจโย: สหชาตํ ปุเรชาตํ ปจฺฉาชาตํ ฯ สงฺขิตฺตํ ฯ
กามาวจโร ธมฺโม นกามาวจรสฺส ธมฺมสฺส วิปฺปยุตฺตปจฺจเยน
ปจฺจโย: สหชาตํ ปุเรชาตํ ฯ สหชาตํ: สงฺขิตฺตํ ฯ ปฏิสนฺธิกฺขเณ
วตฺถุ นกามาวจรานํ ขนฺธานํ วิปฺปยุตฺตปจฺจเยน ปจฺจโย ฯ ปุเรชาตํ:
วตฺถุ นกามาวจรานํ ขนฺธานํ วิปฺปยุตฺตปจฺจเยน ปจฺจโย ฯ
นกามาวจโร ธมฺโม กามาวจรสฺส ธมฺมสฺส วิปฺปยุตฺตปจฺจเยน
ปจฺจโย: สหชาตํ ปจฺฉาชาตํ ฯ สหชาตา: นกามาวจรา ขนฺธา
จิตฺตสมุฏฺฐานานํ รูปานํ วิปฺปยุตฺตปจฺจเยน ปจฺจโย ปฏิสนฺธิ ฯ
ปจฺฉาชาตา: นกามาวจรา ขนฺธา ปุเรชาตสฺส อิมสฺส กายสฺส
วิปฺปยุตฺตปจฺจเยน ปจฺจโย ฯ

[๗๔๕] กามาวจโร ธมฺโม กามาวจรสฺส ธมฺมสฺส อตฺถิปจฺจเยน
ปจฺจโย: สหชาตํ ปุเรชาตํ ปจฺฉาชาตํ อาหารํ อินฺทฺริยํ ฯ สงฺขิตฺตํ ฯ
กามาวจโร ธมฺโม นกามาวจรสฺส ธมฺมสฺส อตฺถิปจฺจเยน ปจฺจโย:
สหชาตํ ปุเรชาตํ ฯ สหชาตํ: ปฏิสนฺธิกฺขเณ วตฺถุ นกามาวจรานํ
ขนฺธานํ อตฺถิปจฺจเยน ปจฺจโย ฯ ปุเรชาตํ: ทิพฺเพน จกฺขุนา …
ปุเรชาตสทิสํ ฯ นกามาวจโร ธมฺโม นกามาวจรสฺส ธมฺมสฺส
อตฺถิปจฺจเยน ปจฺจโย: สหชาตํ ฯ สงฺขิตฺตํ ฯ นกามาวจโร ธมฺโม
กามาวจรสฺส ธมฺมสฺส อตฺถิปจฺจเยน ปจฺจโย: สหชาตํ ปจฺฉาชาตํ
วิปฺปยุตฺตสทิสํ ฯ นกามาวจโร ธมฺโม กามาวจรสฺส จ
นกามาวจรสฺส จ ธมฺมสฺส อตฺถิปจฺจเยน ปจฺจโย: ปฏิจฺจสทิสํ ฯ
กามาวจโร จ นกามาวจโร จ ธมฺมา กามาวจรสฺส ธมฺมสฺส
อตฺถิปจฺจเยน ปจฺจโย: สหชาตํ ปจฺฉาชาตํ อาหารํ อินฺทฺริยํ ฯ สหชาตา:
นกามาวจรา ขนฺธา จ มหาภูตา จ จิตฺตสมุฏฺฐานานํ รูปานํ
อตฺถิปจฺจเยน ปจฺจโย ปฏิสนฺธิ ฯ ปจฺฉาชาตา: นกามาวจรา
ขนฺธา จ กพฬึกาโร อาหาโร จ อิมสฺส กายสฺส อตฺถิปจฺจเยน
ปจฺจโย ฯ ปจฺฉาชาตา: นกามาวจรา ขนฺธา จ รูปชีวิตินฺทฺริยญฺจ
กฏตฺตารูปานํ อตฺถิปจฺจเยน ปจฺจโย ฯ กามาวจโร จ นกามาวจโร
จ ธมฺมา นกามาวจรสฺส ธมฺมสฺส อตฺถิปจฺจเยน ปจฺจโย: สหชาตํ
ปุเรชาตํ ฯ สหชาโต: นกามาวจโร เอโก ขนฺโธ จ วตฺถุ จ
ติณฺณนฺนํ ขนฺธานํ อตฺถิปจฺจเยน ปจฺจโย เทฺว ขนฺธา …
ปฏิสนฺธิ ฯ … นตฺถิปจฺจเยน ปจฺจโย: วิคตปจฺจเยน ปจฺจโย:
อวิคตปจฺจเยน ปจฺจโย: ฯ

[๗๔๖] เหตุยา จตฺตาริ อารมฺมเณ จตฺตาริ อธิปติยา
จตฺตาริ อนนฺตเร จตฺตาริ สมนนฺตเร จตฺตาริ สหชาเต สตฺต
อญฺญมญฺเญ ฉ นิสฺสเย สตฺต อุปนิสฺสเย จตฺตาริ ปุเรชาเต
เทฺว ปจฺฉาชาเต เทฺว อาเสวเน ตีณิ กมฺเม จตฺตาริ
วิปาเก จตฺตาริ อาหาเร จตฺตาริ อินฺทฺริเย จตฺตาริ ฌาเน
จตฺตาริ มคฺเค จตฺตาริ สมฺปยุตฺเต เทฺว วิปฺปยุตฺเต ตีณิ
อตฺถิยา สตฺต นตฺถิยา จตฺตาริ วิคเต จตฺตาริ อวิคเต สตฺต ฯ

[๗๔๗] กามาวจโร ธมฺโม กามาวจรสฺส ธมฺมสฺส อารมฺมณปจฺจเยน
ปจฺจโย: สหชาตปจฺจเยน ปจฺจโย: อุปนิสฺสยปจฺจเยน
ปจฺจโย: ปุเรชาตปจฺจเยน ปจฺจโย: ปจฺฉาชาตปจฺจเยน ปจฺจโย:
กมฺมปจฺจเยน ปจฺจโย: อาหารปจฺจเยน ปจฺจโย: อินฺทฺริยปจฺจเยน
ปจฺจโย: ฯ กามาวจโร ธมฺโม นกามาวจรสฺส ธมฺมสฺส
อารมฺมณปจฺจเยน ปจฺจโย: สหชาตปจฺจเยน ปจฺจโย:
อุปนิสฺสยปจฺจเยน ปจฺจโย: ปุเรชาตปจฺจเยน ปจฺจโย: ฯ นกามาวจโร
ธมฺโม นกามาวจรสฺส ธมฺมสฺส อารมฺมณปจฺจเยน ปจฺจโย:
สหชาตปจฺจเยน ปจฺจโย: อุปนิสฺสยปจฺจเยน ปจฺจโย: ฯ นกามาวจโร
ธมฺโม กามาวจรสฺส ธมฺมสฺส อารมฺมณปจฺจเยน ปจฺจโย: สหชาตปจฺจเยน
ปจฺจโย: อุปนิสฺสยปจฺจเยน ปจฺจโย: ปจฺฉาชาตปจฺจเยน
ปจฺจโย: กมฺมปจฺจเยน ปจฺจโย: ฯ นกามาวจโร ธมฺโม
กามาวจรสฺส จ นกามาวจรสฺส จ ธมฺมสฺส สหชาตปจฺจเยน ปจฺจโย:
กมฺมปจฺจเยน ปจฺจโย: ฯ กามาวจโร จ นกามาวจโร จ ธมฺมา
กามาวจรสฺส ธมฺมสฺส สหชาตปจฺจเยน ปจฺจโย: ปจฺฉาชาตปจฺจเยน
ปจฺจโย: อาหารปจฺจเยน ปจฺจโย: อินฺทฺริยปจฺจเยน
ปจฺจโย: ฯ กามาวจโร จ นกามาวจโร จ ธมฺมา นกามาวจรสฺส
ธมฺมสฺส สหชาตปจฺจเยน ปจฺจโย: ปุเรชาตปจฺจเยน ปจฺจโย: ฯ

[๗๔๘] นเหตุยา สตฺต นอารมฺมเณ สตฺต นอธิปติยา สตฺต
นอนนฺตเร สตฺต นสมนนฺตเร สตฺต นสหชาเต ฉ
นอญฺญมญฺเญ ฉ นนิสฺสเย ฉ นอุปนิสฺสเย สตฺต นปุเรชาเต ฉ
ฯเปฯ นสมฺปยุตฺเต ฉ นวิปฺปยุตฺเต ปญฺจ โนอตฺถิยา ปญฺจ
โนนตฺถิยา สตฺต โนวิคเต สตฺต โนอวิคเต ปญฺจ ฯ

[๗๔๙] เหตุปจฺจยา นอารมฺมเณ จตฺตาริ … นอธิปติยา
จตฺตาริ นอนนฺตเร จตฺตาริ นสมนนฺตเร จตฺตาริ นอญฺญมญฺเญ เทฺว
นอุปนิสฺสเย จตฺตาริ นสมฺปยุตฺเต เทฺว โนนตฺถิยา จตฺตาริ
โนวิคเต จตฺตาริ ฯ

[๗๕๐] นเหตุปจฺจยา อารมฺมเณ จตฺตาริ … อธิปติยา จตฺตาริ ฯ
อนุโลมมาติกา กาตพฺพา ฯ … อวิคเต สตฺต ฯ
กามาวจรทุกํ นิฏฺฐิตํ ฯ
______________
รูปาวจรทุกํ
ปฏิจฺจวาโร

[๗๕๑] รูปาวจรํ ธมฺมํ ปฏิจฺจ รูปาวจโร ธมฺโม อุปฺปชฺชติ
เหตุปจฺจยา: รูปาวจรํ เอกํ ขนฺธํ ปฏิจฺจ ตโย ขนฺธา เทฺว
ขนฺเธ … ปฏิสนฺธิ ฯ รูปาวจรํ ธมฺมํ ปฏิจฺจ นรูปาวจโร ธมฺโม
อุปฺปชฺชติ เหตุปจฺจยา: รูปาวจเร ขนฺเธ ปฏิจฺจ จิตฺตสมุฏฺฐานํ
รูปํ ปฏิสนฺธิ ฯ รูปาวจรํ ธมฺมํ ปฏิจฺจ รูปาวจโร จ นรูปาวจโร จ
ธมฺมา อุปฺปชฺชนฺติ เหตุปจฺจยา: รูปาวจรํ เอกํ ขนฺธํ ปฏิจฺจ
ตโย ขนฺธา จิตฺตสมุฏฺฐานญฺจ รูปํ เทฺว ขนฺเธ … ปฏิสนฺธิ ฯ
นรูปาวจรํ ธมฺมํ ปฏิจฺจ นรูปาวจโร ธมฺโม อุปฺปชฺชติ เหตุปจฺจยา:
นรูปาวจรํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ
เทฺว ขนฺเธ … ปฏิสนฺธิ ฯ นรูปาวจรํ ธมฺมํ ปฏิจฺจ รูปาวจโร
ธมฺโม อุปฺปชฺชติ เหตุปจฺจยา: ปฏิสนฺธิกฺขเณ วตฺถุํ ปฏิจฺจ รูปาวจรา
ขนฺธา ฯ นรูปาวจรํ ธมฺมํ ปฏิจฺจ รูปาวจโร จ นรูปาวจโร จ
ธมฺมา อุปฺปชฺชนฺติ เหตุปจฺจยา: ปฏิสนฺธิกฺขเณ วตฺถุํ ปฏิจฺจ
รูปาวจรา ขนฺธา มหาภูเต ปฏิจฺจ กฏตฺตารูปํ ฯ รูปาวจรญฺจ
นรูปาวจรญฺจ ธมฺมํ ปฏิจฺจ รูปาวจโร ธมฺโม อุปฺปชฺชติ
เหตุปจฺจยา: ปฏิสนฺธิกฺขเณ รูปาวจรํ เอกํ ขนฺธญฺจ วตฺถุญฺจ ปฏิจฺจ
ตโย ขนฺธา เทฺว ขนฺเธ … ฯ รูปาวจรญฺจ นรูปาวจรญฺจ ธมฺมํ
ปฏิจฺจ นรูปาวจโร ธมฺโม อุปฺปชฺชติ เหตุปจฺจยา: รูปาวจเร
ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ ปฏิสนฺธิกฺขเณ
รูปาวจเร ขนฺเธ จ มหาภูเต จ ปฏิจฺจ กฏตฺตารูปํ ฯ รูปาวจรญฺจ
นรูปาวจรญฺจ ธมฺมํ ปฏิจฺจ รูปาวจโร จ นรูปาวจโร จ ธมฺมา
อุปฺปชฺชนฺติ เหตุปจฺจยา: ปฏิสนฺธิกฺขเณ รูปาวจรํ เอกํ ขนฺธญฺจ
วตฺถุญฺจ ปฏิจฺจ ตโย ขนฺธา เทฺว ขนฺเธ … รูปาวจเร ขนฺเธ จ
มหาภูเต จ ปฏิจฺจ กฏตฺตารูปํ ฯ สงฺขิตฺตํ ฯ

[๗๕๒] เหตุยา นว อารมฺมเณ จตฺตาริ อธิปติยา ปญฺจ
อนนฺตเร จตฺตาริ สมนนฺตเร จตฺตาริ สหชาเต นว อญฺญมญฺเญ
ฉ นิสฺสเย นว อุปนิสฺสเย จตฺตาริ ปุเรชาเต เทฺว อาเสวเน
เทฺว กมฺเม นว วิปาเก นว ฌาเน นว มคฺเค นว
สมฺปยุตฺเต จตฺตาริ วิปฺปยุตฺเต นว อตฺถิยา นว นตฺถิยา
จตฺตาริ วิคเต จตฺตาริ อวิคเต นว ฯ

[๗๕๓] นรูปาวจรํ ธมฺมํ ปฏิจฺจ นรูปาวจโร ธมฺโม อุปฺปชฺชติ
นเหตุปจฺจยา: อเหตุกํ นรูปาวจรํ เอกํ ขนฺธํ ปฏิจฺจ ตโย ขนฺธา
จิตฺตสมุฏฺฐานญฺจ รูปํ เทฺว ขนฺเธ … อเหตุกปฏิสนฺธิกฺขเณ ขนฺเธ
ปฏิจฺจ วตฺถุ วตฺถุํ ปฏิจฺจ ขนฺธา เอกํ มหาภูตํ ยาว อสญฺญสตฺตา
วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต
อุทฺธจฺจสหคโต โมโห ฯ … นอารมฺมณปจฺจยา: ตีณิ ฯ